#ပြည်တွင်းသတင်း
◾️ဟိုပန်မြို့၌ ကျားဖြန့်လုပ်ငန်းလုပ်ကိုင်သူ ၁၀၀ ဦးကျော်ဖမ်းမိ
ရှမ်းပြည်နယ်(မြောက်ပိုင်း)၊ ဟိုပန်မြို့၊ မိန်းပန်း (ရှမ်း) ရပ်ကွက်၌ ကျားဖြန့်လုပ်ငန်းလုပ်ကိုင်သူ ၁၀၀ ဦးကျော်ဖမ်းဆီးမိခဲ့ကြောင်း ‘ဝ’ သတင်းမီဒီယာက ယနေ့(ဖေဖော်ဝါရီ ၂၃ ရက်) တွင် ဖော်ပြသည်။
အဆိုပါရပ်ကွက်တွင် ကျားဖြန့်လုပ်ငန်းလုပ်ကိုင်နေသူများရှိကြောင်း တိုင်ကြားလာသည့်အတွက် ဖေဖော်ဝါရီ ၂၀ ရက်၊ ည ၁၂ နာရီဝန်းကျင်တွင် UWSA ကဝင်ရောက်စီးနင်းဖမ်းဆီးခဲ့ခြင်းဖြစ်ပြီး ကျားဖြန့်လုပ်ငန်းလုပ်ကိုင်သူ ၁၀၅ ဦးနှင့် စက်ပစ္စည်းများကိုဖမ်းဆီးမိခဲ့ကြောင်းသိရသည်။
ယင်းကျားဖြန့်လုပ်ငန်းအာဦးဆောင်သူမှာ တရုတ်နိုင်ငံသားအမျိုးသားဖြစ်ပြီး သွားရောက်ဖမ်းဆီးသည့် အချိန်တွင် ၎င်းကိုဖမ်းဆီးမိခဲ့ခြင်းမရှိကြောင်း အဆိုပါသတင်းဌာနကဖော်ပြထားသည်။
ပြီးခဲ့သည့် ၂၀၂၄ ခုနှစ်တွင်လည်း တန့်ယန်းမြို့၌ ကျားဖြန့်အွန်လိုင်းငွေလိမ်လုပ်ငန်းလုပ်ကိုင်သူ ၁၀၀၀ ဦးကျော်ဖမ်းဆီးမိခဲ့ပြီး ၎င်းတို့ထဲမှတရုတ်နိုင်ငံသား ၇၆၂ ဦး၊ ၂၀၂၄ ခုနှစ်၊ နိုဝင်ဘာ ၁၉ ရက်က တရုတ်နိုင်ငံထံလွှဲပြောင်းပေးခဲ့ကြောင်း UWSA ထုတ်ပြန်ထားသည်။
ထိုင်း-မြန်မာနယ်စပ်ရှိ အွန်လိုင်းကျားဖြန့်ငွေလိမ်လုပ်ငန်းများကို တရုတ်-မြန်မာ-ထိုင်း သုံးနိုင်ငံ ပူးပေါင်းကာ နှိမ်နင်းရေးလုပ်ငန်းများလုပ်ဆောင်နေပြီး အဆိုပါလုပ်ငန်းများနှင့်ပတ်သက်သူများနှင့် လူကုန်ကူးခံခဲ့ရသူများကို သက်ဆိုင်ရာနိုင်ငံများထံ ပြန်လည်လွှဲပြောင်းရေးလုပ်ငန်းများ လုပ်ဆောင်လျက်ရှိကြောင်း၊ ယခုရက်ပိုင်းအတွင်း ကျားဖြန့်လုပ်ငန်းများမှဖမ်းမိသူ တရုတ်နိုင်ငံသား ၆၀၀ ကျော်ကိုတရုတ်ဘက်သို့ ပြန်လည်လွဲပြောင်းပေးခဲ့ကြောင်း နစက ထုတ်ပြန်ထားသည်။
