ဂျပန်အထက်တန်းကျောင်းသားကို မြဝတီမြို့သို့ လူကုန်ကူးခဲ့သည့် ဂျပန်နိုင်ငံသားအား မြန်မာနိုင်ငံကပြန်လာချိန် ထိုင်းရဲ ဖမ်းဆီး
ဖေဖော်ဝါရီ ၁၅
ဂျပန်အထက်တန်းကျောင်းသားတစ်ဦးကို လူကုန်ကူးမှုနဲ့ သံသယရှိသူ ဂျပန်အမျိုးသားတစ်ဦးကို မနေ့က ဖေဖော်ဝါရီ ၁၃ ရက်မှာ မြန်မာနိုင်ငံက ပြန်အလာ ဒွန်မောင်းလေဆိပ်မှာ ထိုင်းလူဝင်မှုကြီးကြပ်ရေးရဲတပ်ဖွဲ့က ဖမ်းဆီးလိုက်ပါတယ်။
မြန်မာနိုင်ငံဘက်ခြမ်းက ကျားဖြန့်နာမည်ကျော် မြဝတီမြို့ဆီ ဂျပန်အထက်တန်းကျောင်းသားတစ်ဦးကို လူကုန်ကူးမှုနဲ့ သံသယရှိသူ အသက် ၂၉ နှစ်အရွယ် ဂျပန်အမျိုးသားကို ထိုင်းလူဝင်မှုကြီးကြပ်ရေးရဲတပ်ဖွဲ့က ဖမ်းဆီးလိုက်သလို “တွမ်”လို့ ဖော်ပြထားတဲ့ သံသယတရားခံကို ဂျပန်အာဏာပိုင်တွေက စွဲချက်များစွာနဲ့ အလိုရှိနေကြောင်း၊ အကျိုးအမြတ်အတွက် ပြန်ပေးဆွဲတာ၊ တရားမဝင် ထိန်းသိမ်းတာ၊ ဖောက်ထွင်းဝင်ရောက်တာ၊ လက်ရောက်ကျူးလွန်မှုနဲ့ လုယက်တာ စတဲ့ ပြစ်မှုတွေ ကျူးလွန်ထားကြောင်း ထိုင်း လူဝင်မှုကြီးကြပ်ရေး ဗျူရိုရဲ့ကော်မရှင်နာ ရဲဒုတိယဗိုလ်ချုပ်ကြီး ပန်နူမက်စ် ဘူယလပ်က ပြောပါတယ်။
ကလေး၊ အမျိုးသမီး၊ မိသားစုနဲ့ လူကုန်ကူးမှု တိုက်ဖျက်ရေးစင်တာရဲ့ ဒါရိုက်တာဖြစ်သူ အမျိုးသားရဲချုပ် သက်ချိုင်း ပီတာနီးလာဘတ် ပြောကြားချက်အရ တွမ်ဟာ ဂျပန်ကျောင်းသားငယ်ကို ထိုင်းနိုင်ငံသွားဖို့ မစည်းရုံးမီ အွန်လိုင်းဂိမ်းနဲ့ မိတ်ဖွဲ့ခဲ့သလို ကျောင်းသားငယ်ကလည်း မိသားစုကို အသိမပေးဘဲ ဂျပန်နိုင်ငံကနေ ဇန်နဝါရီ လဆန်းပိုင်းမှာ ထွက်ခွာသွားခဲ့ပြီး နောက်ပိုင်း မိသားစုနဲ့ အဆက်အသွယ်ပြတ်သွားခဲ့ပေမဲ့ ဒီကျောင်းသားငယ်ပျောက်ဆုံးကြောင်း တိုင်ကြားပေးပို့လာတဲ့ အစီရင်ခံစာကို ဇန်နဝါရီ ၁၇ ရက်မှာ ရခဲ့ပြီး ထိုင်းအာဏာပိုင်တွေက ၂၄ နာရီအတွင်းမှာပဲ ကျောင်းသားငယ်ကို ပြန်လည်ကယ်ဆယ်နိုင်ခဲ့သလို ဇန်နဝါရီ ၁၈ ရက်မှာပဲ မိခင်နိုင်ငံ ပြန်ပို့လိုက်တာပါ။
မြန်မာနိုင်ငံက ပြန်လည်ရောက်ရှိလာတဲ့ တရားခံတွမ်ကို ဒွန်မောင်းလေဆိပ်မှာ ဖမ်းဆီးအပြီး လူဝင်မှုကြီးကြပ်ရေးအရာရှိတွေက ထိုင်းနိုင်ငံမှာ နေထိုင်ခွင့်ကို ချက်ချင်းရုပ်သိမ်းခဲ့သလို စွဲချက်တင် အရေးယူနိုင်ငံရေးအတွက် ဂျပန်နိုင်ငံကို ပြန်ပို့ဖို့ ပြင်ဆင်နေတယ်လို့ သိရပါတယ်။
ရာဇ၀တ်မှုကျူးလွန်တဲ့ လူ့အဖွဲ့အစည်းကို ခြိမ်းခြောက်မှုပြုတဲ့ နိုင်ငံခြားသားတွေကို တရားဥပဒေအရ တင်းတင်းကျပ်ကျပ် အရေးယူဖို့ ထိုင်းလူဝင်မှု ကြီးကြပ်ရေးကော်မရှင်နာရဲ့ အမျိုးသားရဲချုပ် ရဲချုပ် Kit-ratt Panpetch က အရာရှိတွေကို ညွှန်ကြားထားသလို ဒီလို ကျူးလွန်တဲ့ ပုဂ္ဂိုလ်တွေဟာ တရားစွဲခံရတာ၊ ပြည်နှင်ဒဏ်ပေးခံရတာနဲ့ ထိုင်းနိုင်ငံကို ပြန်လည်ဝင်ရောက်ခွင့်မရအောင် အမည်ပျက်စာရင်းသွင်းတာကို ခံရမှာလည်း ဖြစ်ပါတယ်။
Credit - Myanmar Transparency News Agency
#သတင်းဟင်းလေးအိုးကြီး
