တရုတ်ကို ဒေတာပြန်ပို့လို့ TikTok သန်း ၆၀၀ ကျော် ဒဏ်ရိုက်ခံရ
သုံးစွဲသူအချက်အလက် ကာကွယ်ရေးမှာ EU က တော်တော်ဥပဒေကောင်းတယ်။
GDPR ဆိုတဲ့ အထွေထွေအချက်အလက် ကာကွယ်ရေးစည်းမျဉ်း ဆွဲပြီး ကာကွယ်တာပါ။ ချိုးဖောက်တာ တွေ့ရင် ရှယ်ပလန်နဲ့ ဒဏ်ရိုက်ပါတယ်။ အခုလည်း EU ကိုယ်စား အိုင်းရစ်အချက်အလက်ကာကွယ်ရေးကော်မရှင် DPC က TikTok ကို ယူရိုသန်း ၅၃၀ (ဒေါ်လာ ၆၀၂ သန်း) အထိ ဒဏ်တပ်လိုက်ပါတယ်။
EU မှာ social media ပလက်ဖောင်းတွေ ဒဏ်ရိုက်ခံရရင် အိုင်ယာလန် DPC လက်ချက်က များတယ်။ အခုက TikTok အတွက် ဒုတိယအကြိမ် ဒဏ်အကြီးကြီး ရိုက်ခံလိုက်ရတာပါ။ အရင်တစ်ခေါက် ၂၀၂၃ ကလည်း အိုင်ယာလန် DPC က TikTok ကို ကလေးသူငယ်အချက်အလက်ကိုင်တွယ်မှုက ဥရောပဥပဒေနဲ့ မညီလို့ ဆိုပြီး ယူရို ၃၄၅ သန်း ဒဏ်ရိုက်ထားတာပါ။
အခုတစ်ခေါက်က ဥရောပစီးပွားရေးဧရိယာ EEA က TikTok users တွေရဲ့ အချက်အလက်ကို တရုတ်ဆီ လွှဲပေးလို့ဆိုပြီး ဒဏ်ရိုက်တာ ဖြစ်ပါတယ်။ ဒီလို အချက်အလက် လွှဲပေးတဲ့အကြောင်းလည်း ပွင့်လင်းမြင်သာအောင် ချပြပေးတာ မရှိဘူးလို့ ဆိုပါတယ်။
အစပိုင်းမှာ TikTok က တရုတ်မှာရှိတဲ့ ဆာဗာတွေဆီ EEA users အချက်အလက်တွေ သိမ်းတာမျိုး မရှိဘူးလို့ ပြောခဲ့ပေမယ့် နောက်ပိုင်းမှာ အတိုင်းအတာအကန့်အသတ်နဲ့ သိမ်းတာမျိုးတော့ ရှိတယ်ဆိုပြီး ဝန်ခံတာ ရှိပါတယ်။ အခု အဲ့ဒီအချက်အလက်တွေ ဖျက်ပစ်တယ်လို့ DPC ကို TikTok က အသိပေးထားပါတယ်။
TikTok ကတော့ EU ဒဏ်ငွေတပ်မှုကို အယူခံဝင်ဖို့ ရှိပြီး ဥရောပအသုံးပြုသူအချက်အလက်တွေအတွက် တရုတ်အာဏာပိုင်တွေက တောင်းဆိုမှု ဘယ်တုန်းကမှ မရခဲ့ဖူးဘူးလို့ ငြင်းထားပါတယ်။