#ယနေ့ထုတ်သတင်းစာ_နိုင်ငံတကာသတင်း
◼ ဘင်္ဂလားဒေ့ရှ်ဝန်ကြီးချုပ်ဟောင်း ရှိတ်ခ်ဟာဆီနာကို မျက်ကွယ်၌ ထောင်ဒဏ်ခြောက်လ ပြစ်ဒဏ်ချမှတ်
ပြီးခဲ့သည့်နှစ်ဩဂုတ်လအတွင်း ရာထူးမှဖြုတ်ချခံခဲ့ရသော ဘင်္ဂလားဒေ့ရှ် ဝန်ကြီးချုပ်ဟောင်း ရှိတ်ခ်ဟာဆီနာကို တရားရုံးတော်အား မထီမဲ့မြင်ပြုလုပ်မှုဖြင့် ဘင်္ဂလားဒေ့ရှ်နိုင်ငံတကာ ရာဇဝတ်တရားရုံးက ဇူလိုင် ၂ ရက်တွင်မျက်ကွယ်၌ ထောင်ဒဏ် ခြောက်လ ချမှတ်ခဲ့ကြောင်း သိရသည်။
၂ဝ၂၄ ခုနှစ် ဩဂုတ်လအတွင်းဖြစ်ပွားခဲ့သော လူထုအုံကြွမှုကြောင့် အိန္ဒိယနိုင်ငံသို့ထွက်ပြေးခဲ့ရသော ဘင်္ဂလားဒေ့ရှ်ဝန်ကြီးချုပ်ဟောင်း ရှိတ်ခ်ဟာဆီနာသည် ဘင်္ဂလားဒေ့ရှ်ပြည်တွင်း၌ စွဲချက်အမျိုးမျိုးဖြင့် ရင်ဆိုင်နေရသည်။
ဘင်္ဂလားဒေ့ရှ်နိုင်ငံတကာတရားရုံးသည် ဝန်ကြီးချုပ်ဟောင်း ရှိတ်ခ်ဟာဆီနာအပြင် အဝါမီလိဂ်ပါတီ၏ကျောင်းသားအဖွဲ့ခေါင်းဆောင်တစ်ဦးကိုလည်း တရားရုံးတော်အားမထီမဲ့မြင်ပြုလုပ်မှုဖြင့် ထောင်ဒဏ်နှစ်လမျက်ကွယ်ပြစ်ဒဏ်ချမှတ်ခဲ့ကြောင်း သိရသည်။
ဘင်္ဂလာဒေ့ရှ်နိုင်ငံတကာတရားရုံးသည် ၁၉၇၁ ခုနှစ် လွတ်လပ်ရေးစစ်ပွဲကာလ စစ်ရာဇဝတ်မှုများကို တရားစီရင်ရေးအတွက် ဝန်ကြီးချုပ်ဟောင်းရှိတ်ခ်ဟာဆီနာ၏ အဝါမီလိဂ်ပါတီအစိုးရက ၂၀၁၀ ပြည့်နှစ်တွင်တည်ထောင်ထားသည့် တရားရုံးဖြစ်သည်။
အဆိုပါတရားရုံးသည် ဝန်ကြီးချုပ်ဟောင်း ရှိတ်ခ်ဟာဆီနာကို လူသားမျိုးနွယ်အပေါ် ရာဇဝတ်မှုကျူးလွန်ခြင်းစွဲချက်အပါအဝင် စွဲချက်များအတွက် ဖမ်းဝရမ်းသုံးခုအထိ ထုတ်ထားပြီးဖြစ်သည်။
သို့ရာတွင် အထက်ပါစွဲချက်များကို နိုင်ငံရေးပယောဂမကင်းသည့်စွဲချက်များဖြင့် ဝန်ကြီးချုပ်ဟောင်း ရှိတ်ခ်ဟာဆီနာက ဝေဖန်ထားသည်။
တရားစွဲဆိုမှုများ ပြုလုပ်ထားစဉ်အတွင်း ရှိတ်ခ်ဟာဆီနာ၏ အဝါမီလိဂ်ပါတီနှင့် ပါတီခေါင်းဆောင်များကို ဘင်္ဂလားဒေ့ရှ် အိမ်စောင့်အစိုးရအဖွဲ့က နိုင်ငံရေးပြုလုပ်ခွင့်ပိတ်ပင်ထားသည်။
ရိုက်တာ
