ဝါရှင်တန်မှာ မောင်းသူမဲ့အငှားကား ပြေးဆွဲမယ့် Waymo
အမေရိကန်မှာတော့ Waymo မောင်းသူမဲ့ကားတွေ တော်တော်အလုပ်ဖြစ်နေပါပြီ။
Waymo က Google မိခင်လုပ်ငန်းစု Alphabet ပိုင်တဲ့ မောင်းသူမဲ့ ကားကုမ္ပဏီပါ။ အမေရိကန်ရဲ့ ပထမဆုံး ယာဉ်မောင်းမပါတဲ့ မောင်းသူမဲ့အငှားကားလုပ်ငန်းကို ပြောဆိုရင် Waymo ကို ပြောရပါလိမ့်မယ်။ ဒီကုမ္ပဏီက Tesla ကုမ္ပဏီရဲ့ မဖြစ်သေးတဲ့အိပ်မက်ကို အစောကြီး အကောင်အထည်ဖော်နေတဲ့ ကုမ္ပဏီပါ။
Waymo ရဲ့ robotaxi တွေက အရီဇိုးနားက ဖီးနစ်မြို့ ၊ ကယ်လီဖိုးနီးယားက ဆန်ဖရန်စစ္စကို ၊ ဆီလီကွန်ဗယ်လီ နဲ့ လော့စ်အိန်ဂျလိစ်တို့မှာ ပြေးဆွဲနေပါပြီ။ အခုမတ်လအထိ Waymo One အခပေးဝန်ဆောင်မှုက တစ်ပတ်ခရီးလမ်းကြောင်း ၂ သိန်းကျော်နှုန်း ရှိနေပြီလို့ ဆိုပါတယ်။
လာမယ့် ၂၀၂၆ ခုနှစ်ဆို Waymo မောင်းသူမဲ့ကားတွေက မြို့တော် ဝါရှင်တန်ကို ရောက်တော့မှာပါ။ ဒီအတွက် စည်းကမ်းထိန်းသိမ်းရေးအဖွဲ့တွေဆီက ခွင့်ပြုချက်အရင် ယူရဖို့ ရှိပါတယ်။ ဝါရှင်တန်မှာက အလိုအလျောက်မောင်းယာဉ်တွေ ပြေးမယ်ဆို ယာဉ်လုံခြုံရေးအတွက် safety ဒါရိုက်ဘာထည့်ပေးဖို့ သတ်မှတ်ထားပါတယ်။
Waymo က သူ့ကားတွေ ဝါရှင်တန်မှာ နှစ်အတော်ကြာအောင် စမ်းသပ်ထားတာ ဖြစ်လို့ ဈေးကွက်ဝင်ဖို့ အဆင်သင့်ဖြစ်နေပုံပါပဲ။ ပြိုင်ဘက် Tesla က ဒီနှစ်နှစ်လယ်ပိုင်းမှာ အလိုအလျောက်မောင်း robotaxi စနစ်ကို တက္ကဆက်ပြည်နယ် အော်စတင်မှာ စပြီး ဆွဲဖို့ စီစဉ်ထားပေမယ့် သိပ်တော့ မသေချာသေးပါဘူး။
"Tesla က Waymo ကို ဆယ်နှစ်နီးနီး ယှဉ်ဖိုက်ခဲ့တယ်။ အခုထိ သူတို့ မယှဉ်နိုင်သေးဘူး။ Tesla က ယာဉ်မောင်းအကူ system တစ်ခုနဲ့ ကားကုမ္ပဏီလောက်ပဲ။အခု Waymo လို တစ်လ ခရီးစဉ်သန်းချီမပြောနဲ့ အပြည့်အဝမောင်းသူမဲ့စနစ်ကနေ ဝင်ငွေရတဲ့ လမ်းကြောင်းတစ်ခုတောင် ရှိတာ မဟုတ်ဘူး။"
အရင် Waymo ရဲ့ CEO ဂျွန် ကရက်ဖ်စစ်ကတော့ robotaxi ပိုင်းမှာ Tesla ကို ရှယ်ဖဲ့ထားတာပါ။
Tesla က မနှစ်ကပဲ နှစ်ယောက်စီး Cybercab robotaxi ကို မိတ်ဆက်ပြသခဲ့ပေမယ့် နောက်နှစ်ထဲမှ ထုတ်လုပ်မှုလုပ်ဖို့ ရှိပါတယ်။ ဈေးကွက်ထဲ ဘယ်အချိန် ဝင်မလဲ မသိပေမယ့် Cybercab ကို ဒေါ်လာ ၃ သောင်းအောက်ဈေးနဲ့ ရောင်းမယ်ဆိုတဲ့ အီလွန်မတ်စ်စကားကတော့ မက်လောက်စရာပါပဲ။
