Begin Again - ဂီတထဲကဘဝ သို့မဟုတ် ဘဝထဲကဂီတ

ဂီတအနုပညာဟာ လူအမျိုးမျိုးပေါ်မှာ ခံစားပုံကြချင်း ကွဲပြားကြပြီး၊
နေ့စဥ် အသက်ရှူနိုင်ဖို့ လုပ်ရှားနေကြတဲ့ ဂီတပညာသည်တွေမှာဆိုရင် ပိုလို့တောင်ကွဲကြသေးတယ်။

- တချို့ ဂီတပညာသည်တွေက အနုပညာကို ဦးစားပေးတယ် — အရာရာထက် ပိုပြီးတော့ပေါ့။
- တချို့ကတော့ အောင်မြင်မှုတွေ၊ ဂုဏ်တွေ၊ ဆုတွေ၊ ပိုက်ဆံတွေကို ပိုရှေ့တန်းတင်ကြတယ်။
သူတို့ချစ်တဲ့ အနုပညာကို ခေါက်သိမ်းထားရမယ်ဆိုရင်လည်းပေါ့။

ဒီကားလေးကလည်း အဲ့လိုအမြင်မတူတဲ့ ဇာတ်လမ်းလေးကို တက်သစ်စ ဂီတဖန်တီးသီချင်းသူ နှစ်ဦးကြားက
ချစ်ခြင်း၊ မုန်းခြင်းတွေရယ်၊ ဂီတနဲ့နွယ်ပြီး ဖြစ်လာတဲ့ အဆိုတော်၊ သီချင်းရေးသူ၊ ထုတ်လုပ်ရေးသမားတို့ကြားက
ရီစရာ၊ ကြည်နူးစရာနဲ့ ဂီတအနုပညာနဲ့ ရှင်သန်နေကြတဲ့ ဘဝတွေအကြောင်း သေချာရိုက်ထားတဲ့ကားပါ။

Musical ရုပ်ရှင်ကိုမှ
- ဟာသလေးလည်း ပါမယ်၊
- ကြည်နူးရတာတွေလည်း ပါမယ်၊
- အကွဲအပြဲ Drama လည်း ပါမယ်၊
- အားတက်စရာ Motivational တွေလည်း ပါမယ်၊
- သင်ယူရတဲ့ ဂီတအနုပညာအကြောင်းတွေ ပါတယ်။

Plot လေးကလည်း လုံးဝပေါက်ကွဲထွက်၊ ငိုယိုရမယ့်ဟာမျိုး မဟုတ်ဘူး။
တဝါးဝါး ရီရမယ့် ဟာသကားလည်း မဟုတ်ဘူး။
ပလူးပလဲ ချစ်ပြမယ့်ကားလည်း မဟုတ်ဘူး။
ခံစားချက်ကို ဦးတည်ထားတာဗျ။

ဒါရိုက်တာ John Carney နဲ့ ဇာတ်ဝင်သီချင်းရေးတဲ့ Gregg Alexander တို့က
ဒီကားက သူတို့ဘဝနဲ့ ရောင်ပြန်ဟပ်လို့ —
နှစ်ယောက်ပေါင်းပြီး တယောက်က ဇာတ်ညွှန်း၊ တယောက်က ဇာတ်ဝင်တေး ပေါင်းလုပ်ထည့်လိုက်တဲ့ ကားကောင်းလေး။

ပြုံးပြီး ကြည့်ရတဲ့ အပိုင်းလေးက ငြိမ့်ပြီး ခေါ်သွားမယ်။
ဝမ်းနည်းရတဲ့ အပိုင်းလေးကလည်း အုံမှိုင်းနေတဲ့ ကောင်းကင်တစ်ခုလိုပဲ ဖြစ်ရမယ်။
ကြည်နူးချိန်လည်း ပါမယ်၊ ဝမ်းသာဝမ်းနည်းလည်း ပါပြီး၊

ဇာတ်အိမ်က သေချာထုတ်ပိုးထားတဲ့ ခေါက်ဆွဲကြော်တထုပ်လိုပဲ —
မဖြည်ရသေးဘူး၊ မွှေးတဲ့အနံ့က ရနေပြီ၊
ဖြည်ပြီးရင် အရသာကောင်းကောင်းနဲ့ တွယ်ရမယ့်ဟာမျိုးဗျာ။
ဥပမာပေးရင် ဗိုက်ဆာသွားပြီ။

ဒီကားလေးက Healing လည်း ဖြစ်တယ်ဗျ — တကယ်ပြောတာ။
အသဲကွဲနေတဲ့ လူတွေနဲ့ ဘဝလမ်းခရီး ပျောက်နေတဲ့လူတွေ၊
အိမ်ထောင်ရေး၊ သမီးရည်စားအရေး မပြေလည်တဲ့လူတွေအတွက်ရော၊
ဂီတကို အသက်မွှေးဝမ်းကြောင်းတစ်ခုလို ထားမယ့်လူတွေအတွက်ရော — တကယ်လိုအပ်နေတာကား။

ဂီတသမားတွေအတွက် ပိုကြည့်ရတာ ကိုက်တဲ့ကား။
မင်း မကြိုက်ပင်မဲ့ အောင်မြင်ရင်ပြီးရော — စင်ပေါ်တက်၊
Record Label က ထုတ်လုပ်သူတွေ ခိုင်းတာလေးတွေ တက်ဆို တက်ကမလား။
ဒါမှမဟုတ် မင်းကြိုက်တဲ့ပုံစံ၊ မင်းကြိုက်တဲ့ ဂီတကို
မင်းစနစ်အတိုင်း လမ်းဘေးမှာပဲ ဆိုမလား။
မင်း ဘာကိုရွေးမလဲ မေးမယ့်ကားပါ။

ဇာတ်ဝင်တေးတွေလည်း ပါပြီး —
"Lost Stars" အမည်ရှိ သီချင်းလေးဟာ 2015 မှာ
Best Original Song Oscar စာရင်းဝင်ခဲ့သေးပါတယ် ခင်မျာ။

Acting တွေကလည်း...
တောက်ပဖို့ အကူအညီလိုနေတဲ့ အနုပညာရှင်လေး Greta၊
မိသားစုနဲ့ ဂီတဘဝကြား ကြေကွဲပြိုလဲနေတဲ့ ထုတ်လုပ်သူ Dan တို့ရဲ့
အရောင်တောက်ရမယ့် ကြယ်လေးနှစ်ပွင့် — ကြိုးစားလိုက်ကြပုံကို သရုပ်ဖော်ထားတာ။

အချစ်တွေမပါဘဲ Friendship ကို သေချာလေး သရုပ်ဆောင်ထားကြတယ်။
တော်ပါပေတယ် Keira Knightley နဲ့ Mark Ruffalo။
Greta ရဲ့ အောင်မြင်သွားတဲ့ ဘဲ Dave အဖြစ်လည်း Adam Levine ပါဝင်ထားပြီး၊
သူ့ပါတဲ့ အခန်းက နည်းပင်မဲ့ မဆိုးပါဘူး — သီချင်းဆိုပေးထားသေးတယ်။

ခုလို မိုးအေးနဲ့ကာလမှာ ကြည့်ကောင်းမယ့် တကားမလို့ တင်ဆက်လိုက်ပါတယ် 🌧🎶🍿