ရန်ကုန်။ ၂၀၂၅၊ မတ် ၂၉ ရက်
၂၀၂၅ ခုနှစ် မတ်လ ၂၉ ရက်နေ့ မြန်မာစံတော်ချိန် ညနေ ၃ နာရီ ၂၀ မိနစ်အချိန်မှ ၇ နာရီ ၁၅ မိနစ် အချိန် အတွင်း တစ်စိတ်တစ်ပိုင်း နေကြတ်ခြင်းဖြစ်စဉ် ဖြစ်ပေါ်နိုင်ကြောင်း မိုးလေဝသနှင့်ဇလဒေညွှန်ကြားမှုဦးစီး ဌာနရဲ့ ထုတ်ပြန်ထားမှုအရ သိရပါတယ်။
အဆိုပါ တစ်စိတ်တစ်ပိုင်းနေကြတ်ခြင်းဖြစ်စဉ်ကို ဥရောပတိုက်၊ အာရှတိုက်မြောက်ပိုင်း၊ အာဖရိကတိုက် အနောက်မြောက်ပိုင်းနှင့် မြောက်အမေရိကတိုက်ဒေသများရှိ နိုင်ငံအသီးသီးတို့မှ မြင်တွေ့နိုင်မယ်လို့လည်း သိရပါတယ်။
နေကြတ်ခြင်းဖြစ်စဉ်ဟာ နေ၊ လ နှင့် ကမ္ဘာတို့ တစ်တန်းတည်း ကျရောက်ချိန်ဖြစ်တဲ့ လကွယ်နေ့မှာသာ ဖြစ်ပေါ်တတ်သလို လကြတ်ခြင်းဟာလည်း နေ၊ ကမ္ဘာ နှင့် လ တို့ တစ်တန်းတည်းကျရောက်တဲ့ လပြည့်နေများမှာသာ ဖြစ်ပေါ်လေ့ရှိပြီး လပြည့်၊ လကွယ် ရက်တိုင်းတော့ နေကြတ်၊ လကြတ်ခြင်း မဖြစ်ဘဲ အကြောင်းအရင်းမှာ လ ရဲ့ ကမ္ဘာကို ပတ်နေတဲ့ လမ်းကြောင်းဟာ ၅ ဒီဂရီခန့် တိမ်းစောင်းနေလို့ပဲ ဖြစ်တယ်လို့လည်း အာကာသနှင့် စကြာဝဠာဆိုင်ရာ သုတေသီတွေရဲ့အဆိုအရ သိရပါတယ်။
နေဟာ ကမ္ဘာမှ ပျမ်းမျှ မိုင်ပေါင်း ၉၃ သန်း (ကီလိုမီတာ သန်း ၁၅၀) ခန့် ကွာဝေးပြီး အရွယ်အစားအားဖြင့် ကမ္ဘာထက် အချင်းအဆ ရာကျော် (၁၀၉ ဆခန့်) ကြီးမားကာ လ ကတော့ ကမ္ဘာမှ မိုင်ပေါင်း ပျမ်းမျှ ၂၃၆,၀၀၀ အကွာမှာသာရှိပြီး အရွယ်အစားအားဖြင့် ကမ္ဘာရဲ့ ၄ ပုံ ၁ ပုံခန့်သာရှိပြီး အရွယ်အစားချင်း နှိုင်းယှဉ်ပါက နေဟာ လ ထက် အဆပေါင်း ၄၀၀ ခန့် ကြီးမားကာ ၎င်းတို့ ရောက်ရှိနေတဲ့အကွာအဝေးကြောင့် ကမ္ဘာမှ ကြည့်တဲ့အခါ နေ နှင့် လ ဟာ အရွယ်အစား သိပ်မကွာလှပဲ တခါတရံမှာ လ က နေအရှေ့မှ ဖြတ်သန်းတဲ့အခါ ယခုလို နေကြတ်ခြင်း ဖြစ်စဉ်ပေါ်ပေါက်ပြီး အရိပ်ကျရောက်တဲ့နေရာမှာ မှောင်မိုက်ခြင်း (အလင်းကွယ်ခြင်း) ခေတ္တခဏ ဖြစ်ရတာဖြစ်တယ်လို့လည်း သိရပါတယ်။
နေကြတ်မည့်နေ့အဖြစ် တပေါင်းလကွယ်နေ့ (အမှန်) ဖြစ်တဲ့ မတ်လ ၂၉ ရက်နေ့ မြန်မာစံတော်ချိန် ညနေ ၃ နာရီ ၂၁ မိနစ် မှ ၇ နာရီ ၁၃ မိနစ် အထိ ဖြစ်တတ်ပြီး ပြက္ခဒိန်ရက်နဲ့ တစ်ရက်စီကွာသလို နေကြတ်ခြင်းကို မြင်တွေ့ရမည့် နိုင်ငံများကတော့ မြောက်အမေရိက အရှေ့ပိုင်း၊ ဥရောပ၊ အာဖရိက အနောက်မြောက်ပိုင်း နဲ့ ရုရှား အနောက်ပိုင်းတို့ ဖြစ်သလို မြန်မာနိုင်ငံမှာတော့ ၂၀၃၁ ခုနှစ် မေလ မတိုင်ခင်အထိ နေကြတ်ခြင်းဖြစ်စဉ်ကို သေချာစွာ မြင်ရနိုင်ဖို့ မရှိသေးဘူးလို့လည်း ပြီးခဲ့တဲ့ ဖေဖော်ဝါရီလအတွင်းက သုတေသီအချို့က သုံးသပ်ပြောကြားထားပါတယ်။
#crd#crdphoto
