စတီဖင်ကာရီ ခြေကျင်းဝတ်ဒဏ်ရာ ရရှိ
-----------------
NBA ကလပ် ဂိုးဒင်းစတိတ် ဝါရီယာအသင်းရဲ့ အဓိက ကစားသမား စတီဖင်ကာရီဟာ ခြေကျင်းဝတ်ဒဏ်ရာ ရခဲ့တဲ့အတွက် လာမယ့် ပွဲစဉ် ၂ ပွဲကို လွဲချော်ရတော့မှာ ဖြစ်ပါတယ်။ အသက် ၃၆ နှစ်အရွယ် ကာရီဟာ အောက်တိုဘာ ၂၇ ရက်နေ့က ယှဉ်ပြိုင်ခဲ့တဲ့ LA ကလစ်ပါအသင်းကို ရှုံးနိမ့်ခဲ့တဲ့ပွဲမှာ ခြေကျင်းဝတ်ဒဏ်ရာကို ရရှိခဲ့တာ ဖြစ်ပါတယ်။
ပထမတစ်ကြိမ် ခြေကျင်းဝတ်ကို ထိခိုက်တုန်းက ခဏအနားယူပြီး ပြန်ဝင်ခဲ့ပေမယ့် ဘယ်ဘက်ခြေကျင်းဝတ်ကို နောက်တစ်ကြိမ် ထပ်မံထိခိုက်ပြီးနောက်မှာတော့ ကာရီဟာ ဆက်မကစားနိုင် တော့ပဲ ကွင်းအတွင်းကနေ ထွက် သွားခဲ့ရတာ ဖြစ်ပါတယ်။ အစောပိုင်းက ကာရီရဲ့ ခြေကျင်းဝတ်ဒဏ်ရာက ပြင်းထန်ဖွယ်ရှိတယ်လို့ ထင်မှတ်ခဲ့ ပေမယ့် အသေးစိတ်စစ်ဆေးပြီးနောက် အရွတ်ကို ထိခိုက်မှု မရှိတဲ့အတွက် ပွဲအနည်းငယ်သာ လွဲချော်ရဖွယ်ရှိ တယ်လို့ ဆိုပါတယ်။
အခုရာသီမှာ ကာရီဟာ ဂိုးဒင်းစတိတ် ဝါရီယာအသင်းရဲ့ အဓိကကစားသမားတစ်ယောက်အဖြစ် လက်စွမ်းပြနေ တာဖြစ်ပြီး အသင်းအတွက် ပျမ်းမျှရမှတ် ၁၈ ဒသမ ၃ မှတ်နဲ့ ပျမ်းမျှဖန်တီးမှု ၇ ကြိမ်လောက်အထိ စွမ်းဆောင် ပေးထားနိုင်ခဲ့တာဖြစ်ပါတယ်။ အခုရာသီက ကာရီရဲ့ ကစားသမားဘဝ ၁၆ ကြိမ်မြောက် NBA ရာသီဖြစ်ခဲ့ပြီး ဒဏ်ရာတွေများနေတဲ့ ဂိုးဒင်းစတိတ်ဝါရီယာအသင်း အတွက် ကာရီရဲ့ ဒဏ်ရာသတင်းက သတင်းဆိုး ဖြစ်ခဲ့ပါတယ်။
