MySPACE

2 w - Translate

မိန်းကလေးတစ်ယောက် ဘာကြောင့်ပြောင်းလဲသွားလဲ သိလား ...
အင်း ...ပြောင်းလဲချင်လို့ပြောင်းလဲသွားတာနေမှာပေါ့ဆိုတဲ့ စကားဟာ တချို့ မိန်းကလေးတွေအတွက်ပဲ မှန်ပါလိမ့်မယ် ။ တကယ်တမ်းကျတော့ မိန်းကလေးတစ်ယောက်ကလေ တွယ်ငြိပြီးသားအရာတစ်ခုကို လွယ်လွယ်လေး မေ့မသွားတတ်သလို ကိုယ် လိုချင်ခဲ့တဲ့အရာတစ်ခုကို လွယ်လွယ်ကူကူလေးတော့ မလိုချင်တော့ပါဘူးဆိုတဲ့အထိ ပြောင်းလဲမသွားတတ်ဘူး ။
ဘာမှ မဟုတ်ပါဘူးလေဆိုတဲ့ ကိစ္စသေးသေးလေးတွေကို မှတ်မိလား ... ပြောပြမယ်နော် မအားလို့ ဖုန်းမခေါ်လိုက်တာကို ဘာလို့ ဒီလောက်ထိ စိတ်ဆိုးနေတာလဲဆိုပြီး အပြစ်တင်ခဲ့တုန်းက အချိန်တွေပေါ့ တကယ်တော့ အဲ့ဒီ မိန်းကလေးကလေ မအားတာကို နားလည်မပေးတာမဟုတ်ဘူး ဘာဖြစ်နေလဲ စိတ်ပူနေရတဲ့ အချိန်တွေမှာ မအားလို့နော်ဆိုတဲ့ စာလေးတစ်ကြောင်းကို လိုချင်ခဲ့တာ ။ ဘယ်လောက်ပဲ ဖြစ်နေပါစေ သူစောင့်နေမှာပါပဲ ။ ဒါပေမယ့် မအားတာကိုကွာဆိုတဲ့ စကားနဲ့ စိတ်ပူနေရခြင်းတွေဟာ အလကား ဖြစ်သွားတယ် ။
ပြီးတော့ .. နေလို့မကောင်းဘူးဆိုပြီး ပြောခဲ့ဖူးတဲ့ အချိန်တွေကို အမှတ်ရလား အဲ့ဒီနေ့ရက်တွေမှာ အနားနားရှိစေချင်ခဲ့တာ စကားတွေပြောနေရင်း အဆင်မပြေတာတွေကို မေ့သွားချင်ခဲ့တာ ။ ဒါပေမယ့် များသောအားဖြင့် ရှိမနေခဲ့ဘူးလေ သိလား နေလို့အဆင်ပြေရဲ့လားဆိုတဲ့ မေးခွန်းမျိုး ကိုယ်ပူနေသေးလား ခါးကိုက်နေလား ရေနွေးလေးသောက်နော် အဲ့ဒီ စကားလုံးတွေက ဘာမှ မဟုတ်ပေမယ့် တကယ် နေလို့ကောင်းမနေတဲ့အချိန်မှာ အများကြီး လိုအပ်ပါတယ် ။ ဒါပေမယ့် ချူချာတဲ့ ဒီမိန်းကလေးကို အမြဲတမ်းနေမကောင်းဖြစ်နေတာပဲ ဂရုမစိုက်ဘူးလားဆိုတဲ့ စကားလုံးပဲ သုံးတယ် ။
ကျွန်မ ရှင့်ကို ပျော်တာတွေကော အဆင်မပြေတာတွေကော အများကြီး ပြောပြဖူးတယ်နော် ... ဒါပေမယ့် ဒီနောက်ပိုင်း ဘာမှ မပြောတော့ဘူးဆိုတာကော သတိထားမိလား ။ ဘာကြောင့်လဲကော သိရဲ့လား ... ကျွန်မက ပုံမှန်ဆို သန်မာပါတယ် ဘယ်ပြဿနာမဆို သိမ်းထားတတ်တယ် ဘယ်အဆင်မပြေမှုမျိုးကိုမဆို မြိုသိပ်ထားတတ်တယ် ဒါပေမယ့် အဲ့လို မြိုသိပ်ထားရတာ များလွန်းတဲ့အခါ ပင်ပန်းလာရတတ်တာပဲလေ ။ ရှင်က ကျွန်မ ချစ်တဲ့သူလေ ပြီးတော့ နားလည်ပေးနိုင်မယ်အထင်နဲ့ ပျော်စရာတွေကော အဆင်မပြေတာတွေကော စကားတွေ အများကြီးပြောခဲ့မိတယ် ။ သေးသေးလေးကအစ ဟိုးကြီးကြီးမားမားတွေအထိ ပြောပြနေမိတယ် ။ ဘာလို့ပြောပြနေမိလဲဆိုရင် ပြောပြလို့ရမယ်လို့ထင်ခဲ့တာကြောင့်လဲပါသလို ပြီးတော့ နားထောင်ပေးခဲ့လိမ့်မယ်လို့ ထင်ခဲ့တာကြောင့်ပေါ့ ။
