#ယနေ့ထုတ်သတင်းစာ_နိုင်ငံတကာသတင်း
◼ ရင်ပြင်နီ စစ်ရေးပြချီတက်ပွဲ တက်ရောက်ရေးအတွက် ရုရှားနိုင်ငံသို့ လေးရက်ကြာ တရုတ်သမ္မတသွားမည်
တရုတ်သမ္မတ ရှီကျင်ပင်းသည် ရုရှားနိုင်ငံသို့ မေ ၇ ရက်မှ ၁ဝ ရ ရက်အထိ တရားဝင်ခရီးစဉ်အဖြစ် လာရောက်မည်ဖြစ်ကြောင်း ကရင်မလင်နန်းတော်က မေ ၄ ရက်တွင် အတည်ပြု သတင်းထုတ်ပြန်ထားသည်။
တရုတ်သမ္မတ ရှီကျင်ပင်းသည် မော်စကိုမြို့တော် ရင်ပြင်နီ၌ မေ ၉ ရက်တွင်ကျင်းပမည့် ဒုတိယကမ္ဘာစစ် စစ်အောင်ပွဲနေ့ စစ်ရေးပြချီတက်ပွဲသို့ အခြားနိုင်ငံတကာခေါင်းဆောင်များနှင့်အတူ တက်ရောက်ကြည့်ရှုမည်ဖြစ်သည်။
ယင်းအပြင် သမ္မတရှီကျင်ပင်း၏ လေးရက်ကြာခရီးစဉ်အတွင်း ရုရှားနှင့် တရုတ်နိုင်ငံတို့သည် နှစ်နိုင်ငံသဘောတူညီချက်များကိုလည်း လက်မှတ်ရေးထိုးရန် စီစဉ်ထားကြောင်း သိရသည်။
အထက်ပါ ရုရှားခရီးစဉ်သည် ယူကရိန်းကျူးကျော်စစ်ကို ရုရှားနိုင်ငံက ၂ဝ၂၂ ခုနှစ် ဖေဖော်ဝါရီလတွင် စတင်ခဲ့ပြီးနောက်ပိုင်း တရုတ်သမ္မတရှီကျင်ပင်း၏ တတိယမြောက် ရုရှားခရီးစဉ် ဖြစ်လာလိမ့်မည်ဖြစ်သည်။
ရုရှားနိုင်ငံသည် ဒုတိယကမ္ဘာစစ်အတွင်း ဆိုဗီယက်ပြည်ထောင်စုနှင့် မဟာမိတ်တို့က နာဇီဂျာမနီတပ်များအပေါ် အောင်ပွဲခံမှု နှစ်(၈ဝ)ပြည့် အထိမ်းအမှတ်အဖြစ်လာမည့် မေ ၉ ရက်တွင် ရင်ပြင်နီစစ်ရေးပြပွဲကို ကျင်းပရန်စီစဉ်ထားခြင်းဖြစ်သည်။
ရင်ပြင်နီစစ်ရေးပြပွဲအတွက် ရုရှားအစိုးရ၏ ၇၂ နာရီအကြာ အပစ် အခတ်ရပ်စဲရေးအဆိုပြုချက်ကိုယူကရိန်းသမ္မတ ဇီလန်စကီးက ငြင်းပယ်ထားပြီး အထက်ပါစစ်ရေးပြပွဲသို့တက်ရောက်ကြမည့်ပြည်ပဧည့်သည်များ၏ လုံခြုံရေးကိုယူကရိန်းနိုင်ငံအနေဖြင့် အာမခံချက်ပေးလိမ့်မည်မဟုတ်ကြောင်း မေ ၃ ရက်တွင် သတိပေးထားသည်။
ယူကရိန်းသမ္မတ၏ အထက်ပါပြောကြားချက်ကို ခြိမ်းခြောက်မှုအဖြစ် ရုရှားအစိုးရကဝေဖန်ထားပြီး ရင်ပြင်နီစစ်ရေးပြပွဲကို တိုက်ခိုက်ခဲ့ပါက ကိယက်ဗ်မြို့တော်ကို မေ ၁ဝ ရက်တွင် ဆက်လက်တွေ့ မြင်ရလိမ့်မည်ဟု မည်သူကမျှ အာမခံချက်ပေးနိုင်မည်မဟုတ်ကြောင်း တုံ့ပြန်ထားသည်။
ယူကရိန်းစစ်ပွဲစတင်ဖြစ်ပွားခဲ့ပြီးနောက်ပိုင်း ရုရှားနိုင်ငံသည် အနောက်အုပ်စုဒီမိုကရေစီနိုင်ငံများ၏ စီးပွားရေးအရေးယူပိတ်ဆို့မှုများကြောင့် တရုတ်နိုင်ငံအပေါ် စီးပွားရေးအရ ပိုမိုမှီခိုလာခဲ့ရသည်။
တရုတ်သမ္မတရှီကျင်ပင်းနှင့် ရုရှားသမ္မတပူတင်တို့သည် ပုဂ္ဂိုလ်ရေးအရ ဆက်ဆံရေးကောင်းမွန်သူများဖြစ်ရာ ထိုဆက်ဆံရေးပုံစံသည် နှစ်နိုင်ငံဆက်ဆံရေးကို မြှင့်တင်ရာတွင် အထောက်အကူပြုနိုင်ခဲ့သည်။
ရိုက်တာ