ဂရင်းလန်းကို ရမည်ဟု ယုံကြည်ကြောင်း ထရမ့်ပြော
...........
အမေရိကန်အနေနဲ့ ဂရင်းလန်းကို ထိန်းချုပ်ခွင့် ရမယ်လို့ ယုံကြည်ကြောင်း သမ္မတသစ် ဒေါ်နယ်ထရမ့်က ဇန်နဝါရီ ၂၅ ရက်မှာ သတင်းထောက်တွေကို ပြောပါတယ်။
ဂရင်းလန်းကိုရတော့မယ်လို့ Air Force One လေယာဉ်ပေါ်မှာ ထရမ့်က သတင်းထောက်တွေကို ပြောခဲ့တာဖြစ်ပြီး ဂရင်းလန်းမှာနေထိုင်တဲ့ လူ ၅၇၀၀၀ လောက်ကလည်း မိမိတို့နဲ့ အတူရှိချင်တယ်လို့ ယူဆကြောင်း သူက ဆိုပါတယ်။
ဒိန်းမတ်နိုင်ငံထဲက ကိုယ်ပိုင်အုပ်ချုပ်ခွင့်ရ ကျွန်းဖြစ်တဲ့ ဂရင်းလန်းကို ဝယ်ယူလိုကြောင်း ပြီးခဲ့တဲ့လပိုင်းတွေထဲက ထရမ့်ဟာ ပြန်အစဖော်လာတာဖြစ်ပြီး လက်ရှိမှာ အခုလို ထပ်ပြောလာတာလည်း ဖြစ်ပါတယ်။
ပြီးခဲ့တဲ့သီတင်းပတ်မှာ ဒိန်းမတ်ဝန်ကြီးချုပ်နဲ့ ထရမ့်တို့ ၄၅ မိနစ်ကြာ ဖုန်းဆက်သွယ်စကားပြောဆိုခဲ့ပြီး ဒိန်းမတ်ဝန်ကြီးချုပ်ကတော့ ဂရင်းလန်းဟာ ရောင်းဖို့မဟုတ်ဘူးလို့ ပြောခဲ့ကြောင်း သတင်းတွေမှာ ဖော်ပြပါတယ်။
ဂရင်းလန်းရဲ့ ဝန်ကြီးချုပ်ကလည်း ဂရင်းလန်းဟာ ရောင်းရန်မဟုတ်လို့ ပြီးခဲ့တဲ့လပိုင်းတည်းက ပြောထားပါတယ်။
ဒေါ်နယ်ထရမ့်ဟာ ပြီးခဲ့တဲ့ ၂၀၁၉ ခုနှစ် သူ့ရဲ့ပထမ သမ္မသက်တမ်းအတွင်းကလည်း ဂရင်းလန်းကို ဝယ်ယူဖို့ အဆိုပြုဖူးပါတယ်။
အာတိတ်ဒေသထဲက ဂရင်းလန်းဟာ ရေနံ၊ သဘာဝဓာတ်ငွေ့၊ မြေရှားသတ္တုအပါအဝင် သယံဇာတတွေ ပေါများတာ၊ အာတိတ်ဒေသမှ သင်္ဘောလမ်းကြောင်းအသစ်တွေ ပေါ်ထွက်လာနိုင်တာနဲ့ စစ်ရေးမဟာဗျူဟာအရ အချက်အခြာကျနေတာကြောင့် အမေရိကန်အနေနဲ့ ဂရင်းလန်းကို ထိန်းချုပ်ခွင့်ရဖို့ မျက်စိကျနေတာ ဖြစ်ပါတယ်။