❝ဂြိုလ်သားသူငယ်ချင်းအဖော်❞

𝐓𝐡𝐫𝐨𝐰𝐛𝐚𝐜𝐤: CJ7

Stephen Chow နဲ့မကြီးပြင်းလာတဲ့ကိုယ်တွေအတွက် Stephen Chow ရဲ့ရုပ်ရှင်တွေထဲ CJ7 ရုပ်ရှင်ကိုတော့ မှတ်မှတ်ရရဖြစ်စေခဲ့ပါတယ်။ တခြားသူတွေ Stephen Chow ရုပ်ရှင်တွေအကြောင်းပြောကြရင် မျက်စိကလယ်နားကလယ်ဖြစ်ပေမယ့် Stephen Chow ရဲ့ CJ7 အကြောင်းဆိုရင်တော့ ကိုယ်နဲ့အကျွမ်းတဝင်ဖြစ်တဲ့စကားဝိုင်းထဲရောက်သွားသလိုပါပဲ။ တကယ်တော့ ကိုယ်ကတရုတ်ရုပ်ရှင်လောကနဲ့ ကြီးပြင်းလာတာမဟုတ်တော့ Bruce Lee, Jackie Chan, Stephen Chow နဲ့ Jet Li တို့ဆို နာမည်ကြားဖူးရုံ၊ ရုပ်ရှင်ကြည့်ဖူးရင်လည်း မေ့မေ့ပျောက်ပျောက်ပါပဲ။

ကလေးတစ်ယောက်အဖေ Ti က သားဖြစ်သူ Dicky ဘဝကို ပညာရေးကသာမြှင့်တင်ပေးနိုင်တယ်လို့ ယုံကြည်လို့ ကိုယ်ပိုင်ကျောင်းပို့နိုင်ဖို့ရာ ကြိုးစားနေတဲ့ ဆောက်လုပ်ရေးသမားပါ။ Dicky ကလည်း စာကြိုးစားရှာပေမယ့် ဆင်းရဲလို့ ကျောင်းကချမ်းသားတဲ့ကလေးတွေ စနောက်အနိုင်ကျင့်တာခံရတယ်။ သားဖြစ်သူလိုချင်တဲ့ တန်ဖိုးကြီးအရုပ်ကို မဝယ်ပေးနိုင်လို့ အမှိုက်ပုံထဲက လင်းဖြာနေတဲ့အလုံးတစ်လုံးကိုရှာတွေ့တော့ Dicky ကိုပေးလိုက်ပါတယ်။ ဒီအလုံးလေးဟာ နောက်ကျတော့ Dicky ရဲ့ဂြိုလ်သားသူငယ်ချင်းဖြစ်လာပါတယ်။

ရုပ်ရှင်ကရိုးရိုးရှင်းရှင်းနဲ့ ကလေးတွေအကြိုက်တွေ့စေခဲ့တဲ့ကားပါ။ အခုအချိန်ပြန်ကြည့်ရင် တမျိုးတဖုံခံစားချက်မျိုးဖြစ်နိုင်ပေမယ့် ဒီဖက်အာရှဖက်မှာ အဲ့ခေတ်အခါက ဂြိုလ်သားသူငယ်ချင်းဆိုတဲ့ သဘောတရားက ကလေးတိုင်းသဘောကျစရာဖြစ်ခဲ့ပါတယ်။ အင်တာနက်ခေတ်မှာ CJ7 ကလေးသရုပ်ဆောင်က ယောက်ျားလေးမဟုတ်ဘဲ မိန်းကလေးဆိုတဲ့ပို့စ်လည်း အမြဲတွေ့မြင်ကြမှာပါ။ ဒီရုပ်ရှင်က ရုပ်ရှင်ဝေဖန်ရေးသမားတွေ အကြိုက်မဟုတ်ပေမယ့် Stephen Chow ရဲ့ ကြည့်ပျော်ရှုပျော်ရုပ်ရှင်ထဲပါဝင်ခဲ့ပါတယ်။ Stephen Chow ရဲ့ပုံမှန်ရုပ်ရှင်တွေလိုပဲ ဟာသပေမယ့် လူနေမှုအလွှာတစ်ခုရဲ့ အခက်အခဲတွေ၊ ရိုးရိုးကျင့် မြင့်မြင့်ကြံသင်တဲ့အကြောင်းနဲ့ ရယ်ရပြီး တအောင့်အကြာမှာမှ ခံစားရတဲ့ဟာသတွေပေါင်းကာ သူ့ရဲ့တခြားရုပ်ရှင်တွေလောက် ထိထိမိမိမရှိပေမယ့် ကလေးအကြိုက်ရုပ်ရှင်ကို ငယ်ဘဝအမှတ်တရဖြစ်အောင် ဖန်တီးနိုင်ခဲ့တယ်ထင်ပါတယ်။