ဒါပေမယ့် ကျွန်မစကားတွေ ... ရှင့် ဆော့နေတဲ့ ဂိမ်းတွေလောက် အရေးမပါဘူး ... ရှင့်သူငယ်ချင်းတွေလောက် အရေးမပါဘူး ပြီးတော့ တခြား ဘယ်အရာနဲ့ပဲ ယှဥ်ယှဥ် ကျွန်မက အရေးပါမနေဘူး ။ အဲ့တော့ နောက်ပိုင်းကျ ကျွန်မပဲ ဆင်ခြင်ရတယ် ။ သူ့ကို ပြောလို့မရပါလားဆိုတဲ့ အသိတွေနဲ့ ပြောချင်စိတ်တွေကိုလည်း ထိန်းရတယ် ။ နောက်ဆုံး ဘာမှ မပြောဖြစ်တော့သလောက်ပါပဲ ... ပြောစရာတွေ ရှိမနေတော့တာမဟုတ်ဘူးနော် ပြောနိုင်တဲ့ အင်အားတွေ ရှိမနေတော့တာ ။
ပြီးတော့လေ... စတာပါဆိုတဲ့စကားတွေနဲ့ လူရှေ့သူရှေ့ရောက်ရင် ကျွန်မ မျက်နှာပျက်သွားအောင် စရတာကို သဘောကျတယ်မဟုတ်လား ... အပေါင်းအသင်းတွေကြားမှာ စတာပါဆိုတဲ့စကားနဲ့ အားနည်းချက်တွေကို လှောင်ရတာ ပျော်တယ်မဟုတ်လား တကယ်ဆိုရင်လေ တခြားတစ်ယောက်က လှောင်ရယ်နေရင်တောင် ရှင်က ကျွန်မရှေ့မှာ ရှိနေပေးခဲ့မယ်လို့ထင်ခဲ့တာ တကယ်တမ်းကျတော့ ရှင်ကိုယ်တိုင်ကပဲ လူရှေ့သူရှေ့ရောက်ရင် စတာပါဆိုတဲ့စကားတွေနဲ့ နာကျင်စေတယ် ။ စတာပါ ဟုတ်ပါတယ် ဒါပေမယ့် ရင်ထဲတော့ နာရတယ် ။
အများကြီးပေါ့ ... အဲ့ဒီ သေးသေးမွှားမွှားလေးတွေက တဖြေးဖြေး စုလာတဲ့အခါ ချစ်ပါတယ်ဆိုတဲ့နောက်မှာ ဖြစ်ပါ့မလားဆိုတဲ့ အတွေးတွေဟာ ၀င်လာတယ် ပြီးတော့ အမြဲတမ်းဆိုရင် ငါ သည်းခံနိုင်ပါ့မလားဆိုတဲ့ စိုးရိမ်စိတ်တွေ ၀င်လာတယ် ။ အဝေးကြီးကို ကြိုတွေးရတယ် မဟုတ်လား ပြီးတော့ ငါ အဆင်ပြေနိုင်ပါ့မလားဆိုပြီး ကိုယ့်အတွက်တော့ တစ်ခုတစ်လေလောက် ပြန်ကြည့်လို့ရတယ်မဟုတ်လား ကျွန်မရှင့်ကို အရမ်းချစ်ခဲ့တာ သေချာတယ် ။ ဒါပေမယ့် သေးသေးမွှားမွှားလေးကအစ ဂရုစိုက်တဲ့ ကျွန်မအတွက် သေးသေးမွှားမွှားလေးအစ အများကြီးနာကျင်ရတယ် ။ နာကျင်ရပါလားဆိုတဲ့ အသိလေးတောင် ရှိမနေတဲ့ လူတစ်ယောက်အနားမှာ တစ်သက်လုံးနေနိုင်ဖို့ဆို တစ်သက်လုံးမြိုသိပ်ထားမှပဲ အဆင်ပြေမှာမဟုတ်လား ။ အင်း ... မြိုသိပ်ထားနိုင်ပါ့မလားဆိုပြီး ကိုယ့်ကိုယ်ကိုယ် မသေမချာဖြစ်လာတဲ့နေ့တွေကျရင် ပြောင်းလဲခြင်းတွေက စတယ် ။
ဖောက်ပြားချင်လို့ဆိုတဲ့ စကားတွေနဲ့ပဲ ... ခေါင်းစဥ်တပ်ခံရတာပါ မိန်းမတစ်ယောက်ဟာ ဘယ်လောက်ထိ တွေးတတ်လဲ ဘယ်လောက်ထိနာကျင်တတ်လဲ တချို့မသိကြဘူး ။ ဘာမှ မဟုတ်တာလေးနဲ့တဲ့ အင်း ကျွန်မပဲ အကဲပိုပြီး နာကျင်ရတာကို ခုံမင်တာ ဖြစ်မှာပါလေ ။ ဒါပေမယ့် ဒီရက်တွေမှာတော့ သေချာပေါက် ပျော်မနေတော့တာ ကိုယ်ကိုယ်တိုင် အသိဆုံးပါ ။

#ကျေးကို