မြန်မာနိုင်ငံတဝှမ်း ရုရှားငွေပေးချေကတ် Mir လက်ခံသည့် POS (၆၀) ကျော်ရှိလာ
Interfax / Pinnacle Gazette ၊ ဖေဖော်ဝါရီ ၂၇
မြန်မာနိုင်ငံတဝှမ်းမှာ ရုရှားနိုင်ငံသုံး ငွေပေးချေမှုစနစ် Mir ကတ် လက်ခံဆောင်ရွက်တဲ့ POS (Point of Sale) စက် ၆၇ လုံး ရှိလာကြောင်း ရုရှားဗဟိုဘဏ်၊ ဒုတိယဥက္ကဋ္ဌ Alexey Guznov ရဲ့ ပြောကြားချက်အရ သိရပါတယ်။
ပထမအဆင့်အနေနဲ့ ရုရှားငွေပေးချေကတ် Mir လက်ခံတဲ့ POS အလုံးရေ ၈၀ ကို တပ်ဆင်မှာဖြစ်ပြီး ဝယ်လိုအားပေါ်မူတည်ကာ POS တွေ ဆက်လက်တိုးချဲ့သွားမယ်လို့ သိရပါတယ်။
“Mir ကတ်တွေကို မြန်မာနိုင်ငံမှာ လက်ခံနေပါပြီ။ ဒါပေမယ့် နေရာတိုင်းနဲ့တော့ အလှမ်းဝေးနေဆဲပါ”လို့ Guznov က ရုရှား-မြန်မာစီးပွားရေး ပူးပေါင်းဆောင်ရွက်မှု ကော်မရှင်အစည်းအဝေးအပြီး ပြောကြားခဲ့ပါတယ်။
ရုရှားနဲ့ မြန်မာနိုင်ငံ ဗဟိုဘဏ်တွေအနေနဲ့ မြန်မာနိုင်ငံမှာ Mir ကတ်တွေ လက်ခံမှု တိုးချဲ့ဖို့ အလားအလာနဲ့ နိုင်ငံကိုယ်စီက ဘဏ်တွေမှာ နှစ်ဖက်စီးပွားရေးလုပ်ငန်းတွေရဲ့ အပြန်အလှန် ငွေစာရင်းဖွင့်လှစ်နိုင်ခြေတို့ကို ဆွေးနွေးခဲ့ကြပါတယ်။
“ဘဏ်လုပ်ငန်းကဏ္ဍမှာ အပြန်အလှန်ဖွံ့ဖြိုးတိုးတက်မှုတွေ ထပ်ဆင့်ဖွံ့ဖြိုးတိုးတက်ဖို့ လိုအပ်တာတွေအားလုံးအတွက် ကောင်းမွန်တဲ့ ဆွေးနွေးမှုတွေ ရှိခဲ့ပါတယ်”လို့ Guznov က ဆိုပါတယ်။
ရုရှားနိုင်ငံသား ခရီးသွားဧည့်သည်တွေ မြန်မာနိုင်ငံကို လာရောက်လည်ပတ်ရင် ငွေသားလက်ခံနိုင်မယ့် ATM ဝန်ဆောင်မှုတွေကို တိုးချဲ့ဖို့ လောလောဆယ် ဆွေးနွေးနေတယ်လို့ သိရပါတယ်။
ရုရှားစီးပွားရေးဖွံ့ဖြိုးတိုးတက်မှုဝန်ကြီးဌာနရဲ့ ထုတ်ပြန်ချက်အရ နှစ်နိုင်ငံကုန်သွယ်မှုပမာဏဟာ မနှစ်ကထက် ၄၀ ရာခိုင်နှုန်း တိုးတက်လာခဲ့ပြီး နှစ်နိုင်ငံ စီးပွားရေးဆက်ဆံမှုတွေ တိုးမြင့်လာမှုကို ကိုယ်စားပြုတာလို့ ဆိုပါတယ်။
မြန်မာနိုင်ငံအနေနဲ့ ရုရှားကနေ ဓာတ်မြေသြဇာ၊ ရေနံထွက်ကုန်နဲ့ ဆေးဝါးတွေ တင်သွင်းပြီး ဆန်၊ သီးစုံဖျော်ရည်၊ အထည်အလိပ်နဲ့ ဖိနပ်တွေ ပြန်လည်တင်ပို့လျက်ရှိပါတယ်။
