#ယနေ့ထုတ်သတင်းစာ_နိုင်ငံတကာသတင်း
◼ ဂျပန်ဝန်ကြီးချုပ်နှင့် ကနေဒါဝန်ကြီးချုပ်တို့ ကုန်သွယ်ရေးကိစ္စ ဖုန်းခေါ်ဆိုဆွေးနွေး
ဂျပန်ဝန်ကြီးချုပ် အီရှီဘာသည် ကနေဒါဝန်ကြီးချုပ် မက်ခ်ကာနေးနှင့် တယ်လီဖုန်းဆက်သွယ်ပြီး အမေရိကန်သမ္မတ ဒေါ်နယ်ထရန့်၏ အခွန်ကောက်ခံမှုများနှင့် ပေါ်ထွက်လာနိုင်သော စီးပွားရေးသက်ရောက်မှုများကို ဆွေးနွေးခဲ့ကြောင်း တာဝန်ရှိသူများက မေ ၂ ရက်တွင် ပြောသည်။
မိနစ် ၃ဝ ကြာတယ်လီဖုန်းဆက်သွယ်ဆွေးနွေးမှုတွင် ကနေဒါ ရွေးကောက်ပွဲ၌ ကာနေး၏ပါတီအနိုင်ရရှိမှုအတွက် ဝမ်းမြောက်ကြောင်း ဂျပန်ဝန်ကြီးချုပ်ကပြောဆိုခဲ့ပြီး နိုင်ငံတကာစိန်ခေါ်မှုများကို ရင်ဆိုင်ဖြေရှင်းရာတွင် ပူးပေါင်းဆောင်ရွက်သွားမည်ဖြစ်ကြောင်း ၎င်းတို့ကသဘောတူခဲ့သည်။
ကနေဒါသည်ဂျီ-၇ အဖွဲ့၏ ယခုနှစ်အလှည့်ကျဥက္ကဋ္ဌဖြစ်သည်။ ဂျပန်နှင့်အမေရိကန်တို့အကြား ဒုတိယအကျော့ ကုန်သွယ်ရေးဆွေးနွေးပွဲအပြီးတွင် ကနေဒါနှင့်ဂျပန်ဝန်ကြီးချုပ်တို့ ဆွေးနွေးမှု ထွက်ပေါ်လာခြင်းဖြစ်သည်။
ဂျပန်စီးပွားရေး ပြန်လည်ထူထောင်ရေးဝန်ကြီး အကာဇာဝါသည် အမေရိကန်ဘဏ္ဍာရေးဝန်ကြီး စကော့ဘက်ဆန့် အပါအဝင် တာဝန်ရှိသူများနှင့် ဝါရှင်တန်တွင် မေ ၁ ရက်က တွေ့ဆုံခဲ့ပြီး မေလလယ် သို့မဟုတ်နှောင်းပိုင်းတွင် နောက်ထပ် ဆွေးနွေးပွဲပြုလုပ်ရန် သဘောတူခဲ့သည်။
စည်းကြပ်ခွန်များကိုပြန်လည်သုံးသပ်ရန် အမေရိကန်ကို အလေးအနက် တိုက်တွန်းခဲ့ကြောင်း အကာဇာဝါကပြောသည်။ နှစ်ဖက်အကြား စေ့စပ်ညှိနှိုင်းမှုများ အရှိန်မြှင့်ရန်နှင့်လာမည့်လတွင် သဘောတူညီချက်တစ်ရပ် ရရှိရန် မျှော်လင့်ကြောင်း ၎င်းက သတင်းထောက်များကို ပြောသည်။
အင်န်အိတ်ချ်ကေ
