#ယနေ့ထုတ်သတင်းစာ_သတင်း
◾️မြ၀တီမြို့ ဆန္ဒပြပွဲများကြောင့် ထိုင်းအစိုးရဆုံးဖြတ်ချက် ပြောင်းလဲသွားလိမ့်မည်မဟုတ်
မြ၀တီမြို့၌ ဖြပ်ဒေသစ်ပွားခဲ့သော ဆန္ဒပြပွဲများကြောင့် မြန်မာနယ်စပ်ဒေသများအတွက် လျှပ်စစ်ဓာတ်အား၊ အင်တာနက်နှင့် လောင်စာဆီ ပေးပို့ဖြည့်ဆည်းမှုများ ဖြတ်တောက်ထားရေး ဆုံးဖြတ်ချက် ပြောင်းလဲသွားလိမ့်မည်မဟုတ်ကြောင်းထိုင်းကာကွယ်ရေးဝန်ကြီး ဝီချာယာချိုင်းဖေဖော် ဝါရီ ၁၁ ရက်တွင် ထုတ်ဖော်ပြောကြားလိုက်သည်။
မြန်မာနိုင်ငံဘက်ခြမ်းရှိ အွန်လိုင်းလိမ်လည်မှုလုပ်ငန်းများနှင့် အွန်လိုင်းလောင်းကစား လုပ်ငန်းများကိုဖြိုခွင်းရေး ရည်ရွယ်ချက်ဖြင့် ထိုင်းနိုင်ငံသည် မြန်မာနိုင်ငံ တာချီလိတ်မြို့၊မြ၀တီမြို့နှင့် ဘုရားသုံးဆူမြို့များသို့လျှပ်စစ်ဓာတ်အား၊ အင်တာနက်နှင့်လောင်စာဆီ ပေးပို့ ဖြည့်ဆည်းမှုများကို ပြီးခဲ့သည့် သီတင်းပတ်အတွင်းစတင်ဖြတ်တောက်ခဲ့သည်။
ထိုင်းအစိုးရ၏ အထက်ပါလုပ်ဆောင်ချက်ကို ကန့်ကွက်သည့်အနေဖြင့် မြ၀တီမြို့၌ ဖေဖော်ဝါရီ ၈ ရက်တွင် ဆန္ဒပြပွဲဖြစ်ပွားခဲ့ပြီး ဆန္ဒပြသမားများက မြန်မာနိုင်ငံနှင့် ထိုင်းနိုင်ငံ တာ့ခ်ပြည်နယ်တို့ကို ချိတ်ဆက်ပေးထားသော ထိုင်း-မြန်မာ ချစ်ကြည်ရေးတံတားများကို ပိတ်ထားရန် မြန်မာတာဝန်ရှိသူများကိုတောင်းဆိုခဲ့ကြသည်။
သို့ရာတွင် အထက်ပါ မြ၀တီမြို့ ဆန္ဒပြပွဲကြောင့် ထိုင်းအစိုးရ၏ဆုံးဖြတ်ချက် ယိုင်နဲ့ပြောင်းလဲသွားလိမ့်မည် မဟုတ်ကြောင်း ထိုင်းကာကွယ်ရေးဝန်ကြီး ဝီချာယာချိုင်းကပြောကြားခဲ့သည်။
ယင်းအပြင် မြ၀တီမြို့မှ ဆန္ဒပြသမားများအနေဖြင့် မြန်မာနယ်စပ်တစ်လျှောက်ရှိ အွန်လိုင်းလိမ်လည်မှုလုပ်ငန်းများအားလုံးကို ဖယ်ရှားပေးရေးအတွက် သက်ဆိုင်ရာ မြန်မာတာဝန်ရှိသူများကို တိုက်တွန်းသင့်ကြောင်း ထိုင်းကာကွယ်ရေးဝန်ကြီးက ပြောကြားခဲ့သည်။
ထိုင်းကာကွယ်ရေး ဝန်ကြီးဝီချာယာချိုင်းသည် ဖေဖော်ဝါရီ ၁၂ ရက်နှင့် ၁၆ ရက်တို့တွင် မြန်မာနိုင်ငံဘုရားသုံးဆူမြို့နှင့် ကမ္ဘောဒီးယားနိုင်ငံ ပွိုင်ပက်မြို့များသို့ သွားရောက်၍အခြေအနေများကို စစ်ဆေးမည်ဖြစ်ကြောင်း သိရသည်။
သို့ရာတွင် အထက်ပါခရီးစဉ်များအတွင်း မည်သူတို့နှင့် တွေ့ဆုံဆွေးနွေးမည်ကို ထိုင်းကာကွယ်ရေးဝန်ကြီးက ထုတ်ဖော်ပြောကြားထားခြင်း မရှိပေ။
ထိုင်းအာဏာပိုင်များအနေဖြင့် မြန်မာနိုင်ငံသို့ နေစွမ်းအင်ပြားများ တင်ပို့မှု ရှောင်ရှားရန် စီးပွားရေးလုပ်ငန်းများကို အကြံပေးထားချိန်တွင် ထိုင်းအမျိုးသားကောင်စီကလည်း မြန်မာဘက်ခြမ်းရှိ အွန်လိုင်းလိမ်လည်မှုလုပ်ငန်းများ နေစွမ်းအင်ပြားအသုံးပြု ထုတ်ယူနိုင်မှုကိုပိတ်ပင်ရေးအတွက် မြန်မာဘက်ခြမ်းသို့ နေစွမ်းအင်ပြားများ တင်ပို့မှု တရားဝင်ပိတ်သိမ်းထားရေးကိုလည်း စဉ်းစားနေကြောင်း သိရသည်။