ပန်းမြိုင်လယ်က ဥယျာဉ်မှူး...တဲ့ ။ ဆရာ လယ်တွင်းသားစောချစ်ရဲ့ လက်ရာကောင်း တစ်ခုပါ ။ ကျွေးရွာတစ်ခုရဲ့ အလယ်တန်းကျောင်းကို တာဝန်ကျရောက်ရှိသွားတဲ့ ကျောင်းဆရာတစ်ယောက်ရဲ့ ဖြစ်ပုံပျက်ပုံတွေကိုရေးသားခြယ်မှုန်းထားတဲ့ ဝတ္ထုဇာတ်လမ်းလေး တစ်ပုဒ်ပါ ။
ကျောင်းဆရာရဲ့ နာမည်က ငြိမ်းချမ်းပါ ။ သူက ကျောင်းဆရာအလုပ် ရရချင်းမှာပဲ တာဝန်ခံအလယ်တန်းကျောင်းအုပ်အနေနဲ့ နယ်ကျောင်းတစ်ခုမှာ တာဝန်ကျပါတယ် ။
ကျောင်းကလေးက အဖက်ဖက်မှာ ချွတ်ခြုံကျနေပြီး မြေဖြူတောင် အလုံအလောက်မရှိတဲ့ စာသင်ကျောင်းကလေး ။ ဆရာ၊ ဆရာမ အင်အားကလည်း မလုံလောက် ။ ကျောင်းသားတွေကိုလည်းမထိန်းနိုင် ။ တက်ချင်တဲ့အချိန်တက်ပြီး ဆင်းချင်တဲ့အချိန် ဆင်းနေတဲ့ စာသင်ကျောင်းကလေးပါပဲ ။
ရုပ်ပိုင်းဆိုင်ရာရော စိတ်ပိုင်းဆိုင်ရာပါ ချွတ်ခြုံကျနေပြီး မူလတန်း အဆင့်ကိုတောင် ကောင်းကောင်း မလည်ပတ်နိုင်သေးတဲ့ အလယ်တန်းကျောင်း တစ်ခုပါပဲ ။
အဲ့သလို အစစအရာရာ နိမ့်ပါးနေတဲ့ စာသင်ကျောင်းကလေးကို အလယ်တန်းကျောင်းဆိုတဲ့ ဂုဏ်ပုဒ်နဲ့
ညီလာအောင် အလုပ်ဝင်ခါစ ကျောင်းဆရာ တစ်ယောက်
ဘယ်လိုမွမ်းမံတယ် ၊ ဘယ်လို ပြုပြင်တယ် ၊ ဘယ်လိုတည်ဆောက်တယ်ဆိုတာကို အရေးအသားရိုးရိုးလေးတွေနဲ့ ဇာတ်လမ်းနဲ့အတူ စီးမြော သက်ဝင်လာအောင် ဆွဲခေါ်သွားနိုင်တဲ့ ဝတ္ထုကောင်းတစ်ပုဒ်ပါပဲ ။
ရိုးရိုး ယဉ်ယဉ်လေးနဲ့ ဆွဲဆောင်မှုရှိတဲ့ မိန်းကလေး
တစ်ယောက်လို ဒီစာအုပ်ကလည်း အရေးအသားရိုးရိုးလေးနဲ့ ဆွဲဆောင်မှုရှိနေပါတယ် ။
အရေးအသား နဲ့ ရသ ၊ သုတ
ဝတ္ထုဖတ်ရင်းနဲ့ ဝမ်းနည်းမိ ၊ ဝမ်းသာမိ ၊ ဒေါသထွက်မိ ၊ ကြည်နူးမိ ။ ခံစားချက်ပေါင်းစုံပါပဲ ။ အအီပြေ ဟာသကလေးလည်း ပါလိုက်သေး ။
ဇာတ်သိမ်းပိုင်းကတော့ အထိဆုံးပါပဲ တစ်လျှောက်လုံး....
