တောင်ကြီး မီးပုံးပျံပွဲတော်ကာလ ခရီးသွားယာဉ်များ လမ်းလွှဲများမှ မောင်းနှင်ရန်သတ်မှတ်
တောင်ကြီး မီးပုံးပျံပွဲတော်ကာလ ခရီးသွားယာဉ်များအနေဖြင့် လမ်းလွှဲများမှ မောင်းနှင်ကြရန်သတ်မှတ်ထားကြောင်း ယာဉ်ထိန်းရဲတပ်ဖွဲ့နှင့် နီးစပ်သည့် သတင်းရင်းမြစ်တစ်ဦးထံက သိရသည်။
တောင်ကြီးမြို့ကိုဖြတ်၍ သွားလာကြမည့် (၁၂) ဘီးကုန်တင်ယာဉ်များနှင့် ခရီးသည်တင် မှန်လုံယာဉ်များကို ယမန်နေ့ အောက်တိုဘာ (၄) ရက်၊ ညနေ (၆) နာရီမှစတင်၍ ယာယီလမ်းလွှဲစနစ်သတ်မှတ်ကာ ဖြတ်သန်းမောင်းနှင်ခွင့်ပြုထားကြောင်း သိရသည်။
ထိုသို့ ဖြတ်သန်းမောင်းနှင်ရာ၌ ယခင် မြို့တွင်းမောင်းနှင်သည့် လမ်းများအစား အနောက်မြို့ပတ် (၁၆) ထပ် ပန်းခြံ မှတဆင့် ဗိုလ်ချုပ်ပန်းခြံ မီးပွိုင့်မှ အရှေ့မြို့ပတ်လမ်း ပန်းလှိုင်ဆေးရုံမီးပွိုင့်အထိ ယာယီလမ်းလွှဲမောင်းနှင်ခွင့်ပြုထားကြောင်း သိရသည်။
" ပွဲရက်နီးတာလည်းပါသလို အနောက်မြို့ပတ်လမ်း ဝါးပြားလမ်းဆုံကနေ ဧရာဝတီ ကဖေးအထိ လမ်းပြုပြင်နေလို့လည်း သိရပါတယ်"ဟု ၎င်းကဆိုသည်။
၂၀၂၄ ခုနှစ် တောင်ကြီး တန်ဆောင်တိုင် ရိုးရာမီးပုံးပျံပွဲ တော်ကို နိုဝင်ဘာ (၉) ရက်မှ (၁၅) ရက်အထိ (၇)ရက်တိုင်တိုင် စည်ကားသိုက်မြိုက်စွာကျင်းပသွားမည်ဖြစ်သည်။
အဆိုပါ ပွဲတော်တွင် ညမီးကြီး မီးပုံးပျံ (၂၆) လုံး၊ စိန်နားပန် မီးပုံးပျံ (၂၄) လုံး စုစုပေါင်းအလုံးရေ (၅၀) အပါအဝင် နေ့လွှတ်ခြေနှစ်ချောင်း (၁၄၇) လုံး၊ ခြေလေးချောင်း (၃၈)လုံး၊ အရုပ်အုပ်စု (၂၃) လုံး အသီးသီး လွှတ်တင်သွားမည်ဖြစ်ကြောင်း ဒေသခံသတင်းရင်းမြစ်များထံက သိရသည်။
