သဘောတူညီချက်အတိုင်း ဓါးစာခံတွေ ပြန်လွှတ်ပေးမယ်လို့ ဟားမတ်စ်ကြေညာ

တဲလ်အဗစ်၊ ဖေဖော်ဝါရီ ၁၅

အစ္စရေးနဲ့ ဟားမတ်စ်တို့အကြား အပစ်အခတ်ရပ်စဲရေးသဘောတူညီချက် ပျက်ပြားမှာကို စိုးရိမ်မှုတွေရှိနေချိန်မှာ ပါလက်စတိုင်းအကျဉ်းသားတွေနဲ့ လဲလှယ်ဖို့ ပြန်လွှတ်ပေးမယ့် ဓါးစာခံသုံးယောက်ရဲ့ နာမည်တွေကို ဟားမတ်စ်အဖွဲ့က ကြေညာလိုက်ပါတယ်။

ပြန်လွှတ်ပေးမယ့်သူတွေကတော့ ရုရှား-အစ္စရေး နိုင်ငံသား အလက်ဇန်းဒါးထရိုဖန်နော့ဗ်၊ အာဂျင်တီးနား-အစ္စရေးနိုင်ငံသား ယာဟွန်းနဲ့ အမေရိကန်-အစ္စရေးနိုင်ငံသား ဆာဂူဒီကယ်ချန်းတို့ ဖြစ်ပါတယ်။

ဓါးစာခံသုံးယောက်ကို စနေ့နေ့မှာ အချိန်မီပြန်မလွှတ်ဘူးဆိုရင် ဂါဇာမှာ ဗုံးကြဲတိုက်ခိုက်မှုတွေ ပြန်လည်စတင်မယ်လို့ အစ္စရေးက ခြိမ်းခြောက်ထားပါတယ်။ အစ္စရေးက အပစ်အခတ်ရပ်စဲရေးကို ချိုးဖောက်တယ်ဆိုကာ ဓါးစာခံတွေ ပြန်လွှတ်ပေးရေးကို ဟားမတ်စ်တို့က ဆိုင်းငံ့ကြောင်း ကြေညာပြီးနောက်မှာ အစ္စရေးက သတိပေးခဲ့တာဖြစ်ပါတယ်။

ဂါဇာကမ်းမြှောင်ဒေသသမှာ အဖမ်းခံထားရတဲ့ ဓါးစာခံတွေကို စနေ့နေ့မှာ ပြန်လွှတ်မပေးရင် အပစ်အခတ်ရပ်စဲရေး သဘောတူညီချက်ကို ဖျက်သိမ်းသင့်တယ်လို့ အမေရိကန်သမ္မတ ဒေါ်နယ်ထရန့်က ပြောကြားထားပါတယ်။

အပစ်အခတ်ရပ်စဲရေး စတင်ခဲ့တဲ့ ဇန်နဝါရီ ၁၉ ရက်မှစတင်ပြီး အစ္စရေးဓါးစာခံ ၂၁ ယောက်နဲ့ ပါလက်စတိုင်း အကျဉ်းသား ၇၆၆ ယောက်ကို လဲလှယ်ခဲ့ပြီးဖြစ်ပါတယ်။ အပစ်အခတ်ရပ်စဲရေး ပထမအဆင့် သီတင်းခြောက်ပတ်တာကာလအတွင်း ဓါးစာခံ ၃၃ ယောက်နဲ့ ပါလက်စတိုင်းအကျဉ်းသား ၁၉၀၀ ကို လဲလှယ်ဖို့ သဘောတူထားပါတယ်။

၂၀၂၃ ခုနှစ်အောက်တိုဘာ ၇ ရက်မှာ အစ္စရေးကို ဟားမတ်စ်တို့ရဲ့ နယ်စပ်ဖြတ်ကျော်တိုက်ခိုက်မှုအတွင်း လူ ၁၂၀၀ သေဆုံးပြီး ၂၅၁ ယောက်ကို ဓါးစာခံအဖြစ် ဂါဇာဒေကို ဖမ်းဆီးခေါ်ဆောင်သွားခဲ့ပါတယ်။ အစ္စရေးရဲ့ လက်တုံ့ပြန်တိုက်ခိုက်မှုကြောင့် ဂါဇာမှာလူပေါင်း လေးသောင်းရှစ်ထောင်ကျော် သေဆုံးခဲ့ရပါတယ်။

Ref:BBC
Photo: Hostages and Missing Families Forum

#သတင်းဟင်းလေးအိုးကြီး