#ပြည်တွင်းသတင်း
◼အငြိမ်းစားပါမောက္ခအမျိုးသမီးအား လုယက်သတ်ဖြတ်ခဲ့သူကို ဖမ်းဆီးရမိဟု နစက ထုတ်ပြန်
မန္တလေးတိုင်း၊ ပုသိမ်ကြီးမြို့နယ်၌ အငြိမ်းစားပါမောက္ခအမျိုးသမီးအား လုယက်သတ်ဖြတ်ခဲ့သူကို ဖမ်းဆီးရမိခဲ့ကြောင်း နစကမှ ယနေ့ (မေ ၂ ရက်)နေ့တွင် နိုင်ငံပိုင်သတင်းစာ၌ ထုတ်ပြန်ခဲ့သည်။
ပြီးခဲ့သည် ဧပြီ ၂၇ ရက် နံနက် ၇ နာရီခန့်တွင် ပုသိမ်ကြီးမြို့နယ်၊ရေထွက်ကျေးရွာရှိ လူနေထိုင်ခြင်းမရှိသည့် တစ်ထပ်တိုက်အတွင်း အမျိုးသမီးတစ်ဦးသည် နဖူးပြတ်ရှဒဏ်ရာဖြင့် သွေးအိုင်အတွင်း ပုပ်ပွသေဆုံးနေသည်ကိုတွေ့ရကြောင်းသတင်းရရှိ၍ မြို့မရဲစခန်းမှ သွားရောက်စစ်ဆေးခဲ့ပြီး ပုသိမ်ကြီးမြို့မရဲစခန်း၌ (ပ)၇၈/၂၀၂၅၊ရာဇသတ်ကြီးပုဒ်မ - ၃၀၂ ဖြင့် အမှုဖွင့်ခဲ့ကြောင်းသိရသည်။
အသတ်ခံရသူအမျိုးသမီးမှာ ပုသိမ်ကြီးမြို့နယ်၊ ရေထွက်ကျေးရွာ၊မင်္ဂလာ ရန်ကင်းအိမ်ရာ (အငြိမ်းစားအိမ်ရာ)၊တိုက်အမှတ်(C-16) ၌ တစ်ဦးတည်းနေထိုင်သူ အသက် ၆၆ နှစ်အရွယ်ရှိ အငြိမ်းစားပါမောက္ခ ဒေါ်ထွေးထွေးဆိုသူဖြစ်ပြီး အိမ်ခြံမြေအရောင်းအဝယ် လုပ်ငန်းလုပ်ကိုင်သူဖြစ်သည်။
ပြီးခဲ့သည့် (ဧပြီ ၂၅ ရက်)မွန်းလွဲ ၁၂ နာရီ ၃၀ မိနစ်ခန့်တွင် ပုသိမ်ကြီးမြို့နယ်၊ရေထွက်ကျေးရွာ နှင့် နှမ်းကြဲကျေးရွာအကြားရှိ ၎င်းပိုင်ဆိုင်သည့် မြေကွက်အား ပြစ်မှုကျုးလွန်ခဲ့သူ စိုင်းထွန်းနော် (ခ)ကိုစိုင်း(ခ)ငြိမ်းချမ်းဖြိုး(ခ)ကိုဖြိုး နှင့်အတူ အရောင်းအဝယ်ပြုလုပ်ရန်ပြသစဉ် အရောင်းအဝယ်မတည့်သဖြင့် စကားများရာမှ ဒေါ်ထွေးထွေးအား လည်ပင်းညှစ်၍ ဦးခေါင်းကို အုတ်နီခဲဖြင့် နှစ်ချက်ထုခဲ့ကြောင်း၊ထို့နောက် သေဆုံးသူ၏ Belta အမျိုးအစား (ခဲရောင်)ယာဉ် နှင့် အဆိုပါ မော်တော်ယာဉ်အတွင်းမှ ရွှေထည်ပစ္စည်းများ နှင့် ငွေကျပ် သိန်း ၅၀ ကိုယူဆောင်ထွက်ပြေးခဲ့ခြင်းဖြစ်ကြောင်း ထုတ်ပြန်ချက်အရသိရသည်။
ပြစ်မှုကျူးလွန်သူအား ဖမ်းဆီးရမိရေးအတွက် ထပ်မံစုံစမ်းခဲ့ရာ ၎င်းမှာ မိသားစုနှင့်အတူ ရှမ်းပြည်နယ်(တောင်ပိုင်း)တောင်ကြီးမြို့သို့ထွက်ခွာသွားကြောင်းသတင်းရရှိ၍ ရှမ်းပြည်နယ် ရဲတပ်ဖွဲ့နှင့် ပူးပေါင်း၍ မေ ၁ ရက် နံနက်ပိုင်းတွင် ဟဲဟိုးမြို့ရှိ တည်းခိုးခန်းတစ်ခု၌ သက်သေခံပစ္စည်းများနှင့်အတူ ဖမ်းဆီးရမိခဲ့ခြင်းဖြစ်ကြောင်း ထုတ်ပြန်ထားသည်။
အဆိုပါ ပြစ်မှုကျူးလွန်အား ဥပဒေနှင့်အညီ ထိရောက်စွာအပြစ်ပေးနိုင်ရန် ဆက်လက်ဆောင်ရွက်လျက်ရှိကြောင်း ထုတ်ပြန်ချက်အရသိရသည်။
သတင်း-အင်ကြင်း
