အာဆီယံနိုင်ငံတပ်တွေသေနတ်ပစ်ပြိုင်ပွဲမှာ မြန်မာ့တပ်မတော် ဝင်ပြိုင်
နိုဝင်ဘာ ၁၃၊ နေပြည်တော်။
ဖိလစ်ပိုင်နိုင်ငံက ဦးစီးကျင်းပတဲ့ ၃၂ ကြိမ်မြောက် အာဆီယံအဖွဲ့ဝင် နိုင်ငံတွေက ကြည်းတပ်တွေရဲ့ သေနတ်ပစ်ပြိုင်ပွဲမှာ မြန်မာ့တပ်မတော် သေနတ်ပစ်အသင်းက ဝင်ပြိုင်ဖို့ရှိနေတယ်လို့ ဒီနေ့ နိုဝင်ဘာ ၁၃ ရက် ထုတ်သတင်းစာမှာ ဖော်ပြပါတယ်။
အာဆီယံ အဖွဲ့ဝင်နိုင်ငံတွေရဲ့ တပ်တွေကြား ပူးပေါင်းဆောင်ရွက်မှုကို ဆက်တိုးမြှင့်ဖို့ ရည်ရွယ်ပြီး ဒီသေနတ်ပစ်ပြိုင်ပွဲကို နှစ်စဉ်ကျင်းပလေ့ ရှိနေတာပါ။
သေနတ်ပစ်ပြိုင်ပွဲ (ASEAN Armies Rifle Meet၊ AARM) ကို ဒီနှစ်မှာ ဖိလစ်ပိုင်နိုင်ငံက ဦးဆောင်ကျင်းပတာဖြစ်ပြီး ဒီပြိုင်ပွဲဟာ အာဆီယံနိုင်ငံတပ်တွေ ပူးပေါင်းဆောင်ရွက်တဲ့ ထိပ်သီးတွေ့ဆုံမှု ၃ ခုထဲက တစ်ခုအပါအဝင် ဖြစ်ပါတယ်။
အခုနှစ်ပြိုင်ပွဲကို နိုဝင်ဘာ ၁၂ ရက်ကနေ ၂၃ ရက်အထိ ကျင်းပသွားမှာဖြစ်ပြီး မြန်မာစစ်တပ်သေနတ်ပစ် အသင်းခေါင်းဆောင် ဒုတိယဗိုလ်မှူးကြီးသိန်းစိုးထွန်း ဦးဆောင်ကာ မြန်မာတပ်ဖွဲ့ဝင် ၄၂ ဦး ဝင်ရောက်ယှဉ်ပြိုင်မယ့်အကြောင်း သတင်းစာမှာ ဖော်ပြထားတာပါ။
ရိုင်ဖယ်အသင်း၊ ကာဘိုင်အသင်း၊ စက်သေနက်အသင်း၊ ပစ္စတိုအမျိုးသားအသင်းနဲ့ ပစ္စတိုအမျိုးသမီးအသင်းတို့ ပါဝင်ယှဉ်ပြိုင်မှာဖြစ်ပါတယ်။
၂၀၂၁ ခုနှစ်စစ်အာဏာထိမ်းပြီးနောက်ပိုင်းလည်း အာဆီယံနိုင်ငံတပ်တွေရဲ့ တွေ့ဆုံပွဲတွေမှာ မြန်မာစစ်တပ်ဆက် ပါဝင်နေဆဲဖြစ်ပြီး လေးနှစ်အတွင်း မြန်မာတပ်ဘက်က ပါဝင်ယှဉ်ပြိုင်သူအရေအတွက်လည်းများလာတာကို နှစ်စဉ်ထုတ်ပြန်ချက်တွေအရ သိရပါတယ်။
#centralnewsnaypyitaw
