အာဆီယံ ဖူဆယ်ချန်ပီယံရှစ် အုပ်စုဒုတိယအကျော့ပွဲစဉ် မြန်မာအသင်းအနိုင်ရပြန်
၂၀၂၄ အာဆီယံ ဖူဆယ်ချန်ပီယံရှစ်အုပ်စု ဒုတိယအကျော့ပွဲစဉ်ကို ယနေ့ နိုဝင်ဘာ (၅) ရက် နံနက်ပိုင်းက ကမ္ဘောဒီးယားအသင်းနှင့် ယှဉ်ပြိုင်ကစားရာ မြန်မာလင်ရွေးစင်ဖူဆယ်အသင်း ထပ်မံအနိုင်ရရှိခဲ့ပြန်သည်။
ယနေ့ ပွဲစဉ်အတွင်း မြန်မာအသင်းက ပြိုင်ဘက်အသင်းကို (၅) ဂိုးသွင်းယူနိုင်ခဲ့ပြီး၊ ကမ္ဘောဒီးယားအသင်းက (၄) ဂိုး သွင်းယူခဲ့ကြခြင်းဖြစ်သည်။
ယမန်နေ့က အုပ်စုအဖွင့်ပွဲစဉ်အတွင်း မြန်မာအသင်းက ဩစတြေးလျအသင်းကို (၃)ဂိုးစီဖြင့် သရေရလဒ်ထွက်ပေါ်အောင် ကစားပြနိုင်ခဲ့သည်။
မြန်မာ့လက်ရွေးစင် ဖူဆယ် အသင်းနည်းပြချုပ် Mr. Bunl ert Cheorawong က "ဒီနေ့ပွဲမှာ ကမ္ဘောဒီး ယားအသင်းက အရင်ကထက်ပိုကောင်းအောင်ပြင်ဆင်လာခဲ့တယ်။ ဒီနေ့ ကျွန်တော်တို့ အသင်းဟာ ပြိုင်ဘက် ကစားကွက် နောက်ကိုလိုက်ပြီး ကစားနေခဲ့တယ်။ ဒုတိယပိုင်းမှာ ကစားကွက်ပိုမိုကောင်းမွန်လာခဲ့ပေမယ့် တိကျတဲ့ အဆုံးသတ်တွေတော့ မရရှိခဲ့ပါဘူး။ ဒါပေမဲ့ တိုက်ပွဲဝင် စိတ်ဓါတ်အပြည့်နဲ့ အနိုင် ရရှိအောင် ကစားပေးခဲ့တဲ့ ကစားသမားအားလုံးကို ကျေးဇူးတင်ပါတယ်"ဟု ပွဲပြီး သုံးသပ်စကားပြောကြားခဲ့သည်။
မြန်မာအသင်းအနေဖြင့် မနက်ဖြန် နိုဝင်ဘာ (၆) ရက်တွင် အင်ဒိုနီးရှားအသင်းဖြင့် အုပ်စုအဆင့် နောက်ဆုံးပွဲစဉ်ကို ဆက်လက် ကစားသွားရမည် ဖြစ်သည်။
မြန်မာ့လက်ရွေးစင် ဖူဆယ်အသင်းသည် ၂၀၂၄ အာဆီယံ ဖူဆယ် ချန်ပီယံရှစ် ပြိုင်ပွဲ အုပ်စု (ခ)၌ ပါဝင်ယှဉ်ပြိုင်နေခြင်းဖြစ်ပြီး၊ ပြိုင်ပွဲကို ထိုင်းနိုင်ငံ Nakhon Ratchasima မြို့တွင် ကျင်းပပြုလုပ်နေခြင်းဖြစ်သည်။
