ဘဝမှာ ဒရမ်မာ (Drama) ချိုးတဲ့အကျင့် နည်းလေလေ ပျော်ရွှင်ရလေလေပဲ ။ ဒရမ်မာချိုးတယ်ဆိုတာ ဘယ်လိုမျိုးကို ဆိုလိုတာလဲ ။ ကားပျက်တာလောက် ၊ ကော်ဖီခွက်မှောက်ကျတာလောက် ၊ ဆိုင်ကယ်ဘီးပေါက်သွားတာလောက်နဲ့ တစ်နေကုန် ကိုယ်ပဲ ကံအဆိုးဆုံး လူသားအဖြစ်နဲ့ နေတယ် ။ ကိုယ့်စိတ်ကို ပင်ပန်းစေတယ် ။ တခြားသူရှေ့ မှာ အဆင်မပြေမှုတွေကို ညည်းညူပြတာတွေက ဒရမ်မာချိုးတာပေါ့ ။
တစ်ခါတလေ ညည်းတာ ၊ ပေါက်ကွဲတာ ကိစ္စမရှိပေမဲ့ ကိစ္စ သေးသေးလေးကို ရင်နဲ့အမျှ ခံစားနေရင်တော့ မဟုတ်သေးဘူး ။ ဒရမ်မာခင်းတတ်တဲ့လူနဲ့ ပေါင်းသင်းရတာ ပျော်စရာ မကောင်းဘူး ။ Negative Energy တောင် ရနေဦးမယ် ။
ဒါကြောင့် ဘဝကို ပျော်ပျော်နေချင်ရင် ဒရမ်မာခင်းတာ လျှော့သင့်တယ် ။ ကိုယ့်အမှား လုံးဝမရှိတဲ့ပုံစံနဲ့ ကိုယ်ပဲ နစ်နာရသလို ၊ ကိုယ်ပဲ အဖြူစင်ဆုံး ၊ အတော်ဆုံး ၊ အထက်မြက်ဆုံး ၊ တစ်ခုခုဆို မျက်ရည်လွယ်ပြီး တစ်ဖက်သားကို လူဆိုးကြီးဖြစ်အောင် ဖန်တီးပေးခြင်း စတဲ့ ဒရမ်မာခင်းတာတွေကို လျှော့ချပါ ။
Drama ချိုးတဲ့အချိန်တွေအစား ဘဝတိုးတက်ရေးအတွက် ကြိုးစားရင် သိပ်ကို အကျိုးရှိမှာပါ ။ ဒရမ်မာနည်းတဲ့ဘဝက သင့်ကို ပိုပြီး smart ကျစေမယ် ။ ပိုပြီး ပျော်ရွှင်စေလိမ့်မယ် ။
