တကယ်တော့ လူတွေက ရယ်ရတယ်
သူတို့အမြင်နဲ့တင်
ဆင်းရဲနုံချာတယ်ဆိုပြီး
နှိမ်ကြတယ်
အဲဒီ့လူကိုပဲ သူတို့မျက်လုံးထဲ
လူရာ၀င်တယ်ထင်လာတဲ့တစ်နေ့
အတင်းတွေ ခယကြပြန်ရော
တကယ်တော့ လူတွေကရယ်ရတယ်
သူတို့စိတ်နဲ့ အသက်ရှင် နေရင်တော့
တစ်ကမ္ဘာလုံးမှာ
အကောင်းဆုံးလူလို
ဆက်ဆံတတ်ကြတယ်
ကိုယ့်စိတ်ကိုချပြတဲ့တစ်နေ့
ကိုယ်က လူဆိုးကြီးဖြစ်သွားပြန်ရော
တကယ်တော့ လူတွေက ရယ်ရတယ်
အပေါ်ယံ ၀တ်စားထားသမျှကိုကြည့်ပြီး
သူတို့ပဲ
အလေးထားနေရာပေးကြတယ်
အပေါ်ယံပိုင်ဆိုင်မှုတွေ
ဘာမှမကျန်တော့တဲ့တစ်နေ့
သူတို့ပဲ... ရှောင်ဖယ်ကြပြန်ရော
တကယ်တော့လူတွေက ရယ်ရတယ်
အဲဒီ့လိုအကျင့်တွေရှိမှန်းသိလို့
ကွယ်ရာကျ နှာခေါင်းရှုံ့ကြပြီး
သူတို့ပဲ ဖက်လှဲတကင်း
ရင်းနှီးတဲ့ပုံစံ ဖမ်းကြပြန်ရော
တကယ်တော့ လူတွေဟာရယ်ရတယ်
အမှန်တွေပြောပြန်တော့လည်း
စိတ်ဆိုးကြသေးရဲ့........
တကယ်တော့ လူတွေဟာ
အင်မတန်ရယ်ရတဲ့ပြက်လုံးတစ်ခုလိုပါပဲ
တခါတခါ
အူလှိုက်သည်းလှိုက် ရယ်ပစ်ချင်စရာကောင်းတယ်
ကိုယ်ကတော့
အဲဒီလို...လူတွေကို
ခပ်လှောင်လှောင်ရယ်ပစ်လိုက်တာပဲ
ကိုယ်ရယ်ပစ်လိုက်လို့ စိတ်ဆိုးသွားတဲ့
လူအချို့လည်း
တစ်နေ့ သူတို့အလိုရှိတဲ့အခါ
ကိုယ့်ဆီ မျက်နှာချိုလာသွေးကြအုံးမယ်မလား
အဲဒါကြောင့်ပြောတာ
တကယ်တော့
လူတွေဟာ ရယ်ရတယ်လို့ပေါ့......
