#မြေငလျင်သတင်းအချက်အလက်
◼ရေတင်နိုင်ရေး လျှပ်စစ်မီး တစ်နေ့ ၄ နာရီခန့်ပေးမည်ဟုဆို
ရန်ကုန်တိုင်းအတွင်း ယနေ့(မတ် ၂၉ ရက်)နံနက် ၅ နာရီ မှစ၍ ၂၄ နာရီအတွင်း အုပ်စုခြောက်ခုဖြင့်ခွဲပေးမည်ဖြစ်ပြီး တစ်အုပ်စုလျှင် ၄ နာရီခန့်သာ ရေတင်နိုင်ရန်အတွက် ဓာတ်အားဖြန့်ဖြူးပေးနိုင်မည်ဟု YESC ကအသိပေးထားသည်။
ယမန်နေ့ မတ် ၂၈ ရက်မွန်းတည့်ပိုင်းကလှုပ်ခတ်ခဲ့သည့် အလွန်ပြင်းထန်သောငလျင်ဒဏ်ကြောင့် ဓာတ်အားစနစ်အတွင်းသို့ ဓာတ်အားထုတ်လုပ်ပို့လွှတ်လျက်ရှိသည့် ဓာတ်အားပေးစက်ရုံ၊ ခွဲရုံနှင့် ဓာတ်အားလိုင်းများ၏ ဓာတ်လွှတ်ပစ္စည်းများ ချို့ယွင်းပျက်စီးမှုဖြစ်ပေါ်ခဲ့သည်ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC)ကအသိ ထုတ်ပြန်ခဲ့သည်။
ထို့ကြောင့် ဓာတ်အားစနစ်မှ ဓာတ်အားချိတ်ဆက်ပို့လွှတ်နိုင်ခြင်းမရှိစဉ် ကာလအတွင်းရန်ကုန်တိုင်းအတွင်းရှိ Gas Turbine များမှ ဓာတ်အားထုတ်လုပ်ဖြန့်ဖြူးနိုင်ရန် YESC မှ ကြိုးပမ်းစီမံဆောင်ရွက်လျက်ရှိသည်ဟု အသိပေးထားသည်။
"မနေ့ကမီးက ၉ နာရီလာတယ် ၁ နာရီမှပျက်ရမှာဆိုတော့ ရေတင်တာတွေလိုက်တာအကုန်ရလိုက်တယ်။ ၁၂ နာရီ ၅၀ လောက်မှာမီးပျက်သွားတယ်။ ပြီးတော့ ငလျင်လှုပ်တယ်။ အဲဒီကနေစပြီးအခုချိန်ထိမီးမလာတော့ဘူး။ ရေကလည်း မီးပြန်လာမယ်ထင်ပြီးသုံကြတော့ အခုရေကလည်းမရှိတော့ဘူး။ အလုပ်သမားတွေကိုတော့မှာထားတယ်။ ညနေပြန်လာလို့ရေချိုးမယ်ဆိုရင်အလုပ်ကနေချိုးခဲ့ဖို့မှာထားတယ်"မြောက်ဥက္ကလာပမြို့နယ်မှအဆောင်ပိုင်ရှင်တစ်ဦးကပြောသည်။
လက်ရှိနိုင်ငံတော်ဓာတ်အားစနစ်မှ ဓာတ်အားပြန်လည်ချိတ်ဆက်ပို့လွှတ်ပေးနိုင်ပါက ပုံမှန်အတိုင်း ဓာတ်အားပြန်လည်ဖြန့်ဖြူးပေးနိုင်မည်ဟုလည်း YESC ကအသိပေးထားသည်။
သတင်း - ပိုင်လေး
ဓာတ်ပုံ - YESC