အောင့်လာခဲ့သမျှ မျက်ရည်တွေက ဇာတ်သိမ်ပိုင်းမှာ ကျတော့တာပါပဲ ။
(စာရေးဆရာက မျက်ရည်အတော်ခိုင်တဲ့ ကျွန်တော့်ကိုလည်း အလွတ်ပေးချင်ပုံ မရပါဘူး။)
ရသတင်ပဲလား...? မဟုတ်ပါဘူး။
ကျေးလက်သဘာဝနဲ့ တခြား ဗဟုသုတွေ၊ အတုယူစရာတွေကိုလည်း (အတုံးလိုက် အတစ်လိုက်မဟုတ်ဘဲ)
ပြေပြေပြစ်ပြစ်ကလေးနဲ့ ရင်ထဲရောက်အာင် ရေးဖွဲ့ထားနိုင်ပါတယ်။
🛑 ဘာ့ကြောင့်ဖတ်စေချင်တာလဲ
စာက ရှည်တယ် ဆိုတဲ့ အနေအထားကိုတော့ ရောက်နေပါပြီ။ ဒါပေမဲ့ ဒီစာအုပ်ကို ဖတ်ဖို့အတွက် ဘာ့ကြောင့်
ဆွဲဆောင်နေရတယ်ဆိုတာလေးကို ပြောခဲ့ပါရစေ။
ကျွန်တော်က အခြေခံပညာကျောင်းတွေကို တန်ဖိုးထားတယ်။ ချစ်လည်း ချစ်တယ်။ အခြေခံကျောင်းတွေက
လူ့အဖွဲ့အစည်းကိုပုံဖော် ပြုပြင်နိုင်တယ် လို့ ကျွန်တော်ယုံကြည်တယ်။
အနာဂတ်ရဲ့ ကြယ်ပွင့်လေးတွေက သူတို့လက်ထဲမှာလေ။ အရောင်တောက်မလား၊ အရောင်မှိန်မလား ဆိုတာကို အခြေခံပညာကျောင်းတွေက အများကြီး အဆုံးအဖြတ်
ပေးနိုင်တယ်လို့ မြင်တယ်။
🛑 ''စာသင်ကျောင်းဆိုတာ စာကိုပဲ
သင်တာမဟုတ်...
စိတ်ကိုပါ သင်ပေးရတယ်" တဲ့။
ဒီဝတ္ထုက ဖြစ်ရပ်မှန်ကို အခြေခံထားတဲ့ ဝတ္ထုပါ။
စာအုပ်ထဲက နည်းနာတွေက စိတ်ကူးယဥ်မဟုတ်။ တကယ်လုပ်ခဲ့တဲ့...တကယ့်နည်းတွေပါ။ တကယ်လည်း အောင်မြင်ခဲ့ပါတယ်။
"စာကိုရော စိတ်ကိုရော အောင်အောင်မြင်မြင်သင်ကြားပေးနိုင်တဲ့ ကျောင်းတစ်ခု ဖြစ်အောင် ဘယ်လိုလုပ်မလဲ'' ဆိုတဲ့ မေးခွန်းကို အဖြေရှာနိုင်ဖို့ ဒီစာအုပ်က အများကြီး အထောက်အပံ့ပေးနိုင်ပါတယ်။
နောက်ပြီး...
ကျွန်တော်တို့ မိဘတွေနေရာရောက်လာရင် ကိုယ့်သားသမီးတွေကို စာရော စိတ်ရော သင်ပေးနေတဲ့ ဆရာ၊ဆရာမတွေကို ဘယ်လို ပူးပေါင်းကူညီနိုင်သလဲ...အနှောင့်အယှက်မဖြစ်အောင် ဘယ်လိုနေပေးရမလဲ ?
ကျွန်တော်တို့ ရပ်ထဲရွာထဲမှာ ဦးဆောင်သူဖြစ်လာရင်ရော ဘယ်လို ကူညီကြမလဲ ?
ကျွန်တော်ကတော့ ဒီစာအုပ်ဖတ်ရင်း အဲ့မေးခွန်းတွေအတွက် အဖြေရှာနိုင်ခဲ့ပါတယ်။
🛑 ဒါကြောင့်မို့လို ဒီစာအုပ်ကို တခြားလူတွေ
ဖတ်ကြရင် အကျိုးရှိကြမှာပဲဆိုတဲ့
စေတနာစိတ် အရငး်ခံလေးနဲ့
ခုလို စာအရှည်ကြီး ရေးခဲ့မိတာပါ😁။
ဒီအညွှန်းလေးကိုဖတ်ပြီး ဒီစာအုပ်ကို စိတ်ဝင်စားသွားတယ်၊ ဖတ်ဖြစ်သွားတယ်ဆိုရင် ကျွန်တော် ရေးရကျိုးနပ်ပါပြီ။
( ဆရာလယ်တွင်းသားစောချစ်သည် ဤ ပန်းမြိုင်လယ်က ဥယျာဥ်မှူးစာအုပ်ကို ၁၉၇၈ ခုနှစ်တွင်ရေးသား၍ စာပေဗိမာန်စာမူဆုပြိုင်ပွဲသို့ ပေးပို့ရာ စာပဒေသာ ပထမဆုရရှိခဲ့ပါသည်။ ၁၉၈၀ ပြည့်နှစ်တွင် စာပေဗိမာန်မှ စာအုပ်အဖြစ်ထုတ်ဝေခဲ့ရာတွင် ၁၉၈၀ ပြည့်နှစ်အတွက် အမျိုးသားစာပေဆုကို ရရှိခဲ့ပြန်ပါသည်။)
Review by Ko Ye Naing
#ပန်းမြိုင်လယ်မှဥယျာဥ်မှူး
#ဆရာလယ်တွင်းသားစောချစ်
