စင်ကာပူအသင်းဖြင့် ခြေစမ်းပွဲကစားမည့် မြန်မာကစားသမားစာရင်းတွင် တိုက်စစ်မှူး သန်းပိုင်နှင့် လွင်မိုးအောင် မပါဝင်
စင်ကာပူနိုင်ငံက အိမ်ရှင်အဖြစ် လက်ခံကျင်းပမည့် ဖီဖာနိုင်ငံတကာ ခြေစမ်းပွဲစဉ်အတွက် ကစားသမားစာရင်းထုတ်ပြန်လိုက်ပြီဖြစ်ရာ၊ ယင်းပွဲစဉ်အတွင်းလက်ရွေးစင် တိုက်စစ်မှူးများဖြစ်ကြသည့် သန်းပိုင်နှင့် လွင်မိုးအောင် ပါဝင်လာခြင်း မရှိသည်ကိုတွေ့ရသည်။
မြန်မာနိုင်ငံဘောလုံးအဖွဲ့ချုပ်မှ ထုတ်ပြန်လာသည့် ကစားသမားစာရင်းတွင် လွင်မိုးအောင်အနေဖြင့် သီရိလင်္ကာနှင့်ပွဲစဉ်အတွင်း အနီကတ် ပွဲပယ်ပြစ်ဒဏ်ထိထားသည့်အတွက် ပါဝင်နိုင်ခြင်းမရှိသလို ဒဏ်ရာရကစားသမားအချို့လည်း ပါဝင်နိုင်ခြင်းမရှိဟု အသိပေးထားသည်။
တိုက်စစ်မှူး သန်းပိုင် မပါဝင်လာသည့်အပေါ် သီးခြား အသိပေးထုတ်ပြန်ထားခြင်းမရှိပေ။
မြန်မာအသင်းနှင့် စင်ကာပူအသင်းတို့သည် နိုဝင်ဘာ ၁၄ ရက် မြန်မာစံတော်ချိန် ညနေ၆နာရီခွဲအချိန်တွင် စင်ကာပူ အမျိုးသားအားကစားကွင်းတွင် ယှဉ်ပြိုင်ကစားကြမည်ဖြစ်သည်။
ကမ္ဘာ့ဘောလုံးအဖွဲ့ချုပ် (FIFA)၏ အဆင့်သတ်မှတ်ချက်အရ မြန်မာအသင်းသည့် လက်ရှိ ဖီဖာအဆင့် ၁၆၅ တွင် ရပ်တည်နေပြီး၊ စင်ကာပူအသင်းသည် ဖီဖာအဆင့်-၁၆၂တွင် အသီးသီးရပ်တည်နေကြကြောင်း သိရသည်။
ခြေစမ်းပွဲအတွက် မြန်မာ့လက်ရွေးစင်အသင်း ကစားသမားများရွေးချယ်ရာတွင် ဂိုးသမားအဖြစ် ကျော်ဇင်ဖြိုး၊ ပြည့်ဖြိုးသူ (ရှမ်းယူနိုက်တက်)၊ နေလင်းထက် (ဟံသာဝတီ ယူနိုက်တက်)၊ နောက်တန်းကစားသမားအဖြစ် ဟိန်းဖြိုးဝင်း၊ အောင်ဝဏ္ဏစိုး၊ ဇွဲခန့်မင်း၊ သက်ဟိန်းစိုး၊ နန္ဒကျော် (ရှမ်းယူနိုက်တက်)၊ ဇော်ရဲထွန်း (ဒဂုံစတား)၊ သူရိန်စိုး၊ကျော်ဖြိုးဝေ (ရန်ကုန် ယူနိုက်တက်)၊ စိုးမိုးကျော် (Tiffy Army, Cambodia)တို့ကို ရွေးချယ်ထားသည်။
အလယ်တန်းကစားသမားအဖြစ် ဝေလင်းအောင်၊ ဇော်ဝင်းသိန်း၊ ဥက္ကာနိုင် (ရန်ကုန် ယူနိုက်တက်)၊ လာဒင်မောရာ (ဟံသာ၀တီ ယူနိုက်တက်)၊ ခိုင်ရဲဝင်း (ISPE FC)၊ မြတ်ကောင်းခန့်၊ ရဲရင့်အောင် (ရှမ်းယူနိုက်တက်)၊ သီဟဇော် (Naga World, Cambodia)၊ ဟိန်းထက်အောင် (Negeri Sembilan, Malaysia)၊ ဆွမ်လန်မန် (ဒဂုံစတား)၊ မောင်မောင်လွင် (Lamphun Warrior, Thailand)တို့ကိုရွေးချယ်ထားသည်။
ထို့အတူ ရှေ့တန်း ကစားသမားအဖြစ် သန်းတိုးအောင် (ဟံသာ၀တီ ယူနိုက်တက်)၊ ဝင်းနိုင်ထွန်း (Chiangrai United, Thailand)တို့ကိုရွေးချယ်ထားသည်။
မြန်မာ့လက်ရွေးစင်အသင်းသည် စင်ကာပူနှင့် ခြေစမ်းပွဲပြီးပါက နိုဝင်ဘာ ၁၉ ရက်၊ ညနေ ၅နာရီအချိန်တွင် ရန်ကုန်မြို့သုဝဏ္ဏကွင်းတွင် ဖီဖာ ကမ္ဘာ့အဆင့် ၁၁၅ ရှိသည့် လက်ဘနွန်အသင်းနှင့် ဆက်လက်ခြေစမ်းကစားကြရမည်ဖြစ်သည်။
ဓာတ်ပုံ-လက်ရွေးကစားသမားများ လေ့ကျင့်ပြင်ဆင်နေသည့် ပုံရိပ်အချို့
