#ပြည်တွင်းသတင်း
◼ငါးမင်းဆွေ ကို ပုဒ်မ- ၅၀၅ (က)ဖြင့် အလုပ်ကြမ်းနှင့်ထောင်ဒဏ်သုံးနှစ်ချမှတ်
ငါးမင်းဆွေကို လှိုင်မြို့နယ်၊တရားရုံး၌ ယနေ့(မတ် ၂၅ ရက်)တွင် ရာဇသတ်ကြီး ပုဒ်မ- ၅၀၅ (က)ဖြင့် အလုပ်ကြမ်း နှင့် ထောင်ဒဏ်သုံးနှစ်ချမှတ်လိုက်ကြောင်း ၎င်း၏ရှေ့နေဖြစ်သူထံမှသိရသည်။
မွန်ပြည်နယ် ၊ ကျိုက်ထိုမြို့နယ် ဖက္ကလိပ် ကျေးရွာတွင် နေထိုင်သည့် ငါးမင်းဆွေ( ခ) ဦးမင်းဆွေသည် နိုင်ငံတော်အေးချမ်းတည်ငြိမ်ရေးကို ပျက်ပြားစေရန် လူမှုကွန်ရက်စာမျက်မှာပေါ်၌ လှုံ့ဆော်ခြင်း ၊ ဝါဒဖြန့်ခြင်းများပြုမူလုပ်ဆောင်ခဲ့သည်ဟုဆိုကာ နစကမှ ပြီးခဲ့သည့် ၂၀၂၄ ခုနှစ်၊နိုဝင်ဘာ ၉ရက်တွင် ဖမ်းဆီးခဲ့သည်။ထို့နောက် နိုဝင်ဘာ ၁၀ ရက်တွင် လှိုင်မြို့နယ်ရှိ လှိုင်မြို့မရဲစခန်း၌ အမှုဖွင့်ခဲ့ပြီး ယခုကဲ့သို့ အမိန့်ချမှတ်လိုက်ခြင်းဖြစ်ကြောင်း သိရသည်။
“ဒီနေ့အမိန့်ချတာပါ။အင်းစိန်ထောင်အထူးတရားရုံး၊လှိုင်မြို့နယ်တရားခွင်ကချတာပါ”ဟု ၎င်း၏ရှေ့နေဖြစ်သူကစံတော်ချိန်သို့ပြောသည်။
ငါးမင်းဆွေသည် ပြီးခဲ့သည့်အစိုးရလက်ထက်ကလည်း ဒေါ်အောင်ဆန်းစုကြည်ကို ပြည့်တန်ဆာ အမျိုးသမီးထက်ပင် ယုတ်ညံ့သည့်အမျိုးသမီး ဖြစ်သည်ဟု ရေးသားခဲ့ပြီး တပ်မတော် နှင့်ပြည်သူကို သွေးကွဲအောင်လုပ်နေသူဖြစ်ကြောင်း ရေးသားခဲ့မှုကြောင့် နိုင်ငံတော် အကြည်ညိုပျက်စေမှု ပုဒ်မ ၁၂၄ (က) ဖြင့် ထောင်ဒဏ် ၇ နှစ်ချမှတ်ခံခဲ့ရဖူးသည်။
ထို့ပြင် ၂၀၂၁ ခုနှစ်၊ဖေဖော်ဝါရီ ၁ ရက်နောက်ပိုင်း နိုင်ငံရေးအပြောင်းအလဲမဖြစ်ခင် နှင့် ဖြစ်ပြီးနောက်ပိုင်းကတည်းက တပ်မတော် ထောက်ခံသူဖြစ်ပြီး နောက်ပိုင်းတွင် တပ်မတော်အား ဝေဖန်မှုအချို့ပြုလုပ်ခဲ့သူလည်းဖြစ်ကြောင်း သတင်းမှတ်တမ်းများအရ သိရသည်။
သတင်း-အင်ကြင်း
ဓာတ်ပုံ- ငါးမင်းဆွေ(fb)
