#နိုင်ငံတကာသတင်း
◼ တက္ကဆက်ရေကြီးမှုတွင် သေဆုံးသူ အနည်းဆုံး ၄၃ ဦးအထိရှိလာ၊ အများအပြားပျောက်ဆုံးနေဆဲဖြစ်
တက္ကဆက်ပြည်နယ်အလယ်ပိုင်းတွင် ရုတ်တရက်ဖြစ်ပေါ်ခဲ့သော ရေကြီးမှုကြောင့် ကလေးငယ် ၁၅ ဦး အပါအဝင် လူပေါင်းအနည်းဆုံး ၄၃ ဦး သေဆုံးခဲ့ကြောင်း အာဏာပိုင်များက အတည်ပြုထားပြီး အခြားပျောက်ဆုံးနေဆဲ စခန်းချကလေးငယ်များ၊ မြစ်ကမ်းဘေးလာရောက်အပန်းဖြေသူများ နှင့် ဒေသခံများအား ကယ်ဆယ် ရေး သမားများက ဆက်လက်ရှာဖွေနေကြသည်။
ရေကြီးမှုအဓိကဖြစ်ပေါ်ခဲ့သည့် ကားစီရင်စုအပြင် အခြားနေရာများတွင်လည်း ထိခိုက်မှုများ ဖြစ်ခဲ့သဖြင့် သေဆုံးသူစာရင်းတိုးလာနိုင်ကြောင်း အာဏာပိုင်များက ဆိုသည်။
ရေကြီးမှုကြောင့် ၎င်းတို့စီရင်စုတွင် လူ လေးဦး သေဆုံးခဲ့ကြောင်း နှင့် ၁၃ ဦး ကို ရှာမတွေ့သေး‌ကြောင်း ထရာဗစ်စီရင်စု အရာရှိတစ်ဦး က ပြောကြားသည်။
ကန်ဒေါလ်စီရင်စုတွင်လည်း လူ တစ်ဦး သေဆုံးခဲ့ကြောင်း အရာရှိများက ပြောသည်။
သေဆုံးသူ ၅၂ ဦး အထိ ရှိကြောင်း အခြားသတင်းဌာနများက ဆိုကြသော်လည်း ရိုက်တာက အတည် မပြုနိုင် ကြောင်း ဖော်ပြသည်။
ဆန်အန်တိုနီယိုမြို့မှ အနောက်မြောက်ဘက် ၈၅ မိုင်အကွာ ဂွါဒါလုပ်မြစ် အနီးတစ်ဝိုက်တွင် မိုးရေချိန် ၁၅ လက်မခန့် ရွာသွန်းခဲ့ပြီးနောက် သစ်ပင်များအား ဆွဲခိုထားသူများအပါအဝင် လူပေါင်း ၈၅၀ ကို ကယ်ဆယ်ခဲ့ရကြောင်း အရာရှိများက ပြောကြားကြသည်။
ပျောက်ဆုံးနေသူများတွင် ဂွါဒါလုပ်မြစ် နံဘေးတွင် ရှိသော Camp Mystic နွေရာသီစခန်းတွင် ရောက်ရှိနေသော မိန်းကလေးငယ် ၂၇ ဦးလည်း ပါဝင်ကြောင်း နှင့် ပျောက်ဆုံးနေသော အရေအတွက်မှာ ထိုထက်လည်း ပိုများနိုင်ကြောင်း ကာဗီးလ်မြို့မန်နေဂျာ ဒယ်လ်တန်ရိုက်စ်က ယမန်နေ့ သတင်းစာရှင်းလင်းပွဲ၌ ပြောကြားသည်။
သောကြာနေ့ နံနက်ပိုင်းတွင် ခန့်မှန်းထားသည်ထက်ပိုများသော မိုးများ ရွာသွန်းခဲ့ပြီးနောက်တွင် ဂွါဒါလုပ်မြစ်ရေသည် ၂၉ ပေအထိ လျင်မြန်စွာ မြင့်တက်ခဲ့ပြီးနောက် ယင်းဘေးဒုက္ခဖြစ်ပေါ်လာခဲ့ခြင်းဖြစ်သည်။
“ မြစ်ရေတက်သွားတာကို သိပါတယ်။ ဒါပေမယ့်လည်း ဒီလို ဖြစ်လာမယ်လို့ ဘယ်သူမှ ကြိုမသိခဲ့ဘူး” ဟု ကားစီရင်စုတရားသူကြီး ရော့ဘ်ကယ်လီ က ပြောသည်။
ကလေးငယ် ငါးဦး အပါအဝင် လူပေါင်း ၁၇ ဦး သေဆုံးသည်ကို အတည်ပြုထားကြောင်း ကားစီရင်စုရဲတပ်ဖွဲ့အကြီးအကဲ လာရီလိုင်သာ က ပြောကြားပြီး မည်သူမည်ဝါမခွဲခြားရသေးကြောင်း ပြောသည်။
လွတ်လပ်ရေးနေ့ အခမ်းအနားများအတွက် အရေအတွက် အတိအကျမသိရသော လူများ ယင်းဧရိယာသို့ ရောက်ရှိနေခဲ့ကြကြောင်း တက္ကဆက်ပြည်နယ် ဒုတိယအုပ်ချုပ်ရေးမှူး ဒန်ပက်ထရစ် က ပြောကြားသည်။
တည်ထောင်ထားသည်မှာ နှစ်ပေါင်း တစ်ရာနီးပါးရှိပြီဖြစ်သော ခရစ်ယာန်မိန်းခလေးစခန်းချနေရာ Camp Mystic တွင်လည်း ရေကြီးမှုဖြစ်ပွားချိန်၌ မိန်းခလေး ၇၀၀ ခန့် ရှိနေကြောင်း ပက်ထရစ်က ပြောကြားသည်။
မြစ်ရေကြီးမှုကြောင့် စခန်းဒါရိုက်တာ ဒစ်အီစ်လန်း လည်း သေဆုံးသွားခဲ့ကြောင်း သိရသည်။
ယင်းရေကြီးမှုနှင့်ပတ်သက်၍ ဘေးဒုက္ခအခြေအနေ ‌ကြေညာပေးရန် တက္ကဆက်ပြည်နယ်အုပ်ချုပ်ရေးမှူး ဂရက်အက်ဘော့ က သမ္မတ ထရန့် ထံ တောင်းဆိုထားပြီး ယင်းတောင်းဆိုမှုကို သမ္မတက လက်ခံသွားမည် ဖြစ်ကြောင်း အမိမြေလုံခြုံ‌ရေးဝန်ကြီး ခရစ္စတီနိုအမ် က ပြောသည်။
ထိုသို့ကြေညာခဲ့ပါက ပြည်နယ်အစိုးရအနေဖြင့် ဖက်ဒရယ်အစိုးရ အကူအညီများရရှိနိုင်မည်ဖြစ်သည်။
သတင်း-ရဲမင်း
ကိုးကား-Reuters

image