နွားထိုးကြီးတိုက်ပွဲ ပြင်းထန်နေဆဲဖြစ်ပြီး ဒေသခံ ထောင်နဲ့ချီ တိမ်းရှောင်နေရ
မေ ၂၀ - ၂၀၂၅
SS (VOM)
မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်မှာ တိုက်ပွဲတွေ ပြင်းထန်နေဆဲဖြစ်ပြီး ဒေသခံ ထောင်နဲ့ချီ တိမ်းရှောင်နေရတယ်လို့ စစ်ရေး သတင်းရင်းမြစ်တွေက ပြောပါတယ်။
မေ ၁၅ ရက်နေ့ကနေ စတင်လာတဲ့ တိုက်ပွဲတွေကြောင့် ဝက်လူးရွာ အပါအဝင် ပဲချက်၊ ဂွေးပင်တော၊ ထန်းခွ၊ ထန်းစင် စတဲ့ ရွာတွေက ဒေသခံ ပြည်သူ ၈၀၀၀ နီးပါး ဘေးလွတ်ရာကို တိမ်းရှောင်နေရတယ်လို့ သိရပါတယ်။
“မြေပြင် တိုက်ပွဲအပြင်ကိုမှ နစက က လေကြောင်းကနေ အင်အားဖြည့်ပြီး ဆက်တိုက် ခုခံနေလို့ တိုက်ပွဲကတော့ အခုထိ ပြင်းထန်နေတုန်းပါပဲ။ အဲဒါကြောင့် ဝက်လူးရွာရော၊ အနီးဝန်းကျင်က ရွာတွေရော စစ်ရှောင်ကုန်ကြပြီ။ ရှောင်တာက‌တော့ တိုက်ပွဲမဖြစ်သေးတဲ့ ဘေးလွတ်မယ်ထင်တဲ့ ရွာတွေကို ရှောင်ကြတာပေါ့။ ရွာလုံးကျွတ်တော့ မဟုတ်ဘူး။ တချို့ဒေသခံတွေ ရွာတွေထဲမှာ ကျန်ခဲ့တာရှိသေးတယ်။ အိမ်စိတ်မချလို့၊ လမ်းစရိတ် မတတ်နိုင်လို့ ကျန်ခဲ့ကြတဲ့သူတွေပေါ့” လို့ စစ်ရေး သတင်းရင်းမြစ်က ပြောပါတယ်။
လက်ရှိ ဝက်လူးရဲစခန်းမှာ တိုက်ပွဲ ပြင်းထန်နေတာဖြစ်ပြီး နစကတပ်က လေကြောင်းကနေ တရစပ် တိုက်ခိုက်နေတယ်လို့ ဆိုပါတယ်။
ဝက်လူးရွာ ရဲစခန်းမှာ ပခုက္ကူမြို့ အခြေစိုက် အမှတ် (၁၀၁) ခြေမြန် တပ်မဌာနချုပ်နဲ့ ပြည်သူ့စစ်တွေ တပ်စွဲထားတာ ဖြစ်တယ်လို့ သိရပါတယ်။
“မေ ၁၅ ရက်နေ့ကစတဲ့ ခရိုင် စစ်ဆင်ရေးမှာ ဝက်လူးစခန်း တိုက်ပွဲကတော့ နစကအတွက် စစ်ဌာနချုပ်တခုကို ကာကွယ်ရသလိုမျိုး ဖြစ်နေတယ်။ လေကြောင်းကနေလည်း လေယာဉ် မျိုးစုံသုံးပြီး မရပ်မနား ခုခံနေတယ်။ ဒါကြောင့် ဝက်လူးရဲစခန်းက နစကအတွက်တော့ စစ်ဗျူဟာကျတဲ့ နေရာလို့တောင် ပြောလို့ရတယ်” လို့ စစ်ရေး သတင်းရင်းမြစ်က ပြောပါတယ်။
အဲဒီ ရဲစခန်းဟာ ဝက်လူးရွာ (အနောက်ဘက်) နွားထိုးကြီးနဲ့ မြို့သာကြား လမ်းပေါ်မှာ တည်ရှိတာဖြစ်တယ်လို့ သူက ပြောပါတယ်။
ဝက်လူးစခန်းဟာ တိုက်နယ်အဆင့်သာ ရှိပေမယ့် အမှန်တကယ် စခန်းသိမ်းခံရပါက မြင်းခြံ - နွားထိုးကြီး - ပြင်စည် ကားလမ်းတလျှောက်ရဲ့မြောက်ဘက်ခြမ်း တခုလုံး စစ်ရေးကင်းစင်နယ်မြေ ဖြစ်သွားနိုင်တာကြောင့် နစကအနေနဲ့ နေပြည်တော်ဝင်ပေါက်နဲ့ အနီးဆုံးဒေသကို လေကြောင်း အသုံးပြု ကာကွယ်နေခြင်းဖြစ်တယ်လို့ ဆိုပါတယ်။
နစက စစ်ရေး သတင်းရင်းမြစ်တွေရဲ့ အသိပေး ရေးသားချက်မှာတော့ လက်နက်ကိုင် တပ်ဖွဲ့တွေဟာ နွားထိုးကြီးမြို့အတွင်းရှိ အထက်တန်းကျောင်း၊ ကမ္ဘောဇဘဏ်၊ မြို့လယ်မီးသတ်ကုန်း၊ ရဲစခန်း ဝန်းကျင်တွေမှာ နေရာယူထားပြီး ဒရုန်းနဲ့ တိုက်ခိုက်နေတယ်လို့ ဖော်ပြထားပါတယ်။
