Level-2 အဆင့်ထိရောက်ခဲ့သော ဒဂုံအရှေ့စက်မှုဇုန်ရှိ ကော်စေ့စက်ရုံမီးလောင်မှုအား ကိုးနာရီခန့်ကြာငြှိမ်းသတ်ခဲ့ရ
ရန်ကုန်တိုင်း၊ ဒဂုံမြို့သစ်(အရှေ့ပိုင်း)မြို့နယ်ရှိ ဒဂုံအရှေ့စက်မှုဇုန်ရှိ ကော်စေ့စက်ရုံတွင် ယမန်နေ့ည ၆ နာရီ ၅၇ မိနစ်ခန့်ကစတင်၍ မီးလောင်မှုဖြစ်ပွားခဲ့ရာ ယနေ့ ဒီဇင်ဘာ ၆ ရက်နံနက် ၃ နာရီ ၄၁ မိနစ်မှသာ အပြီးသတ်ငြှိမ်းသတ်နိုင်ခဲ့ကြောင်း မီးသတ်တပ်ဖွဲ့နှင့်လူမှုကူညီရေးအသင်းဝင်များထံမှ သိရသည်။
ဒဂုံမြို့သစ်(အရှေ့ပိုင်း)မြို့နယ်၊ ဒဂုံအရှေ့စက်မှုဇုန်၊ ပြင်စည်မင်းသားကြီးလမ်းရှိ ကော်စေ့စက်ရုံတွင်မီးလောင်မှုဖြစ်ပွား၍ ဗဟိုမီးသတ်စခန်း၊ ခရိုင်မီးသတ်စခန်း၊ ဒဂုံမြို့သစ်(အရှေ့ပိုင်း)မြို့နယ်မီးသတ်စခန်းနှင့် ထိစပ်နယ်မြေများမှမီးသတ်စခန်းများအပါအဝင် အရန်မီးသတ်တပ်ဖွဲ့ဝင်များ၊ လူမှုကူညီရေးအသင်းများ၊ ကြက်ခြေနီတပ်ဖွဲ့ဝင်များက Level-1အဆင့်ဖြင့် ပူးပေါင်းငြှိမ်းသတ်ခဲ့ကြသည်။
" မီးကည ၈ နာရီကျော်လောက်မှာ ခနလောက်ထိန်းနိုင်သွားခဲ့တယ်။ ဖြစ်ချင်တော့ မီးလောင်အားကောင်းတဲ့ အနေအထားဖြစ်နေတဲ့အခါ မီးထိန်းထားနိုင်ရာကနေ ပြန်ပြီးလောင်တယ်။ ပြန်လောင်တဲ့မီးက အတော်ပြင်းတယ်။ မီးသတ်တပ် ဖွဲ့ဝင်တွေကော လူမှုကူညီရေးအသင်းဝင်တွေကော ဒဏ်ရာရတာ၊ မီးခိုးမွှန်တာတွေဖြစ်ကြတယ်။ အရေအတွက်ကတော့ တိတိကျကျမမှတ်ထားမိဘူး။ မီးငြိမ်းဖို့ကိုဘဲအာရုံစိုက်နေရတာဆိုတော့ သတိမထားမိတာပါ"ဟု လူမှုကူညီရေးအသင်းဝင်တစ်ဦးကပြောသည်။
ထိုသို့ Level-1 အဆင့်ဖြင့် ငြှိမ်းသတ်ခဲ့ကြသော် လည်း ဆက်လက်လောင်ကျွမ်းခဲ့မှုကြောင့် ည ၉ နာရီ ၃၂ မိနစ်၌ Level-2 အဆင့်ဖြင့် ထပ်မံငြှိမ်းသတ်ခဲ့ကြသဖြင့် ယနေ့ ဒီဇင်ဘာ ၆ ရက်နံနက် ၃ နာရီ ၄၁ မိနစ်တွင် မီးငြိမ်းသွားခဲ့ကြောင်း သိရသည်။
ဖြစ်စဥ်တွင် ထိခိုက်ဒဏ်ရာရသူများနှင့် မီးခိုးမွှန်မှုများကြုံတွေ့ခဲ့ရသူများကို ကြက်ခြေနီအသင်းဝင်များနှင့် လူမှုကူညီရေးအသင်းဝင်များက မြေပြင်ကုသမှုများကို လျင်မြန်စွာပြုလုပ်ပေးခဲ့ကြကြောင်း သိရသည်။
ထို့ပြင် မီးစတင်လောင်ကျွမ်းရသည့်အကြောင်း ရင်းနှင့်ပျက်စီးဆုံးရှုံးမှုတန်ဖိုးအား မီးသတ်တပ် ဖွဲ့တာဝန်ရှိသူများကစစ်ဆေးလျက်ရှိပြီး ဥပဒေအရဆက်လက်အရေးယူနိုင်ရန် ဆောင်ရွက်လျက်ရှိကြောင်း သိရသည်။
