#ယနေ့ထုတ်သတင်းစာ_နိုင်ငံတကာသတင်း
◼ မြောက်ကိုရီးယားအမျိုးသားတစ်ဦး စစ်မဲ့ဇုန်ကိုဖြတ်၍ တောင်ကိုရီးယားနိုင်ငံအတွင်း ဝင်ရောက်
တောင်နှင့်မြောက်ကိုရီးယား နှစ်နိုင်ငံအကြား ပိုင်းခြားထားသော စစ်မဲ့ဇုန်နယ်စပ်ကို ဖြတ်ကျော်၍ မြောက်ကိုရီးယားအမျိုးသား တစ်ဦး တောင်ကိုရီးယားနိုင်ငံအတွင်းသို့ ဝင်ရောက်လာခဲ့ကြောင်း တောင်ကိုရီးယားစစ်ဘက်က ဇူလိုင် ၄ ရက်တွင် သတင်းထုတ်ပြန်ထားသည်။
၎င်းမြောက်ကိုရီးယားအမျိုးသားကို နှစ်နိုင်ငံစစ်မဲ့ဇုန်နယ်စပ်မျဉ်း အလယ်ပိုင်း၏ အနောက်ဘက်ခြမ်းတွင် ဇူလိုင် ၃ ရက် ညပိုင်းတွင် တွေ့ရှိခဲ့ခြင်းဖြစ်ကြောင်း အထက်ပါသတင်းထုတ်ပြန်ချက်၌ ဖော်ပြထားသည်။
လက်ရှိအချိန်တွင် နယ်စပ်ဖြတ်ကျော်ဝင်ရောက်လာသော အဆို ပါ မြောက်ကိုရီးယားအမျိုးသားကို တောင်ကိုရီးယားတာဝန်ရှိသူများက ထိန်းသိမ်းထားကြောင်း သိရသည်။
ယခုနှစ် ဧပြီလကလည်း မြောက်ကိုရီးယားတပ်ဖွဲ့ဝင် ၁ဝ ဦးတို့ သည် နှစ်နိုင်ငံစစ်မဲ့ဇုန်နယ်စပ်စည်းကို ဖြတ်ကျော်၍ တောင်ကိုရီးယားနိုင်ငံအတွင်းသို့ ခေတ္တမျှဝင်ရောက်လာခဲ့ရာ တောင်ကိုရီးယားတပ်ဖွဲ့ဝင်များက သတိပေးသေနတ်ပစ်ဖောက်မှုများ ပြုလုပ်ခဲ့ရသည်။
အမေရိကန်ပြည်ထောင်စုနှင့် မြောက်ကိုရီးယားတို့အကြား နျူက လီးယားလက်နက် ဖျက်သိမ်းရေးဆွေးနွေးပွဲများ ၂ဝ၁၉ ခုနှစ်တွင် ပျက်ပြားခဲ့ရပြီးနောက် တောင်နှင့်မြောက် ကိုရီးယားနှစ်နိုင်ငံအကြား ဆက်ဆံရေးလည်း ထိခိုက်ပျက်စီးခဲ့ရသည်။
တောင်နှင့်မြောက်ကိုရီးယား နှစ်နိုင်ငံသည် ၁၉၅ဝ-၅၃ ကိုရီးယား ကျွန်းဆွယ်စစ်ပွဲကို ငြိမ်းချမ်းရေးသဘောတူညီချက်ဖြင့် အဆုံးသတ်ခဲ့ခြင်းမရှိဘဲ အပစ်အခတ်ရပ်စဲရေးဖြင့်သာ အဆုံးသတ်ထားရာ လက်တွေ့ အားဖြင့် စစ်ဖြစ်ဆဲအခြေအနေတွင် ရှိနေဆဲဖြစ်သည်။
ရိုက်တာ