ဒါအပြင် ဝက်လူးရွာ ရဲစခန်းတိုက်ပွဲမှာ အပေါ့စား ထောက်ပို့လေယာဉ် (Y -12) နဲ့ လေကြောင်း ပစ်ကူပေးနေတာကြောင့် စခန်းမကျသေးဘူးလို့ အသိပေး ရေးသားထားပါတယ်။
ဒေသတွင်း လက်နက်ကိုင် တပ်ဖွဲ့တွေဟာ “၉/အညာမြေစစ်ဆင်ရေး” အဖြစ် မြင်းခြံခရိုင်အတွင်းရှိ မြို့နယ်တွေဖြစ်တဲ့ မြင်းခြံ၊ နွားထိုးကြီး၊ တောင်သာ၊ ဆီမီးခုံနဲ့ ငါန်းဇွန်မြို့နယ်တွေက နစကရဲ့ တပ်စခန်းတွေကို မေ ၁၅ ရက်နေ့မှစတင်ကာ ထိုးစစ်ဆင် တိုက်ခိုက်နေတာ ဖြစ်တယ်လို့ သိရပါတယ်။
မေ ၁၅ ရက်နေ့မှာ နွားထိုးကြီးမြို့နယ်ထဲက နစကတပ်တွေ စောင့်ကြပ်တဲ့ တရုတ်ဓာတ်ငွေ့ပိုက်လိုင်း ထိန်းချုပ်ရေးနေရာ၊ မြို့မရဲစခန်းနဲ့ ဝက်လူးရဲစခန်းတို့ကို ဒေသတွင်း လက်နက်ကိုင်တပ်တွေက တပြိုင်နက်တည်း တိုက်ခိုက်ခဲ့တာ ဖြစ်တယ်လို့ သိရပါတယ်။
အဲဒီထဲက မြို့မစခန်းနဲ့ ဓာတ်ငွေ့ပိုက်လိုင်းစခန်း နှစ်နေရာကို မနေ့ မေ ၁၉ ရက်နေ့မှာ ဒေသတွင်း လက်နက်ကိုင်တပ်တွေက ထိန်းချုပ်ထားနိုင်ပြီ ဖြစ်တယ်လို့ သတင်းတွေ ထွက်ပေါ်နေပေမယ့် ဒီသတင်း အတည်ပြုနိုင်ဖို့ VOM က ဆက်လက် စုံစမ်းနေဆဲ ဖြစ်ပါတယ်။
ဒါအပြင် မြင်းခြံမြို့နယ်၊ ကန်ဆင့် (မြောက်) ရွာမှာလည်း မနေ့ မေ ၁၉ ရက်၊ နေ့လယ် ၁၂ နာရီခွဲဝန်းကျင်က လေကြောင်း တိုက်ခိုက်မှု ဖြစ်ပွားခဲ့ပြီး လေးယောက် သေဆုံးကာ လေးယောက် ထိခိုက်ဒဏ်ရာ ရရှိခဲ့ပြီး နေအိမ်တွေလည်း ပျက်စီးခဲ့တယ်လို့ သိရပါတယ်။
အဲဒီ‌ မေ ၁၉ ရက်နေ့မှာပဲ တောင်သာမြို့နယ်ထဲက သန်းတန်းကျေးရွာမှာ မနက် ၄ နာရီဝန်းကျင်က စက်တပ်လေထီး၊ ဒရုန်းတွေနဲ့ လေကြောင်း တိုက်ခိုက်မှု ဖြစ်ပွားခဲ့တာကြောင့် နေအိမ်တွေနဲ့ နွားတွေ ထိခိုက် ပျက်စီးခဲ့တယ်လို့ ဒေသတွင်း လက်နက်ကိုင် တပ်ဖွဲ့တွေရဲ့ ထုတ်ပြန်ချက်မှာ ဖော်ပြထားပါတယ်။
ဆက်လက်ပြီး အဲဒီနေ့၊ နေ့လယ် ၁ နာရီခွဲဝန်းကျင်မှာလည်း တောင်သာမြို့နယ်၊ မင်းတည်းကျေးရွာမှာ လေကြောင်း တိုက်ခိုက်မှုကြောင့် တယောက် သေဆုံးကာ တယောက် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ဒါအပြင် မေ ၁၈ ရက်နေ့၊ မနက် ၅ နာရီဝန်းကျင်ကလည်း တောင်သာနယ် (အရှေ့ခြမ်း) ရှိ လှည်းကူးမကျေးရွာမှာ လေကြောင်း တိုက်ခိုက်မှု ဖြစ်ပွားခဲ့တာကြောင့် နေအိမ် နှစ်လုံး ပျက်စီးပြီး နွားတကောင် သေဆုံးခဲ့တယ်လို့ သိရပါတယ်။
လက်ရှိ မြင်းခြံခရိုင်အတွင်း တိုက်ပွဲ အခြေအနေနဲ့ ပတ်သက်လို့ နစကဘက်က တရားဝင် သတင်းထုတ်ပြန်ထားခြင်း မရှိသေးသလို ဒေသတွင်း လက်ကနက်ကိုင် တပ်ဖွဲ့တွေဘက်ကလည်း တိုက်ပွဲအခြေအနေ အသေးစိတ်ကို သတင်းထုတ်ပြန်ထားခြင်း မရှိသေးပါဘူး။
Photo - CJ