တန်ဆောင်တိုင် ပွဲတော်ကာလအတွင်း ကျိုက်ထီးရိုးစေတီတော်သို့ ဘုရားဖူးလာရောက်သူ (၃၀၀၀၀) ကျော်ရှိ
မွန်ပြည်နယ်၊ ကျိုက်ထိုမြို့နယ်ရှိ ဆံတော်ရှင်ကျိုက်ထီးရိုးစေတီတော်သို့ တန်ဆောင်တိုင်ပွဲတော်ကာလအတွင်း ဘုရားဖူးလာရောက်သူ (၃၀၀၀၀) ကျော် ရှိကြောင်း ဆံတော်ရှင်ကျိုက်ထီးရိုးစေတီတော် ဂေါပကအဖွဲ့ဝင်တစ်ဦး၏ ပြောကြားချက်အရ သိရသည်။
ဆံတော်ရှင် ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်အား သီတင်းကျွတ်လပြည့်နေ့ အောက်တိုဘာ (၁၇) ရက်နေ့မှ စည်ကားသိုက်မြိုက်စွာ စတင်ဖွင့်လှစ်ခဲ့ပြီး ၂၀၂၅ ခုနှစ် မေလ (၁၁) ရက် ကဆုန်လပြည့်နေ့အထိ (၇) လတိုင်တိုင် ကျင်းပလျက်ရှိရာ စနေ၊ တနင်္ဂနွေရုံးပိတ်ရက်များတွင်လည်း ဘုရားဖူးလာရောက်သူပိုမိုများပြားကြောင်း သိရသည်။
ယခုနှစ် တန်ဆောင်တိုင်ပွဲတော်ကာလတွင် ကျိုက်ထီးရိုးစေတီတော်အပြင် ချောင်းသာ၊ ငွေဆောင် စသည့်ကမ်းခြေ ဒေသများ၊ နေပြည်တော်ရှိ မာရဝိဇယဗုဒ္ဓ ရုပ်ပွားတော်မြတ်ကြီး၊ တောင်ကြီးတန်ဆောင်တိုင် ပွဲတော်အပါအဝင် ဒေသအသီးသီးရှိ ဘုရားစေတီပုထိုးများ၌လည်း ဘုရားဖူးလာရောက်သူများဖြင့် စည်ကားများပြားခဲ့ကြောင်း သိရသည်။
