ပခုက္ကူခရိုင်မှာ ဆယ်ရက်ထက်မနည်း လျှပ်စစ်မီးပြတ်မယ်
မေ -၅ ၊၂၀၂၅
SP (VOM)
မကွေးတိုင်း ပခုက္ကူခရိုင်ထဲမှာရှိတဲ့ မြို့ရွာတွေမှာ အခုရက်ပိုင်း လျှပ်စစ်မီးတွေ ပြတ်တောက်နေတယ်လို့ လျှပ်စစ်ဖြန်ဖြူးပေး​ရေးဌာနမှာ တာ၀န် ထမ်းဆောင်နေတဲ့ ၀န်ထမ်းတွေဆီက သိရပါတယ်။
" စစ်ကိုင်းတိုင်း ဆားလင်းကြီးမြို့နယ် ညောင်ပင်ကြီးဓာတ်အားခွဲရုံကနေ ပခုက္ကူကိုပို့လွတ်တဲ့ လိုင်းက သဘာ၀ဘေး အန္တရာယ်ကြောင့် တာ၀ါတိုင် နှစ်တိုင် ကျိုးကျပျက်စီးသွားတယ် ကျိုးကျတဲ့နေရာက ၊ ဗုဒ္ဓကုန်း နေရာ၀န်းကျင်မှာဖြစ်တယ်
၊အဲ့ဒီ တာ၀ါနှစ်တိုင်ကို ပြန်လည် ပြင်ဆင်ဖို့ရင် အနည်းဆုံး အချိန် ဆယ်ရက်ကျော်ကြာမယ် " လို့ ညောင်ပင်ကြီး ဓာတ်အားခွဲ ရုံမှာ တာ၀န်ထမ်းဆောင်နေတဲ့ ၀န်ထမ်းတယောက်က ပြောပါတယ်။
ပခုက္ကူ ဒေသခံတယောက်ပြောပြတာက" တမြန်နေ့ည ၁၁ နာရီကတည်းကပျက်သွားတာ ပြန်မလာတော့ဘူး၊ ချိုးရေကတော့ မြစ်ဆိပ်သွားချိုးကြတယ်။ သုံးရေကတော့ ချွေတာသုံးနေရတာပေါ့၊ စက်ရှိတဲ့အိမ်က စက်နှိုးကြ မရှိတဲ့အိမ်ကတော့ ဒုက္ခရောက်တာပေါ့" လို့ပြောပါတယ်။
အဲ့ဒီ ကျိုးကျပျက်စီးတယ်ဆိုတဲ့ ဓာတ်အားလိုင်းဟာ မြန်မာ့ဆိုရှယ်လစ် လမ်းစဥ်ပါတီခေတ်မှာ ပခုက္ကူ - ညောင်ပင်ကြီး ပို့လွတ်ပေးခဲ့တဲ့ ဓာတ်အားလိုင်းဖြစ်ပါတယ်။
ပြီးခဲ့တဲ့ ၂၀၁၂နှစ်ကစလို့ စစ်ကိုင်း အုန်းတော ဓာတ်အားခွဲရုံကနေ တဆင့် ညောင်ပင်ကြီး ဓာတ်အားခွဲရုံကနေ ပခုက္ကူကို ပြန်လည်ပို့လွတ်ပေးတာဖြစ်တယ်လို့လည်း သိရပါတယ်။
၀ါတာတိုင်ကျိုးကျပျက်စီးတာကြောင့် ပခုက္ကူအပါအ၀င် ရေစကြို ၊မြစ်ခြေ ၊ကမ္မ ၊မြိုင် စတဲ့ မြို့ရွာဘက်တွေမှာ ဆယ်ရက်လောက် မီးဆက်ပြီးပျက်ဦးမှာဖြစ်တယ်လို့ သိရပါတယ်။