ငလျင်လှုပ်ပြီးတဲ့နောက်မှာ ပိုပြီးအရေးကြီးတဲ့ ဘာတွေဆက်လုပ်ရမလဲ၊ ဘယ်လိုအန္တရာယ်တွေကို ရှောင်ရှားမလဲဆိုတာကို ရေးပေးလိုက်ပါတယ်။
(၁) ကိုယ့်ရဲ့ပတ်ဝန်းကျင်ကို စူးစမ်းလေ့လာပါ။
ငလျင်တိတ်သွားပြီဆိုတာနဲ့ ပထမဆုံးလုပ်ရမှာက ကိုယ့်ကိုယ်ကိုရော၊ ပတ်ဝန်းကျင်ကိုပါ အကဲဖြတ်ဖို့ပါပဲ။
⭕ ကိုယ်ရော မိသားစုဝင်တွေပါ ထိခိုက်ဒဏ်ရာရတာတွေ ရှိမရှိ သေချာကြည့်ပါ။ အရေးပေါ်အကူအညီလိုရင် ချက်ချင်းဖုန်းခေါ်ပါ။
⭕ အက်ကြောင်းတွေ၊ ပျက်စီးနေတဲ့နေရာတွေ၊ ပြိုကျနိုင်တဲ့ အပိုင်းအစတွေရှိမရှိ သတိထားပါ။ အန္တရာယ်များပုံပေါ်ရင် အဲ့ဒီအဆောက်အအုံထဲကို လုံးဝမဝင်ပါနဲ့။
⭕ ဓာတ်ငွေ့နံ့ရရင် ချက်ချင်းအဆောက်အအုံပြင်ပကို ထွက်ပါ။ မီးဖွင့်တာ၊ မီးခြစ်တာမျိုးတွေ လုံးဝမလုပ်ပါနဲ့။ ပြီးမှ သက်ဆိုင်ရာကို ဖုန်းဆက်အကြောင်းကြားပါ။
⭕ မီးပွားတွေထွက်တာ၊ ဝါယာရှော့ဖြစ်တာ၊ မီးခိုးတွေထွက်တာ တွေ့ရင် Main Switch ကို ချက်ချင်းပိတ်ပါ။ ရေတွေနဲ့ ဝါယာတွေကို မထိတွေ့ပါစေနဲ့။
(၂) သတင်းအချက်အလက်ကို ရယူပါ
⭕ နောက်ဆက်တွဲအခြေအနေတွေကို သိရှိနိုင်ဖို့အတွက် သတင်းအချက်အလက်တွေ ရယူဖို့ အရမ်းအရေးကြီးပါတယ်။
⭕ နောက်ဆုံးရသတင်းတွေ၊ အရေးပေါ်အခြေအနေဆိုင်ရာ ကြေညာချက်တွေ၊ နောက်ဆက်တွဲငလျင်သတင်းတွေကို နားထောင်ဖို့/ကြည့်ရှုဖို့ လိုအပ်ပါတယ်။ တရားဝင်သတင်းဌာနတွေကနေ ထုတ်လွှင့်တဲ့ သတင်းတွေကိုပဲ အတည်ယူပါ။
⭕ သတင်းအမှားတွေ၊ ကောလဟာလတွေ အလွယ်တကူပျံ့နှံ့နိုင်တာကြောင့် သတိထားပါ။ တရားဝင်သတင်းရင်းမြစ်တွေကနေ ရတဲ့အချက်အလက်တွေကိုပဲ မျှဝေပါ။
⭕ ဒေသအာဏာပိုင်တွေနဲ့ ကယ်ဆယ်ရေးအဖွဲ့အစည်းတွေရဲ့ ညွှန်ကြားချက်တွေကို တိတိကျကျ လိုက်နာပါ။
(၃) နောက်ဆက်တွဲငလျင်အတွက် ပြင်ဆင်ထားပါ။
⭕ ငလျင်အသေးစားတွေ ဆက်တိုက်လှုပ်နိုင်တာကြောင့် ကိုယ့်ရဲ့လုံခြုံရေးအတွက် ကြိုတင်ပြင်ဆင်ထားဖို့ လိုအပ်ပါတယ်။
⭕ အိမ်ထဲမှာဆိုရင် ခိုင်ခံ့တဲ့ စားပွဲအောက်၊ တံခါးပေါက် ဒါမှမဟုတ် အပြင်နံရံနားမှာနေပါ။ အပြင်မှာဆိုရင် အဆောက်အအုံတွေ၊ သစ်ပင်တွေနဲ့ ဝေးဝေးမှာနေပါ။
⭕ ရေ၊ အစားအစာ၊ ဓာတ်မီး၊ ရေဒီယို၊ ဘက်ထရီနဲ့ အရေးကြီးစာရွက်စာတမ်းတွေကို အလွယ်တကူယူလို့ရအောင် စုစည်းထားပါ။
(၄) အခြားအန္တရာယ်တွေကို သတိပြုပါ။
ငလျင်ကြောင့် တခြားအန္တရာယ်တွေလည်း ဖြစ်ပေါ်နိုင်တာမို့ သတိထားရပါမယ်။
⭕ ကမ်းရိုးတန်းဒေသတွေမှာ နေထိုင်သူတွေအနေနဲ့ ငလျင်လှုပ်ပြီးရင် ဆူနာမီအန္တရာယ်ကို အထူးဂရုပြုပါ။ သတိပေးချက်ရတာနဲ့ ကုန်းမြင့်ပိုင်းကို ချက်ချင်းရွှေ့ပြောင်းပါ။
⭕ တောင်စောင်းတွေနဲ့ မြေပြိုနိုင်တဲ့နေရာတွေမှာ သွားလာတာကို ရှောင်ကြဉ်ပါ။
⭕ ရေကာတာတွေ ပျက်စီးနိုင်တာကြောင့် ရေကြီးနိုင်တဲ့အန္တရာယ်ကိုလည်း သတိပြုပါ။
(၅) အချင်းချင်း ကူညီပေးကြပါ။
ဒီလိုအချိန်မျိုးမှာ လူသားချင်းစာနာထောက်ထားတဲ့စိတ်နဲ့ အကူအညီပေးဖို့ အရေးကြီးပါတယ်။
⭕ သင့်ရဲ့အိမ်နီးချင်းတွေ၊ မိတ်ဆွေသူငယ်ချင်းတွေနဲ့ အကူအညီလိုအပ်နေသူတွေကို တတ်နိုင်သလောက် ကူညီပေးပါ။
⭕ ငလျင်ကြောင့် စိတ်ထိခိုက်နေသူတွေကို နားထောင်ပေးခြင်း၊ အားပေးခြင်းဖြင့် ကူညီနိုင်ပါတယ်။
⭕ သင်တွေ့ရှိတဲ့ အန္တရာယ်ရှိတဲ့အခြေအနေတွေ၊ ထိခိုက်ဒဏ်ရာရသူတွေအကြောင်းကို သက်ဆိုင်ရာအဖွဲ့အစည်းတွေကို ချက်ချင်းအကြောင်းကြားပါ။
ငလျင်ဆိုတာ မကြုံချင်ဆုံးအရာတွေထဲက တစ်ခုပါ။ ဒါပေမဲ့ ကြုံလာရင်လည်း ရင်ဆိုင်ဖြေရှင်းနိုင်ဖို့ ပြင်ဆင်ထားဖို့လိုပါတယ်။