Grok 3 ကို free သုံးနိုင်ပြီလို့ xAI ကြေညာ

အီလွန်မတ်စ်ပြောတဲ့ ကမ္ဘာ့ဉာဏ်ရည်အမြင့်ဆုံး AI တော့ အလကားသုံးလို့ ရသွားပါပြီ။

ဆာဗာတွေ အရည်မပျော်မချင်း free ပေးသုံးမယ်လို့ပါ အရွှန်းဖောက်ပြီး xAI က တရားဝင်ကြေညာသွားတာပါ။ X မှာ Premium နဲ့ SuperGrok သုံးသူတွေကတော့ access ပိုတိုးရမှာ ဖြစ်သလို Voice Mode လို အဆင့်မြင့် features တွေလည်း ဦးဦးဖျားဖျား သုံးနိုင်မယ်လို့ ပြောပါတယ်။

ဘာပဲဖြစ်ဖြစ် တစ်လ ဒေါ်လာ ၄၀ မကုန်ဘဲ အလကားသုံးရမှာကတော့ မိုက်ပါတယ်။ ဒီတစ်ခေါက်ထွက်တဲ့ Grok 3 က AI Chatbots တွေထဲမှာ တော်တော်ကို ကြမ်းတယ် ပြောရမှာပါ။ သင်္ချာ ၊ coding ၊ ကမ္ဘာ့ရေးရာဗဟုသုတနဲ့ တွေးတောဆင်ခြင်တဲ့ reasoning ပိုင်းမှာလည်း performance တော်တော့်ကို မြင့်လို့ပါ။

Chatbot Arena ရဲ့ benchmark မှာဆိုရင် Grok 3 ကို ပညာရေးနဲ့ real-world အသုံးပြုသူအကြိုက် benchmark စစ်ရာမှာ ပြိုင်ဘက်မော်ဒယ်အကုန်လုံးကို ကျော်ပြီး score 1402 မှတ်အထိ ရထားပါတယ်။ Grok 3 မှာက ထူးထူးခြားခြား Deep Search နဲ့ Think ဆိုပြီးလည်း feature နှစ်ခု ပါပါတယ်။

Think ကတော့ reinforcement learning (RL) နည်းပညာနဲ့ ဖန်တီးထားတာ ဖြစ်ပြီး သင်္ချာ ၊ သိပ္ပံနဲ့ coding ပိုင်းတွေမှာ သုံးဖို့ အသင့်တော်ဆုံးလို့ ဆိုပါတယ်။ ခဲရာခဲဆစ်မေးခွန်းတွေကို Grok 3 ရဲ့ Think mode နဲ့ ခေါင်းသုံးခိုင်းလို့ ရပါတယ်။

Deep Search ကတော့ နာမည်အတိုင်း ရှာဖွေရေးစနစ်ဖြစ်ပြီး နောက်ဆုံးရ သတင်းအချက်အလက်တွေကို စုစည်းဆန်းစစ်ပြီး အနှစ်ချုပ် report ချပေးနိုင်ပါတယ်။ အစောပိုင်းက Grok 3 ကို Premium+ သမားတွေနဲ့ SuperGrok subscriber တွေပဲ ရမယ်လို့ သတင်းထွက်ထားတာပါ။

အခုတော့ free users တွေပါ ကြိုက်ရာဝင်မေးလို့ ရပြီ ဖြစ်ပါတယ်။ Grok 3 ကို iOS သမားတွေအနေနဲ့ app အနေနဲ့ သုံးနိုင်သလို grok.com ဝက်ဘ်ဆိုက်နဲ့ X လူမှုကွန်ရက်တွေမှာပါ သုံးနိုင်ပါတယ်။ See less