မလေးဝန်ကြီးချုပ် တရုတ်နိုင်ငံသို့ လာရောက်မည်
ပေကျင်း၊နိုဝင်ဘာ ၁
တောင်တရုတ်ပင်လယ်အရေးနှင့်ပတ်သက်၍ ရေကြောင်းဆိုင်ရာ အငြင်းပွားမှုများရှိနေသည့်ကြားမှပင် မလေးရှားနိုင်ငံ ဝန်ကြီးချုပ် အန်နဝါအီဘရာဟင်သည် တရုတ်ပြည်သူ့သမ္မတနိုင်ငံသို့ လာမည့်ရက်သတ္တပတ်၌လာရောက်မည်ဖြစ်ကြောင်း သတင်းရရှိသည်။
မစ္စတာအီဘရာဟင်သည် ပေကျင်း၏ဖိတ်ကြားချက်အရ နိုဝင်ဘာ ၄ ရက်မှ ၇ ရက်အထိ အလုပ်သဘောခရီးစဉ်အဖြစ် လာရောက်မည်ဖြစ်ကြောင်း တရုတ်နိုင်ငံခြားရေးဌာနပြောရေးဆိုခွင့်ရှိသူ လင်ရှီယန်းကပြောကြားခဲ့သော်လည်း ၎င်း၏ တရုတ်ခရီးစဉ် အစီအစဉ်အသေးစိတ်ကိုမူ သတင်း ထုတ်ပြန်ခဲ့ခြင်းမရှိပေ။
ယခုတစ်ကြိမ်သည် ၂၀၂၂ ခုနှစ် ဝန်ကြီးချုပ်ရာထူးယူပြီးကတည်းက မစ္စတာအန်နဝါ၏ ဒုတိယအကြိမ်မြောက် တရုတ်နိုင်ငံခရီးစဉ်ဖြစ်ပြီး ယမန်နှစ် မတ်လကလည်း တရုတ်ခရီးစဉ်အတွင်း သမ္မတရှီနှင့်တွေ့ဆုံခဲ့သေးသည်။
၂၀၂၃ ခုနှစ်က နှစ်နိုင်ငံဆက်ဆံရေး ဆယ်နှစ်ပြည့်ခဲ့ကြသည့် ပေကျင်းနှင့်ကွာလာလမ်ပူတို့သည် တောင်တရုတ်ပင်လယ်အရေးနှင့်ပတ်သက်၍ အပြိုင်အပြင်းအထန်ငြင်းခုံခဲ့ကြသည့်နိုင်ငံများလည်းဖြစ်သည်။
တောင်တရုတ်ပင်လယ်အတွင်း ရှာဖွေတူးဖော်မှုလုပ်ငန်းများကို ရပ်နားထားရန် ပေကျင်းက ကွာလာလမ်ပူကိုတိုက်တွန်းခဲ့ချိန်ကလည်း ဝန်ကြီးချုပ်အန်နဝါက မလေး၏ ရေနံနှင့်သဘာဝဓာတ်ငွေ့ ရှာဖွေရေးကိုဆက်လက်လုပ်ဆောင်သွားမည်ဟု အခိုင်အမာပြောကြားခဲ့သည်
