မြန်မာ့ပြောင်းဆံ တန်ချိန် ၂ သိန်း ထိုင်း ဝယ်မည်
ရန်ကုန်၊ ဖေဖော်ဝါရီ ၂၁
ထိုင်းစီးပွားရေးလုပ်ငန်းရှင်တွေက မြန်မာနိုင်ငံက စိုက်ပျိုးထွက်ရှိတဲ့ ပြောင်းဆံတန်ချိန် ၂ သိန်းကို ဝယ်ယူသွားဖို့ရှိကြောင်း သိရပါတယ်။
ထိုင်း-မြန်မာနှစ်နိုင်ငံ ကုန်သည်လုပ်ငန်းရှင်တွေအကြား Business to Business (B to ပြောင်းအရောင်းအဝယ် နားလည်မှုဆိုင်ရာ သဘောတူစာချုပ် (MOU) ကို ဖေဖော်ဝါရီလ ၆ ရက်နေ့မှာ လက်မှတ်ရေးထိုးခဲ့ကြောင်း စီးပွား/ကူးသန်းက သတင်းထုတ်ပြန်ပါတယ်။
အဆိုပါ MOU အတွင်း စာချုပ် ၄၃ ခု ပါဝင်ကာ မြန်မာနိုင်ငံဘက်မှ ကုမ္ပဏီ ၂၃ ခုနဲ့ ထိုင်းနိုင်ငံဘက်မှ ကုမ္ပဏီ ၉ ခုတို့ ပါဝင်လက်မှတ်ရေးထိုးခဲ့ပြီး ပြောင်းတန်ချိန် ၂ သိန်းတိတိ စာချုပ်ချုပ်ဆိုနိုင်ခဲ့ပါတယ်။
အခုလို MOU ရေးထိုးနိုင်ခဲ့လို့ ဈေးကွက်ခိုင်မာမှုရှိခြင်း၊ ဝယ်လိုအားများတဲ့ ကာလမှာ တစ်ဖက်နိုင်ငံဝယ်ယူသူတွေဘက်မှ ဈေးကစားမှုတွေ မဖြစ်ပေါ်နိုင်တော့ကြောင်း စီးပွား/ကူးသန်းက ထုတ်ပြန်ပြောကြားထားပါတယ်။
ယခုနှစ်အတွင်း မြန်မာ့ပြောင်းဆံတွေကို ထိုင်းဈေးကွက်ထံ အများဆုံးတင်ပို့သွားဖို့ရှိပြီး ထိုင်းနိုင်ငံပြီးမှ တရုတ်၊ ဖိလစ်ပိုင်၊ ဗီယက်နမ်နဲ့ ဘင်္ဂလားဒေ့ရှ်နိုင်ငံတွေထံ တင်ပို့သွားမှာပါ။
လက်ရှိမှာ တရုတ်နိုင်ငံကနေ မြန်မာ့ပြောင်းဆံကို ဝယ်ယူဖို့ ကမ်းလှမ်းနေပြီး အိန္ဒိယနိုင်ငံကလည်း ထပ်တိုးဝယ်ယူနိုင်ဖို့ ကမ်းလှမ်းမှုတွေ ပြုလုပ်ထားတယ်လို့ မြန်မာနိုင်ငံ ပြောင်းလုပ်ငန်းအသင်းကနေ သိရပါတယ်။
ကမ္ဘာ့ဈေးကွက်မှာတော့ ပြောင်းဆံတစ်တန်ဈေး အမေရိကန်ဒေါ်လာ ၄၉၈ ရှိပြီး ဘုရင်နောင်ကုန်စည်ဒိုင်မှာတော့ ပြောင်းဆံတစ်ပိဿာကို ၁၆၈၀ -၁၇၀၀ ကျပ် ဈေးဖွင့်ထားပါတယ်။
ပြောင်းတင်ပို့မှုအနေနဲ့ ၂၀၂၄-၂၅ ဘဏ္ဍာနှစ်၊ ဧပြီလမှ နိုဝင်ဘာလအတွင်းမှာ ပြောင်းတန်ချိန် ၁.၈၈ သန်း၊ တန်ဖိုးအနေနဲ့ အမေရိကန် ဒေါ်လာ ၄၄၇ သန်းကျော်ဖိုး တင်ပို့နိုင်ခဲ့ပါတယ်။
