နောက် ၅ နှစ်ဆို AI က လူထက်သာတော့မယ်လို့ DeepMind CEO ပြော
အနည်းနဲ့ အမြန်ပါပဲ။ လူထက် သာတဲ့ AI တွေ ပေါ်လာတော့မှာပါ။
ဒါကို AGI (Artificial Genearl Intelligence) လို့ ဆိုပါတယ်။ AGI တွေ မြင်ရမယ့် အချိန်ကာလကို ပညာရှင်တွေ တစ်ယောက်နဲ့တစ်ယောက် ခန့်မှန်းတာချင်းတော့ မတူပါဘူး။
Google ပိုင် AI ကုမ္ပဏီတစ်ခု ဖြစ်တဲ့ DeepMind ရဲ့ CEO ဒီမစ် ဟတ်ဆာဘစ်ကတော့ လူထက်သာတဲ့ AGI တွေ နောက် ၅ နှစ်နဲ့ ၁၀ နှစ်အတွင်း ပေါ်လာမယ်လို့ ထုတ်ပြောပါတယ်။ ဟက်ဆာဘစ်ကတော့ AGI ဆိုတာကို လူလောက်နိုင်သလောက် ရှုပ်ထွေးတဲ့ လုပ်ဆောင်ချက်တွေ လုပ်နိုင်စွမ်းရှိတဲ့ စနစ်တစ်ခုလို့ သတ်မှတ်ပါတယ်။
AGI တွေ ဘယ်လောက် အစွမ်းထက်နိုင်မလဲတော့ ဘယ်သူမှ အတိအကျ မပြောသေးပါဘူး။ ပြောဖို့ စောသေးတာလည်း ဖြစ်နိုင်ပါတယ်။ အပေါ်မှာ ပြောခဲ့သလို AGI ပေါ်လာမယ့် timeline ကို ခန့်မှန်းတာတော့ တစ်ယောက်နဲ့ တစ်ယောက် မတူကြပါဘူး။
ပြီးခဲ့တဲ့နှစ်က တရုတ် Baidu ကုမ္ပဏီ CEO ရော်ဘင်လီက AGI တွေ နောက် ၁၀ နှစ်ကျော်မှ မြင်ရမယ်လို့ ပြောခဲ့ပြီး Anthropic ရဲ့ CEO ဒါရီယို အာမိုဒေးကတော့ နောက်နှစ်နှစ် သုံးနှစ်အတွင်း လူထက်သာတဲ့ AI ပုံစံတွေ ပေါ်မယ်လို့ ပြောခဲ့ပါတယ်။ Cisco ရဲ့ CPO အရာရှိ ဂျက်တူး ပီတယ်ကတော့ ဒီနှစ်ထဲမှာကို AGI ဆန်တာတွေ မြင်ရမယ်လို့ ပြောထားတာ ရှိပါတယ်။
Tesla CEO အီလွန်မတ်စ်နဲ့ OpenAI CEO တို့ကတော့ AGI တွေကို နောက်နှစ်နှစ် သုံးနှစ်အတွင်း ပေါ်လာမယ်လို့ တွက်ထားကြပါတယ်။ ဘာပဲဖြစ်ဖြစ် AI မျိုးဆက်သစ်တွေ မြင်ရဖို့ သိပ်မစောင့်ရတော့ဘူးလို့ တွေးထားရတော့မှာပါ။