တရုတ်က DeepSeek သုံးပြီး တိုက်လေယာဉ်သစ် ဒီဇိုင်းထုတ်နေ
AI သုံးပြီး သင်္ချာတွက်ခိုင်းတဲ့ အဆင့်မဟုတ်တော့ဘူး။ အဆင့်မြင့် စစ်ဘက်သုံးရဟတ်ယာဉ် ဒီဇိုင်းဆွဲတဲ့နေရာမှာပါ AI သုံးတဲ့အဆင့် ရောက်လာပြီ။
တရုတ်က သူ့နိုင်ငံထုတ် DeepSeek ပလက်ဖောင်းကို သုံးပြီး စစ်လေယာဉ်သစ်တွေ ပုံစံထုတ်နေတယ်လို့ ဆိုပါတယ်။ လေယာဉ်ဒီဇိုင်းထုတ်တဲ့အထဲ ပါတဲ့ Shenyang လေယာဉ်ဒီဇိုင်းအင်စတီကျူ့ဒ်က ဦးဆောင်ဒီဇိုင်းပညာရှင် ဝမ် ယုန်ချင်က ပြောတာပါ။
ဝမ်ပြောပုံအရဆို AI နည်းပညာက အသုံးချဖို့အတွက် ခိုင်မာတဲ့အလားအလာတွေ ပြသနေပြီ ဖြစ်သလို နောင်တစ်ချိန် လေကြောင်းဘက်ဆိုင်ရာ သုတေသနနဲ့ ဖွံ့ဖြိုးမှုအတွက်ပါ ချဉ်းကပ်မှုသစ်တွေ စိတ်ကူးစိတ်သန်းသစ်တွေ ထုတ်ပေးနိုင်တယ်လို့ သိရပါတယ်။
ဒီပညာရှင်က ဆယ်စုနှစ် ၄ ခုကြာအောင် စစ်တပ်သုံး ဖိုက်တာဂျက်တွေကို ဒီဇိုင်းထုတ်ပေးခဲ့သူပါ။ ဝမ် ဒီဇိုင်းထုတ်ပေးခဲ့တဲ့အထဲမှာ နာမည်ကြီး ရေတပ်သုံး J-15 Flying Shark နဲ့ J-35 ကိုယ်ပျောက် တိုက်လေယာဉ်တွေ ပါပါတယ်။
AI က ပညာရှင်တွေကိုယ်စား ကရိကထများပြီး အချိန်ပေးရတဲ့ review tasks တွေ လုပ်ပေးတာဖြစ်လို့ ပိုအရေးကြီးတဲ့အလုပ်တွေကို သူ့အဖွဲ့သားတွေ ပိုအာရုံစိုက်နိုင်လာတယ်လို့လည်း ဝမ်က ပြောပါတယ်။
ကမ္ဘာ့ AI လောကကို ဗြောင်းဆန်သွားစေခဲ့တဲ့ deepSeek က အခုလည်း DeepSeek-R1 ရဲ့ အဆက် DeepSeek-R2 model ကို ထုတ်ဖို့လုပ်နေပါတယ်။ ဒီ model သစ် AI ကို ကွန်ရက်ခွဲလေးတွေအဖြစ် ပိုင်းပြီး အလုပ်တာဝန်ပေါင်းလုပ်ခိုင်းတဲ့ Mixture-of-experts (MoE) ဖွဲ့စည်းမှုနဲ့ ဖန်တီးထားပြီး ChatGPT -4o ထက် ၉၇.၃% ဈေးပိုသက်သာမယ်လို့ ပြောပါတယ်။
ဈေးသက်သာသလို performance မှာလည်း ChatGPT , Gemini နဲ့ Claude တို့ကို ယှဉ်နိုင်မယ်လို့ ပြောနေကြပါတယ်။ DeepSeek ရဲ့ R2 model က ဒီလထဲမှာ ချပြသွားမယ်လို့လည်း သတင်းထွက်ထားပါတယ်။