#ပြည်တွင်းသတင်း
◼ကျိုင်းတုံ-တောင်ကြီးလမ်း၌ခရီးသည်တင်ယာဉ်တစ်စီးချောက်ထဲကျ၊ ခုနစ်ဦးသေဆုံး
ရှမ်းပြည်နယ်၊ ကျိုင်းတုံမြို့၊ ပြည်ထောင်စုလမ်းမကြီး၊ မိုင်တိုင်အမှတ်(၃၆၆/၆-၇) ကြားရှိ စပါယ်ရှယ်တောင်အဆင်း၌ ခရီးသည်တင်ယာဉ်တစ်စီးချောက်ထဲထိုးကျခဲ့ပြီးခုနစ်ဦးသေဆုံးကာ သုံးဦးထိခိုက်ဒဏ်ရာရရှိခဲ့ကြောင်း တိုင်းနေလူမှုကူညီရေးအသင်းထံမှသိရသည်။
အဆိုပါယာဉ်မှာ Rozer ခြောက်ဘီးခရီးသည်တင်ယာဉ်ဖြစ်ပြီး ယမန်နေ့(ဧပြီ ၈ ရက်) ည ၁၁ နာရီ ခွဲခန့်တွင်လမ်း၏ယာဘက်ပေ (၅၀၀) ခန့် အနက်ရှိချောက်အတွင်းပြုတ်ကျခဲ့ခြင်းဖြစ်ကြောင်း၊ ယာဉ်ပေါ်တွင်လိုက်ပါလာသည့် အမျိုးသားငါးဦးနှင့် အမျိုးသမီးနှစ်ဦး အခင်းဖြစ်ရာနေရာတွင် သေဆုံးခဲ့ကြောင်းသိရသည်။
"ဘယ်လိုကြောင့်ချောက်ထဲကျတယ်ဆိုတာတော့မသိပါဘူး။ ကျွန်တော်တို့အသင်းကိုဆက်သွယ်လာလိုသွားပြီး မီးသတ်အဖွဲ့ကိုကူညီပေးခဲ့တာပါ။ ကားပေါ်မှာခရီးသည် ၁၀ ဦးပါလာတာ ခုနစ်ဦးက သေဆုံးပြီးသုံးဦးဒဏ်ရာရပါတယ်" ဟု တိုင်းနေလူမှုကူညီအသင်းမှတာဝန်ရှိသူတစ်ဦးကပြောသည်။
ယင်းဒဏ်ရာရရှိသူသုံးဦးကို တိုင်းနေလူမှုကူညီရေးအသင်းယာဉ်ဖြင့်ကျိုင်းတုံဆေးရုံကြီးသို့ ပို့ဆောင်ထားကြောင်းသိရသည်။
သတင်း - ပိုင်လေး
ဓာတ်ပုံ - MFSD
