လူတိုင်းက ကိုယ့်ကိုမေတ္တာရှိစေချင်တယ်..ဂရုတစိုက် အလေးအနက် တန်ဖိုးထားစေချင်ကြပါတယ်..။ ကိုယ်လိုချင်တဲ့ မေတ္တာရဖို့အတွက် ကိုယ်ကလည်း မေတ္တာရှိအောင် နေတတ်ဖို့လိုပါတယ်..။ မေတ္တာရဲ့သဘောက သိမ်မွေ့နက်ရှိုင်းပါတယ်..။ မေတ္တာရဲ့ဓါတ်သဘာဝက အကြည်ဓါတ် အအေးဓါတ်ကလေး လွှမ်းခြုံနေတာဖြစ်ပါတယ်..။
လူတစ်ယောက်မှာ မေတ္တာဓါတ်ကလေးကိန်းဝပ်နေတယ်ဆိုရင် သိပ်ကိုသိသာလွန်းပါတယ်..။ သူ့အနား ရောက်သွားရင်ကို အကြည်ဓါတ် အအေးလှိုင်းကလေးတွေ စိမ့်ဖြာနေပြီး မျက်နှာကလေးကလည်း ကြည်လင် ပြောတဲ့စကားလေးတွေကလည်း ချိုသာနူးညံ့ပြီး ကောင်းကျိုးဖြစ်စေမယ့် အကြောင်းလေးတွေပဲ ပြောတတ်ပါတယ်..။ သူနဲ့စကားပြောရရင် ကိုယ့်ဆီမှာပါ အကြည်ဓါတ်ကလေး ကူးစက်ပြီး မျက်နှာကလေးပါ လိုက်ပြီးပြုံးချိုကြည်လင်လာစေတာပါပဲ..။
တချို့က မေတ္တာတော့ လိုချင်ပေမယ့် မေတ္တာရှိအောင် မနေတတ်ပါဘူး..။ မျက်နှာထားက အလိုမကျရင် စူပုတ်ကောက်ချိတ်ပြီး ပြောသမျှစကားကလည်း အပျက်သဘော အဆိုးမြင်အကန်ဘုကလန့်တွေချည်းသာ ပြောတတ်ပါတယ်..။ သူနဲ့ မျက်နှာချင်းဆိုင်လိုက်တာနဲ့ ကိုယ့်ရင်ထဲမှာ မီးလာဟပ်သလို အပူလှိုင်းတွေ ချက်ချင်းကူးစက်လာပြီး အလိုလို စိတ်အကြည်ဓါတ်တွေပျောက်ဆုံးကုန်တာပါပဲ..။ အဲ့ဒိလိုလူမျိုးကိုတော့ ဝေးဝေးရှောင်ပါတယ်..။ ကိုယ့်ရဲ့စွမ်းအင်တွေ စုပ်အယူမခံစေချင်လို့ဖြစ်ပါတယ်..။
ကိုယ်က မေတ္တာလိုချင်တယ်ဆိုရင် ကိုယ့်ဆီမှာ မေတ္တာအရင်ဖြည့်ထားဖို့ လိုပါတယ်..။ ကိုယ့်မှာရှိနေမှ သူများကို ဖြန့်ဝေနိုင်မှာမဟုတ်လား..။ နေ့စဉ် ဘုရားခန်းထဲမှာ တရားထိုင် တရားမှတ်နေမှ တရားကျင့်နေတယ်လို့ မဆိုလိုပါဘူး..။ နေ့စဉ် မေတ္တာစိတ်ကလေး အကောင်းမြင်စိတ်ကလေးထားပြီး ဘာတွေးတွေး ဘာပြောပြောဘာလုပ်လုပ် သတိကလေးကပ်ပြီး ကောင်းမွန်ချိုသာတဲ့ မေတ္တာစိတ်ကလေးထားပြီး တွေးမယ် ပြောမယ် လုပ်မယ်ဆိုရင် ကိုယ့်ရဲ့ မေတ္တာလှိုင်းတွေဟာ သူများဆီလည်း ကူးစက်ပြီး ကိုယ်နဲ့ လှိုင်းချင်းတူညီမျှတဲ့ မေတ္တာရှိသူတွေဆီက မေတ္တာဓါတ်တွေ ကူးလူးယှက်သွယ်လာစေတာပါပဲ..။
ကိုယ်က မေတ္တာလိုချင်ရင် ကိုယ်က အရင် မေတ္တာပေးရပါတယ်..။ ကိုယ်က အချိုလိုချင်ရင် ကိုယ်က အချိုဓါတ်ကလေးနဲ့ စတင်ရပါတယ်..။ ကိုယ်က အလင်းဓါတ်လိုချင်ရင် ကိုယ့်ရဲ့စိတ်နှလုံးကို အမှောင်ချထားလို့ မရပါဘူး..။ မေတ္တာစိတ် အကောင်းမြင်စိတ်ကလေးနဲ့ လင်းချင်းစေရပါမယ်..။ ကိုယ့်ကို မေတ္တာရှိစေချင်ရင် မေတ္တာရှိအောင် နေဖို့လိုပါတယ်..။
#လွန်းထားထား
