#ပြည်တွင်းသတင်း
◼ ယနေ့အထိ နောက်ဆက်တွဲငလျင်လှုပ်ခတ်မှု (၁၇၇) ကြိမ်ရှိလာ
ပြီးခဲ့သည့်(မတ် ၂၈ ရက်)တွင် လှုပ်ခတ်ခဲ့သည့်အင်အားပြင်းငလျင်အပါအဝင် နောက်ဆက်တွဲငလျင်လှုပ်ခတ်မှုစုစုပေါင်း (၁၇၇) ကြိမ်ရှိလာကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရသိရသည်။
ယနေ့(မေ ၂၀ ရက်) နံနက် ၁၀ နာရီ ၂၆ မိနစ် ၁၃ စက္ကန့်တွင် နေပြည်တော်၊ တပ်ကုန်းမြို့၏ အနောက်ဘက် ၁၉ မိုင်ခန့်အနက် ၁၀ ကီလိုမီတာကိုဗဟိုပြု၍ အင်အားရစ်ခ်တာစကေး ၃ ဒသမ ၇ အဆင့်ရှိငလျင်တစ်ခုလှုပ်ခတ်ခဲ့ကြောင်း မိုးဇလက ထုတ်ပြန်ထားသည်။
“ဒါကတော့စစ်ကိုင်းပြတ်ရွေ့ရဲ့အကျန်ပေါ့နော်။ နောက်ဆက်တွဲငလျင်စာရင်းထဲဝင်မှာပေါ့။ တဖြည်းဖြည်းနဲ့တော့ အားလျော့နေပြီ။ ထပ်ပြီးငလျင်ကြီးလှုပ်ဖို့ဆိုတာကအနည်းဆုံး တစ်နှစ်ကနေ ၁၀ နှစ်ကြာမှ ပြန်လှုပ်တော့မှာပေါ့။ ငလျင်ဆိုတာကတော့ ကြိုခန့်မှန်းမရပါဘူး” ဟု မိုးလေဝသ စောင့်ကြည့်လေ့လာသူ ဦးဝင်းနိုင်ကစံတော်ချိန်ဒစ်ဂျစ်တယ်သို့ပြောသည်။
နောက်ဆက်တွဲ ငလျင်လှုပ်ခတ်မှုများအနေဖြင့် မေ ၁၈ ရက်၊ ညနေ ၅ နာရီ ၄၈ မိနစ် ၂၇ စက္ကန့်တွင် မန္တလေးမြို့၏ မြောက်ဘက် ၁၃ မိုင်ခန့်အနက် ၁၈ ကီလိုမီတာကိုဗဟိုပြု၍ အင်အားရစ်ခ်တာစကေး ၃ ဒသမ ၁ အဆင့်ရှိငလျင်လှုပ်ခတ်ခဲ့သလိုမေလ ၁၇ ရက်၊ ည ၁၀ နာရီ ၂၄ မိနစ် ၄၈ စက္ကန့်တွင်လည်း- မြစ်သားမြို့၏ အနောက်တောင်ဘက်ခြောက်မိုင်ခန့် အနက် ၁၀ ကီလိုမီတာကိုဗဟိုပြု၍ အင်အားရစ်ခ်ျတာစကေး ၅ ဒသမ ၂ အဆင့်ရှိ ငလျင်တို့လှုပ်ခတ်ခဲ့သေးသည်။
သတင်း-အင်ကြင်း
