ဗထူးစစ်ဆေးရေးဂိတ်မှာ အတက်ကားတွေပေးမဖြတ်တော့လို့ ရှမ်းတောင်ကကုန်တွေ ရှမ်းမြောက်ကို သယ်ခွင့်မရတော့

နိုဝင်ဘာ ၁၂

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ဗထူးတပ်မြို့ရှိ စစ်ဆေးရေးဂိတ်မှာ ဒီကနေ့ နိုဝင်ဘာ ၁၁ရက်က စတင်ပြီး ရှမ်းပြည်နယ်မြောက်ပိုင်းကို ပြန်မယ့် ခရီးသည်တင်ယာဉ်တွေ၊ ကုန်စည်တင်ပို့မယ့် ကုန်တင်ယာဉ်တွေကို ရက်အကန့်အသတ်မရှိပိတ်ပင်လိုက်ပြီဖြစ်တယ်လို့ ကုန်တင်ကားသမားတွေထံကနေ သိရပါတယ်။

ရှမ်းပြည်နယ်တောင်ပိုင်းနဲ့ မြောက်ပိုင်းကို ဆက်သွယ်ရာ အဲဒီလမ်းကြောင်းမှာ အတက်ကားတွေကို ပိတ်ပင်လိုက်တာကြောင့် ရှမ်းတောင်က ကုန်စည်တွေ ရှမ်းမြောက်ကို တင်ပို့ခွင့်မရတော့သလို နေရပ်ပြန်လိုသူတွေအနေနဲ့ တခြားလမ်းကြောင်းကနေသာ ပြန်ရတော့မှာဖြစ်တယ်လို့ သိရပါတယ်။

“မနက်ကတည်းက ရက်အကန့်အသတ်မရှိပိတ်လိုက်ပြီဆိုပြီး ပြောလာတာ။ ကားအစီးရေ ၁၀၀ကျော်လောက် အဲဒီမှာ ပိတ်မိနေကြတယ်။ အခုတော့ ပြန်လှည့်ဖို့ပြင်ဆင်နေကြပြီ။ ကုန်စည်တွေ ပျက်စီးတာမျိုးတော့ မရှိဘူး။ စိတ်ရော၊ လူပါ ပင်ပန်းရတာပေါ့ဗျာ။ အဆင်းကားတွေကိုလည်း ဗထူးတပ်နဲ့ တမိုင်ကျော်ကျော်လောက်မှာ SSPPက ဂိတ်လုပ်ပြီး ပိုက်ဆံတောင်းနေတယ်။ ဘယ်သူမှ ဘာမှမပြောရဲကြတော့လည်း ကျနော်တို့လို ကားကြီးသမားတွေ၊ ခရီးသည်ကားသမားတွေပဲ ခံရတာပေါ့”လို့ ကားသမားတယောက်က ပြောပါတယ်။

အတက်ကားတွေကို ပိတ်ထားပေမယ့် ရှမ်းပြည်နယ်မြောက်ပိုင်းကနေ တောင်ပိုင်းကို ဆင်းလာတဲ့ ခရီးသည်တင်ယာဉ်တွေ၊ ကုန်တင်ယာဉ်တွေကိုတော့ စစ်ဆေးမှုတွေပြုလုပ်ကာ ပုံမှန်အတိုင်း ဖြတ်သန်းသွားလာခွင့်ပြုထားတယ်လို့ သိရပါတယ်။

အဲဒီဗထူး-အင်တော-ကျောက်ဂူလမ်းပိုင်းကို ကျော်ဖြတ်လာပါက နစကအမြောက်တပ်စခန်း လေးခုအခြေစိုက်ရာ တောင်းခမ်းဒေသမှာ နစကတပ်ဖွဲ့နဲ့ TNLAပူးပေါင်းတပ်ဖွဲ့တို့ ထိတွေ့ပစ်ခတ်မှုတွေ ရှိနေတယ်လို့လည်း သိရပါတယ်။

ရှမ်းတောင်နဲ့ ရှမ်းမြောက်ကို ဆက်သွယ်ထားတဲ့ ကျောက်ဂူ-နမ့်လန်လမ်းပိုင်းမှာလည်း ပြီးခဲ့တဲ့ ရက်ပိုင်းက မိုးရွာသွန်းမှုကြောင့် ဗွက်ပြန်ထကာ ယာဉ်တွေ ဗွက်နစ်တာ၊ ထွန်စက်နဲ့ ဆွဲတင်ရတာတွေကြောင့် ယာဉ် အစီးရေ (၃၀၀) ကျော်ပိတ်ဆို့မှုဖြစ်ပွားခဲ့ပေမယ့် နိုဝင်ဘာလ ၁၁ရက်၊ ညနေပိုင်းကစတင်ပြီး ပုံမှန်အတိုင်း သွားလာလို့ ရနေပြီဖြစ်တယ်လို့ သိရပါတယ်။

Photo:CJ

Credit - VOM

#သတင်းဟင်းလေးအိုးကြီး