စံချိန်စံညွှန်းများအတိုင်း ဆောက်လုပ်ခဲ့ခြင်းမရှိသဖြင့် ငလျင်ကြောင့် ပေးဆပ်မှုကြီးမားခဲ့ရဟု နစကဥက္ကဋ္ဌပြော
ရန်ကုန်၊ ဧပြီ ၉
ဆောက်လုပ်ရေးပိုင်းဆိုင်ရာ တာဝန်ရှိသူတွေအနေနဲ့ သတ်မှတ်ထားတဲ့ စံချိန်စံညွှန်းတွေအတိုင်း ဆောက်လုပ်ခဲ့ခြင်းမရှိလို့ ငလျင်ကြောင့် ပေးဆပ်မှုတန်ဖိုးတွေ ကြီးမားခဲ့ရခြင်းဖြစ်ကြောင်း နစကဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်က ပြောပါတယ်။
မနေ့က နေပြည်တော်ပြည်သူ့ဆေးရုံကြီး (ခုတင်-၃၀၀) ရှိ ဆေးကုသဆောင်တွေနဲ့ ဝန်ထမ်းအိမ်ရာတွေမှာ မန္တလေးငလျင်ကြီးလှုပ်ခတ်မှုဖြစ်ပွားစဉ် ထိခိုက်ပျက်စီးခဲ့ရမှုများကို သွားရောက်ကြည့်ရှုရင်း အထက်ပါအတိုင်း ပြောကြားခဲ့တာပါ။
ထိခိုက်ပျက်စီးခဲ့မှုတွေကို ဆောက်လုပ်ရေးပညာရှင်တွေနဲ့ စနစ်တကျစစ်ဆေးပြီး ပြုပြင်လို့ ရနိုင်တဲ့ အဆောက်အဦတွေကို ပြန်လည်ပြုပြင်ခြင်း၊ ပြုပြင်၍မရနိုင်တဲ့ အန္တရာယ်ရှိ အဆောက်အဦတွေကို ဖြိုချဖျက်ဆီးကာ အသစ်ပြန်လည်တည်ဆောက်ဖို့ ညွှန်ကြားခဲ့ပါတယ်။
အဆောက်အဦတွေ ဆောက်လုပ်ရာမှာ တာဝန်ခံအင်ဂျင်နီယာတွေ၊ ပြန်လည်ပြုပြင်ရေးလုပ်ငန်းတွေရဲ့ ရေ/မီးပိုင်းဆိုင်ရာ တာဝန်ခံများအနေနဲ့ အချင်းချင်းပေါင်းစပ်ညှိနှိုင်းပြီး ဖြစ်ပေါ်လာနိုင်မယ့် သဘာဝဘေးဒဏ်ခံနိုင်ရေးအတွက်လည်း ထည့်သွင်းတွက်ချက်ဆောက်လုပ်သွားဖို့ တိုက်တွန်းထားပါတယ်။
