#နိုင်ငံတကာသတင်း
◼ဗြိတိန်နှင့် အီးယူ ကုန်သွယ်ရေးနှင့် ကာကွယ်ရေးသဘောတူညီမှုရရှိ
အီးယူမှ ဗြိတိန်နိုင်ငံ ထွက်ခွာပြီး နောက်ပိုင်း ဥရောပသမဂ္ဂနှင့်ဗြိတိန်ကြား ကုန်သွယ်ရေးနှင့်ကာကွယ်ရေးဆိုင်ရာ အထင်ကရအဖြစ်ဆုံး သဘောတူညီမှုများကို ဗြိတိန် က သဘောတူလိုက်ကြောင်း ရိုက်တာသတင်းအရသိရသည်။
အမေရိကန်သမ္မတ ဒေါ်နယ်ထရန့်ကြောင့် ကမ္ဘာလုံးဆိုင်ရာ တည်ငြိမ်မှုများကို စောက်ထိုးမိုးမျှော်ဖြစ်စေခဲ့မှုူက နှစ်ဖက်ကြား ပိုမိုနီးကပ်လာစေခဲ့ခြင်းနှင့်အတူ ဥရောပနှင့် လမ်းခွဲပြီး ကိုးနှစ်အကြာတွင် ၎င်းတို့နှစ်ဖက်ကြား အကျယ်ပြန့်ဆုံး သဘောတူညီမှုရရှိခဲ့ခြင်းဖြစ်ပြီး လုံခြုံရေးနှင့်ကာကွယ်ရေးသဘောတူညီမှု ၊ ငါးဖမ်းဆီးမှု သဘောတူညီမှု၊ နှင့် ဗြိတိန်မှတင်ပို့သောကုန်ပစ္စည်းများနှင့် အလည်အပတ်သွားသူများအပေါ် ကန့်သတ်မှု လျှော့ချပေးခြင်းများလည်း ပါဝင်ခဲ့သည်။
ဒေါ်နယ်ထရန့်၏ အခွန်အကောက်များ နှင့် ဥရောပကကိုယ်ပိုင်ကာကွယ်ရေး အတွက် ပိုမိုလုပ်ဆောင်သင့်ကြောင်း သတိပေးချက်များကြောင့် ကမ္ဘာတစ်ဝန်းမှ အစိုးရအဖွဲ့များက ကုန်သွယ်ရေး နှင့် ကာကွယ်ရေးကိစ္စများကို ပိုမိုစဉ်းစားလာခဲ့ရပြီး ဗြိတိန်ဝန်ကြီးချုပ် ကီယာစတာမာကိုလည်း ဥရောပခေါင်းဆောင်များနှင့် ပိုမိုနီးကပ် လာစေခဲ့သည်။
ဗြိတိန်နိုင်ငံသားများအတွက် အီးယူလေဆိပ်များတွင် ပိုမိုမြန်ဆန်သော အီလက်ထရွန်နစ်ဂိတ်များ ထားရှိခြင်းကဲ့သို့ အကျိုးကျေးဇူးများက အီးယူမှဗြိတိန်ထွက်ခွာရေးကို လှုံ့ဆော်ခဲ့သော နိုင်ဂျယ်ဖာရေ့ဂျ်ကဲ့သို့ လူများထံမှ သစ္စာဖောက်သည်ဟူသော ပြောဆိုမှုများကို ဖုံးလွှမ်းသွားမည်ဟုလည်း ဗြိတိန်ဝန်ကြီးချုပ် ကီယာစတာမာက မျှော်လင့်ထားသည်။
သဘောတူညီချက် က ဗြိတိန်နှင့် အီးယူတို့၏ ဆက်ဆံရေးတွင် ခေတ်သစ်တစ်ခုအစပြုခြင်းဖြစ်ကြောင်း အီးယူကော်မရှင်ဥက္ကဌ အာဆူလာဗွန်ဒါလီယန်း နှင့် ဥရောပကောင်စီဥက္ကဌ အန်တိုနီယိုကော့စတာတို့ အားဘေးနားထားပြီး လန်ဒန်မြို့ လန်ကက်စတာအိမ်တော်၌ ကီယာစတာမာက ပြောကြားသည်။
တစ်ကမ္ဘာလုံး မတည်မငြိမ်ဖြစ်နေပြီး မိမိတို့ ဥရောတိုက်ကလည်း မျိုးဆက်ပေါင်းများစွာအတွင်း အ ကြီး မားဆုံးခြိမ်းခြောက်မှုနှင့်ရင်ဆိုင်နေရချိန်၌ ဥရောတိုက်သားများက အတူတကွ ရှိနေကြသည်ကို ယခု သဘောတူညီချက် က သတင်းစကားပါးလိုက်ကြောင်း မစ္စက်ဗွန်ဒါလီယန်းကလည်း ပြောကြားသည်။
ယင်းမှာ ဗြိတိန်နိုင်ငံက ယခုလအတွင်း ချုပ်ဆိုခဲ့သော တတိယမြောက် ကြီးမားသော သဘောတူညီမှုဖြစ်ကြောင်း သိရပြီး ယင်းမတိုင်မီ က အိန္ဒိယ ၊ အမေရိကန်တို့နှင့်လည်း ကုန်သွယ်ရေးဆိုင်ရာ သဘောတူညီချက်များရရှိအောင် လုပ်ဆောင်နိုင်ခဲ့သည်။
အီးယူနှင့်ရရှိခဲ့သော သဘောတူညီမှုနှင့်အတူ ဗြိတိန်တွင် စားသောက်ကုန်များ ဈေးနှုန်းချိုသာလာမည်၊ စွမ်းအင်လုံခြုံရေးတိုးတက်လာမည် ၊ စီးပွားရေးသို့ ဗြိတိန်ပေါင် ၉ ဘီလီယံဖိုးခန့် ပေါင်းထည့်နိုင်မည်ဟု ဗြိတိန်က ပြောကြားသည်။
သတင်း-ရဲမင်း
ကိုးကား-Reuters
