နယူးဇီလန်မှာ ၁၆ နှစ်အောက်ရွယ်တွေကို ဆိုရှယ်မီဒီယာအသုံးပြုခွင့် ပိတ်ပင်ဖို့ ဝန်ကြီးချုပ် အဆိုပြု
ဝယ်လင်တန်၊ မေ-၆-၂၀၂၅
ရတီ(VOM)
နယူးဇီလန်နိုင်ငံမှာ အသက် ၁၆ နှစ်အောက်အရွယ်တွေကို ဆိုရှယ်မီဒီယာအသုံးပြုတာတွေကို ပိတ်ပင်ဖို့ စီစဉ်နေကြောင်း ဝန်ကြီးချုပ် ခရစ်တိုဖာက ပြောပါတယ်။
ဆိုရှယ်မီဒီယားတွေမှာ ကြမ်းတမ်းပြီး စိတ်အနှောက်အယှက်ဖြစ်ဖွယ် အကြောင်းအရာတွေ ပိုမိုများပြားလာပြီး ကမ္ဘာတဝန်းရှိ နည်းပညာဆိုင်ရာ ဘေးကင်းလုံခြုံရေး အဖွဲ့တွေကလည်း အွန်လိုင်း လုံခြုံရေးဆိုင်ရာတွေကို ပိုမိုသေချာစေဖို့ စည်းမျဉ်းတွေပြဌာန်းဖို့ ကြိုးပမ်းနေကြပါတယ်။
နိုင်ငံမှာ ၁၆ နှစ်အောက်အရွယ်တွေကို ဆိုရှယ်မီဒီယာ အသုံးပြုခွင့် မပေးဖို့အတွက် နည်းပညာကုမ္ပဏီတွေကို ဖိအားပေးသည့် ဥပဒေ ပြဌာန်းဖို့ စီစဉ်နေပြီး မလိုက်နာတဲ့ ကုမ္ပဏီများကို ဒေါ်လာ ၁ ဒဿမ ၂ သန်းဒဏ်ငွေရိုက်မယ့်အစီအစဉ်လည်း ဝန်ကြီးချုပ်ရဲ့ အဆိုပြုချက်ထဲမှာ ပါဝင်နေပါတယ်။
ဆိုရှယ်မီဒီယာတွေဟာ အလုံးစုံကောင်းမွန်နေခြင်းမဟုတ်ဘဲ လူငယ်တွေအတွက် အမြဲဘေးကင်းတဲ့ နေရာမဟုတ်ကြောင်း၊ အန္တရာယ်ရှိသော အကြောင်းအရာတွေ၊ ဆိုက်ဘာအနိုင်ကျင့်တာတွေနဲ့ ခေါင်းပုံဖြတ်တာတွေကနေ ကာကွယ်ဖို့ အချိန်ကျပြီလို့ ဝန်ကြီးချုပ်က ပြောပါတယ်။
ဥပဒေကြမ်းကို ပါလီမန်မှာ ဘယ်အချိန် ဆွေးနွေးအတည်ပြုမယ်ဆိုတာကို ရှင်းလင်းစွာမသိရပေမယ့် ထောက်ခံမှုရရှိဖို့ မျှော်လင့်ကြောင်း ဝန်ကြီးချုပ်ကပြောပါတယ်။ အဆိုပြုချက်ကို ဝန်ကြီးချုပ်ရဲ့ ဗဟိုလက်ယာယိမ်းပါတီက ရေးဆွဲခဲ့တာဖြစ်ပြီး ပြဌာန်းနိုင်ဖို့ ညွှန်ပေါင်းပါတီနှစ်ခုရဲ့ ထောက်ခံမှုလိုအပ်ပါတယ်။
နယူးဇီလန်ဟာ စာတတ်မြောက်မှုနှုန်းကျဆင်းနေတာကို မြှင့်တင်ဖို့ ကြိုးပမ်းနေတဲ့ နိုင်ငံတနိုင်ငံဖြစ်ပြီး စာသင်ကျောင်းတွေမှာ မိုဘိုင်းလ်ဖုန်း အသုံးပြုတာတွေကို ပြီးခဲ့တဲ့နှစ်က တားမြစ်ပိတ်ပင်ခဲ့ပါတယ်။
Ref:CNA
Photo:Getty Images