တောင်ကိုရီးယားက မြန်မာကို ဒေါ်လာ ၂ သန်းတန်ဖိုးရှိ အကူအညီများ ပေးအပ်မည်
မတ် ၂၉၊ ဆိုးလ် / The Korea Herald
တောင်ကိုရီးယားအစိုးရက မြန်မာနိုင်ငံကို အမေရိကန်ဒေါ်လာ ၂ သန်း တန်ဖိုးရှိတဲ့ လူသားချင်းစာနာထောက်ထားမှုဆိုင်ရာ အကူအညီတွေ ပေးအပ်သွားမယ်လို့ သိရပါတယ်။
ယခုသီတင်းပတ်အစောပိုင်းက ငလျင်လှုပ်ခတ်မှုဒဏ်ခံခဲ့ရတဲ့ မြန်မာပြည်သူတွေထံ အဆိုပါ အကူအညီတွေ ပေးအပ်သွားဖို့ စီစဉ်နေတယ်လို့ တောင်ကိုရီးယားနိုင်ငံခြားရေးဝန်ကြီးဌာနက စနေနေ့မှာ ပြောကြားခဲ့ပါတယ်။
“မြန်မာနိုင်ငံက ငလျင်ကြောင့် ပျက်စီးဆုံးရှုံးမှုတွေကို မြန်မြန်ဆန်ဆန် တုံ့ပြန်ကူညီဖို့ နိုင်ငံတကာအဖွဲ့အစည်းကတစ်ဆင့် လူသားချင်းစာနာ ထောက်ထားမှုအကူအညီ ဒေါ်လာ ၂ သန်းလောက် ပံ့ပိုးပေးဖို့ ဆုံးဖြတ်ထားပါတယ်”လို့ ဆိုပါတယ်။
အရှေ့တောင်အာရှနိုင်ငံတွေရဲ့ အခြေအနေပေါ်မူတည်ပြီး လိုအပ်ရင် ထပ်လောင်းအကူအညီတွေကို ပေးအပ်နိုင်ရေး ပြန်လည်သုံးသပ်သွားမယ်လို့ ဝန်ကြီးဌာနက ပြောပါတယ်။
သောကြာနေ့က ရစ်(ခ်)တာစကေး ၇.၇ အဆင့်ရှိတဲ့ အင်အားပြင်း ငလျင်တစ်ခုနဲ့ ၆.၄ အဆင့်ရှိ နောက်ဆက်တွဲငလျင်တစ်ခု လှုပ်ခတ်ခဲ့ရာ မြန်မာနိုင်ငံနဲ့ အိမ်နီးချင်း ထိုင်းနိုင်ငံတို့မှာ လှုပ်ခတ်သွားခဲ့ရာ လူပေါင်း ၁၀၀၀ ကျော် သေဆုံးခဲ့ကြောင်း နိုင်ငံခြားသတင်းဌာနတွေရဲ့ ဖော်ပြချက်အရ သိရပါတယ်။
လက်ရှိမှာ ငလျင်ဒဏ်သင့် နေရာတွေမှာ ရှာဖွေကယ်ဆယ်ရေးတွေ ပြုလုပ်လျက်ရှိပြီး အေ-သအပျောက်ဦးရေ တိုးလာမှာကို စိုးရိမ်နေကြပါတယ်။
