မလေးရှားကိုတရားမဝင်သွားတဲ့ မြန်မာ ၂၄ ဦး ထိုင်းမှာ ဖမ်းမိ
နိုဝင်ဘာ ၁၃
မလေးရှားနိုင်ငံကို သွားမယ့် တရားမဝင်မြန်မာနိုင်ငံသား ၂၄ ဦးကို ထိုင်းနိုင်ငံ၊ ဟတ်ယိုင်ခရိုင်မှာ ထိုင်းအာဏာပိုင်တွေက ဖမ်းဆီးခဲ့တယ်လို့ ထိုင်းဘက်ကလာတဲ့သတင်းတွေမှာ ဖော်ပြပါတယ်။
ဟတ်ယိုင်ခရိုင်အတွင်းက လမ်းမတခုပေါ်ဖြတ်သန်းသွားတဲ့ pickup အမျိုးအစား ထရပ်ကားတစ်စင်းကို မနေ့ နိုဝင်ဘာ ၁၂ ရက်မနက် အစောပိုင်းမှာ ထိုင်းလူဝင်မှုကြီးကြပ်ရေးနဲ့ ရဲတွေက ပူးပေါင်းစစ်ဆေးခဲ့ရာကနေ တရားမဝင်မြန်မာသုံးဦးကို အရင်ဆုံးဖမ်းဆီးမိခဲ့တာပါ။
ဒီလိုတရားမဝင်လိုက်ပါလာတဲ့ မြန်မာသုံးဦးကိုတွေ့ဆုံဖို့ မော်တော်ဆိုင်ကယ်နဲ့လိုက်ပါလာတဲ့ အသက် ၂၅ နှစ်အရွယ် မြန်မာအမျိုးသားတစ်ဦးကို ထပ်မံဖမ်းဆီးခဲ့ပါတယ်။
အဲဒီအမျိုးသားကတဆင့် ဟတ်ယိုင်မြို့ပေါ်က နေအိမ် ၃ လုံးကို ဆက်တိုက်ရှာဖွေခဲ့ပြီး တရားမဝင်မြန်မာ ၂၁ ဦးကို ထပ်မံဖမ်းဆီးမိခဲ့တာလို့လည်း ထိုင်းသတင်းတွေအရသိရပါတယ်။
တရားမဝင် မြန်မာသုံးဦးကိုတင်ဆောင်လာတဲ့ ထရပ်ကားကို အသက် ၇၀ အရွယ် ထိုင်းအမျိုးသားတစ်ဦးက မောင်းနှင်လာတာဖြစ်ပြီး ဆူရက်သနီပြည်နယ်ကနေ ဟတ်ယိုင်ပြည်နယ်ကိုပို့ဆောင်ပေးခ ဘတ် ၁,၅၀၀ ရတယ်လို့ ဆိုပြီး အသက် ၂၅ နှစ်အရွယ် မြန်မာအမျိုးသားကတော့ မလေးရှားကိုပို့ဆောင်ဖို့ တာဝန်ယူထားတယ်လို့ ပြောပါတယ်။
ဒီလိုတရားမဝင်လူပို့ဆောင်တဲ့ ထိုင်းကားသမားရော မြန်မာကိုပါ ထိုင်းဥပဒေအရအရေးယူဖို့လည်းရှိနေပါတယ်။ ထိုင်းအာဏာပိုင်တွေရဲ့ထုတ်ပြန်ချက်အရ ဇွန်ကနေ အောက်တိုဘာလအထိ တရားမဝင်မြန်မာ ၂ သိန်းကျော် ဖမ်းဆီးခဲ့ပါတယ်။
#centtalnewsnaypyitaw
