ထရမ့်ပ်နှင့် ပူတင် ဖုန်းပြောသည့် သတင်း ခရမ်မလင် ငြင်း
ပြီးခဲ့သည့် သီတင်းပတ်အတွင်းက အမေရိက ရွေးကောက်ခံသမ္မတ ဒေါ်နယ်ထရမ့်ပ်နှင့် ရုရှားသမ္မတ ဗလာဒီမာပူတင်တို့ ယူကရိန်းစစ်ပွဲနှင့် ပတ်သက်၍ စကားပြောဆိုခဲ့သည်ဆိုသော သတင်းများကို ခရမ်မလင်က တနင်္လာနေ့တွင် ငြင်းဆိုသွားခဲ့သည်။ ထရမ့်ပ်၏ ပြောရေးဆိုခွင့်ရှိသူတစ်ဦးကလည်း ထရမ့်ပ်နှင့် ကမ္ဘာ့ခေါင်းဆောင်များအကြား သီးသန့်ဖုန်းပြောမှုများကို မှတ်ချက်ပေးရန်မရှိဟု ပြောဆိုခဲ့သေးသည်။
အမည်မဖော်သော သတင်းရင်းမြစ်များကို ကိုးကား၍ အဆိုပါသတင်းကို ဝါရှင်တန်ပို့စ် သတင်းဌာနက တနင်္ဂနွေနေ့တွင် ပထမဆုံးဖော်ပြခဲ့ပြီး ၎င်းတို့နှစ်ဦးအကြား ကြာသပတေးနေ့က ဖုန်းပြောဆိုမှုအတွင်း ယူကရိန်းတွင် စစ်ရှိန်မမြှင့်ရန် ထရမ့်ပ်က ပူတင်ကို အကြံပြုခဲ့ကြောင်းနှင့် ဥရောပတွင် အမေရိကန်စစ်တပ် အင်အားကြီးမားစွာ တည်ရှိနေမှုကို ထောက်ပြခဲ့ကြောင်း ဆိုသည်။
တနင်္လာနေ့က သတင်းသမားများနှင့် သတင်းထုတ်ပြန်ပြောဆိုရာတွင် ခရမ်မလင် ပြောရေးဆိုခွင့်ရှိသူ ဒီမစ်ထရီ ပက်စ်ကော့ဗ်က စကားပြောဆိုခဲ့ခြင်း မရှိကြောင်း၊ အဆိုပါသတင်းသည် လုံး၀ မမှန်ကြောင်းနှင့် စိတ်ကူးယဉ်မှု သက်သက်သာဖြစ်ကြောင်း ပြောကြားခဲ့သည်။
ရုရှားနိုင်ငံ ပင်လယ်နက်အပန်းဖြေစခန်း ဆိုချီတွင် ကြာသပတေးနေ့က ပြုလုပ်သည့် နိုင်ငံခြားရေးမူဝါဒဖိုရမ်တွင် ပူတင်က ရွေးကောက်ပွဲအနိုင်ရမှုအတွက် ထရမ့်ပ်ကို ဂုဏ်ပြုစကား ဆိုခဲ့သကဲ့သို့ ဇူလိုင်လအတွင်းက သူ့ကို လုပ်ကြံရန်ကြိုးပမ်းမှုအတွင်း ရဲရင့်သော အပြုအမူကို ချီးကျူးခဲ့ကြောင်းလည်း သိရသည်။
