#နိုင်ငံတကာသတင်း
◼အမေရိကန်စစ်ဘက်ထိပ်တန်းအကျဆုံး အရာရှိကြီးများကို ကာကွယ်ရေးဝန်ကြီး ဟက်ဆက်ထုတ်ပယ်မည်
ကြယ်လေးပွင့်အရာရှိကြီးများ အရေအတွက်ကို ၂၀ ရာခိုင်နှုန်း လျှော့ချရန် အမေရိကန်ကာကွယ်ရေးဝန်ကြီး ပိဟက်ဆက် က အမိန့်ပေးလိုက်ပြီး သမ္မတဒေါ်နယ်ထရန့် ဒုတိယသက်တမ်းစတင်ချိန်၌ ကာကွယ်ရေးဝန်ကြီးဌာနအား လှုပ်ခတ်သွားစေခဲ့သော လျှော့ချဖြတ်တောက်မှုများအား ပိုမိုနက်ရှိုင်းအောင် လုပ်ဆောင်လိုက်သည်။
စစ်ဘက်တွင် ထိပ်တန်းအကျဆုံး အရာရှိကြီးများ များလွန်းအားကြီးနေသည်ဟု ဟက်ဆက် က ရှုမြင်ခဲ့ပြီး ကာလကြာ ဝေဖန်ခဲ့သူဖြစ်သည်။
ဒေါ်နယ်ထရန့်၏ အမျိုးသားလုံခြုံရေး အစီအစဉ်အား အကောင်အထည်ဖော်ရန်ကြိုးစားပြီး ခွဲခြားဆက်ဆံမှုဟု ၎င်းခေါ်ဝေါ်သော လူမျိုးနောက်ခံ ကွဲပြားစုံလင်မှု အစီအစဉ်များကို သုတ်သင်ပစ်ရန် ကြိုးစားရင်း ယခင်ဖောက်စ်သတင်းတင်ဆက်သူဟောင်း ဟက်ဆက်က ကာကွယ်ရေးဝန်ကြီးဌာနအား ပြန်လည်ပုံသွင်းရာ၌ လျှင်မြန်စွာလှုပ်ရှားခဲ့သည်။
အမျိုးသားအစောင့်တပ်ဖွဲ့မှ ဗိုလ်ချုပ်ကြီး အရေအတွက်အား အနည်းဆုံး ၂၀ ရာခိုင်နှုန်း လျှော့ချမှုရှိမည်ဖြစ်ကာ စစ်တပ်တစ်ခုလုံးအနေဖြင့် ဗိုလ်ချုပ်ကြီးနှင့်အခြားအဆင့် အရေအတွက် ၁၀ ရာခိုင်နှုန်း လျှော့ချသွားမည်ဖြစ်ကြောင်း ဌာနတွင်း အသိပေးချက်တွင် ဟက်ဆက် က ပြောကြားသည်။
“ ဗိုလ်ချုပ်ကြီးတွေနဲ့ ရေတပ်ဗိုလ်ချုပ်ကြီးတွေ ပိုရှိနေလို့ ပိုအောင်မြင်မှုရတဲ့ဆီ ဦးတည်မသွားပါဘူး။” ဟု ဟက်ဆက်က ဆိုရှယ်မီဒီယာ X ပေါ် တင်ထားသည့် ရုပ်သံ၌ ပြောကြားသည်။
ယင်းမှာ ထိပ်တန်းအရာရှိကြီးများအား ဒဏ်ခတ်ရန်ရည်ရွယ်သည့် ခုတ်ထွင် မီးရှို့သည့် လုပ်ရပ် မဟုတ်ကြောင်း၊ ယင်းသို့ပြောဆိုမှုများလောက်အမှန်တရားနှင့် ဝေးကွာသောအရာမရှိကြောင်း ဟက်ဆက်က ဆိုသည်။
ထိုသို့ ဖြုတ် ၊ ထုတ် မှုလုပ်ရန် ၎င်းအနေဖြင့် စစ်ဦးစီးချုပ်ရုံးနှင့် အတူတကွလုပ်ဆောင်ခဲ့ကြောင်း နှင့် ရည်ရွယ်ချက်မှာ မဟာဗျူဟာမြောက်အသင့်ရှိမှု ရရှိရန် ဖြစ်ကြောင်း ပြောသည်။
ဟက်ဆက်သည် ထရန့်အစိုးရအဖွဲ့တွင် ကာကွယ်ရေးဝန်ကြီးဖြစ်လာခဲ့ပြီးနောက် စစ်ဦးစီးချုပ်များဥက္ကဌ ၊ ရေတပ်ထိပ်တန်းဗိုလ်ချုပ်ကြီး နှင့် အမျိုးသားလုံခြုံရေးအေဂျင်စီ အကြီးအကဲတို့အား ထုတ်ပယ်ခဲ့သည်။
ဟက်ဆက်၏ အစီအစဉ်များအပေါ် သံသယရှိကြောင်း ရို့ဒ်ကျွန်းမှ အထက်လွှတ်တော်အမတ် ဂျက်ရိဒ် က ပြောကြားပြီး ဟက်ဆက်သည် စစ်ဘက်အရာရှိကြီးများအား အကြောင်းပြချက်ကောင်းမရှိဘဲ ထုတ်ပယ်သည့်ရာဇဝင်ရှိသူဖြစ်ကြောင်း ပြောသည်။
မိမိအနေဖြင့် ကာကွယ်ရေးဝန်ကြီးဌာနအား ပိုမို၍ စွမ်းဆောင်ရန်မြင့်မားစေရန် အမြဲတမ်းထောက်ခံခဲ့ကြောင်း သို့ရာတွင် ခက်ခဲသော လူပုဂ္ဂိုလ်ရေးရာ ဆုံးဖြတ်ချက်များအား အချက်အလက်များပေါ်တွင် အခြေခံ စဉ်းစားသင့်ပြီး ရာခိုင်နှုန်းဖြင့် သိမ်းကြုံး မဆုံးဖြတ်သင့်ကြောင်း အထက်လွှတ်တော် လက်နက်ကိုင်လုပ်ငန်းများကော်မတီ မှ ထိပ်တန်းဒီမိုကရက်ဖြစ်သူ ဂျက်ရိဒ် က ဆိုပါသည်။
ကျွမ်းကျင်မှုအများဆုံး၊ အတွေ့အကြုံအများဆုံးအရာရှိကြီးများအား အကြောင်းပြချက်ကောင်းမရှိဘဲ ဖယ်ရှားပစ်ခြင်းကြောင့် စစ်တပ်အား ပို၍ စွမ်းဆောင်ရည် မြင့်မားစေမည် မဟုတ်ဘဲ ချည့်နဲ့သွားစေနိုင်ကြောင်း ၎င်းက ဆက်လက်ပြောကြားသည်။
သတင်း-ရဲမင်း
ကိုးကား-Reuters
