ပြည်ပရောက်မြန်မာလုပ်သားများ၏ လစာငွေကို ဘဏ်လမ်းကြောင်းမှ လွှဲပို့ငွေ၏ ၅ ရာခိုင်နှုန်းဖြင့် EV ကားများ တင်သွင်းခွင့်ပြုကြောင်း ထပ်မံအသိပေး

ဖေဖော်ဝါရီ ၂၂

ပြည်ပရောက်မြန်မာလုပ်သားများ၏ လစာငွေကို ဘဏ်လမ်းကြောင်းမှ လွှဲပို့ငွေ၏ ၅ ရာခိုင်နှုန်းဖြင့် EV ကားများ တင်သွင်းခွင့်ပြုကြောင်း စီးပွားကူးသန်းဝန်ကြီးဌာနက ထပ်မံအသိပေးထားသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ယနေ့ (ဖေဖော်ဝါရီ ၂၁ ရက်) တွင် အထက်ပါကဲ့သို့ ထပ်မံအသိပေးထားခြင်းဖြစ်သည်။

နိုင်ငံတော်တွင် လျှပ်စစ်သုံးယာဉ်များ အသုံးပြုမှု ပိုမိုတိုးတက်ဖြစ်ထွန်းစေရန်နှင့် သဘာဝပတ် ဝန်းကျင်ထိန်းသိမ်းရေးကိစ္စအား အထောက်အကူပြုရန် ရည်ရွယ်၍ စီးပွားကူးသန်းဝန်ကြီးဌာနက အဆိုပါအစီအစဉ်ကို စတင်ခဲ့ခြင်းဖြစ်သည်။

ပြည်ပတွင် အလုပ်လုပ်ကိုင်လျက်ရှိကြသည့် မြန်မာနိုင်ငံသားများက မိမိတို့ရရှိသည့် လစာငွေ (သို့မဟုတ်) အခြားဝင်ငွေများကို မြန်မာနိုင်ငံသို့ ဘဏ်လမ်းကြောင်းမှတစ်ဆင့် ပြန်လည်လွှဲပို့ခြင်းအပေါ် အထူးအစီအစဉ်တစ်ရပ်အနေဖြင့် လျှပ်စစ်သုံး မော်တော်ယာဉ်/ လျှပ်စစ်သုံးမော်တော် ဆိုင်ကယ် တင်သွင်းရန်ခွင့်ပြုပေးခဲ့ခြင်းဖြစ်သည်။

ဝန်ကြီးဌာန၏ ထုတ်ပြန်ချက်အရ ပုံမှန်လစာရရှိသူများ (သင်္ဘောသားများ အပါအဝင်) နှင့် အခြားဝင်ငွေရရှိသူများသည် တစ်နှစ်အတွင်း အမေရိကန် ဒေါ်လာ ၅ သောင်းနှင့်အထက် လွှဲပို့ပါက စုစုပေါင်းလွှဲပို့ငွေ၏ ၅ ရာခိုင်နှုန်းတန်ဖိုးနှင့်ညီမျှသော လျှပ်စစ်သုံး မော်တော်ယာဉ်/လျှပ်စစ်သုံးမော်တော်ဆိုင်ကယ် တစ်နှစ်လျှင် တစ်စီးနှုန်းဖြင့် ခွင့်ပြုဆောင်ရွက် သွားမည်ဖြစ်ကြောင်း သိရသည်။

ထို့ပြင် အကျုံးဝင်သူများအနေဖြင့် လျှပ်စစ်သုံးမော်တော်ယာဉ်/ လျှပ်စစ်သုံးမော်တော် ဆိုင်ကယ် တင်သွင်းခွင့်ပြုရာတွင် တစ်ဦးတစ်ယောက်ချင်းတင်သွင်းမှုကိုလည်းကောင်း၊ တစ်ဦးတစ်ယောက်ချင်းတင်သွင်းရန် ယာဉ်တန်ဖိုး မပြည့်မီပါက စုပေါင်း၍ တင်သွင်းမှုကိုလည်းကောင်း ခွင့်ပြု ပေးမည်ဖြစ်ကြောင်းလည်း ထုတ်ပြန်ချက်တွင် ဖော်ပြထားသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက အဆိုပါထုတ်ပြန်ချက်ကို ပြီးခဲ့သည့် ၂၀၂၃ ခုနှစ်၊ အောက်တိုဘာလ (၂၆) ရက်တွင် အသိပေးကြေညာချက်ဖြင့် ထုတ်ပြန်ခဲ့ခြင်းဖြစ်ပြီး ယခုအခါတွင်လည်း ထပ်မံအသိပေးထုတ်ပြန်ထားသည်။

အသေးစိတ်သိရှိလိုသူများအ‌နေဖြင့် ဖုန်းနံပါတ် ၀၆၇-၃၄၀၈၄၃၃ နှင့် Email - dottraining2008@ gmail.com များသို့ ဆက်သွယ်မေးမြန်းနိုင်ကြောင်းလည်း ဖော်ပြထားသည်။

#centralnewsnaypyitaw